جىل باسىنان بەرى ءبىرجان سال اۋدانىندا الەۋمەتتىك-ەكونوميكالىق دامۋ باعىتىندا جۇيەلى جۇمىستار اتقارىلدى. بۇل تۋرالى اۋدان اكىمى بولات قاسەنوۆ بريفينگتە ءمالىم ەتتى، دەپ حابارلايدى وڭىرلىك كوممۋنيكاتسيالار قىزمەتىنەن.
اۋدان كولەمىندە جۇرگىزىلگەن قۇرىلىس جۇمىستارىنىڭ جالپى كولەمى 207 ميلليون تەڭگەنى قۇرادى. بىراق وتكەن جىلمەن سالىستىرعان كورسەتكىش ءسال تومەن. بىلتىر ءىرى جوبالار (اۋرۋحانا، مەكتەپ، سۋ قۇبىرى) قاتار ىسكە اسقان بولاتىن.
«بيىل حالىق قاراجاتى ەسەبىنەن 486 شارشى مەتر تۇرعىن ءۇي پايدالانۋعا بەرىلدى. بۇل – وتكەن جىلدىڭ كورسەتكىشىنىڭ 37,7 پايىزى. سونىمەن قاتار، الەۋمەتتىك وسال توپتار مەن بيۋدجەت سالاسى قىزمەتكەرلەرىن تۇرعىن ۇيمەن قامتۋ ماقساتىندا 21 پاتەرلى تۇرعىن ءۇيدىڭ قۇرىلىسى جالعاسىپ جاتىر. بۇگىندە مەملەكەتتىك قوردان تۇرعىن ءۇي كەزەگىندە 258 ادام تىركەلگەن»، – دەدى اۋدان اكىمى.العاشقى مەردىگەردىڭ مىندەتىن دۇرىس ورىنداماۋىنا بايلانىستى كەلىسىمشارت بۇزىلىپ، جاڭا كونكۋرس ناتيجەسىندە «قاراكەسەك-نت» جشس انىقتالدى. جوباعا وبلىستىق بيۋدجەتتەن 74 ملن تەڭگە بولىنگەنىمەن، جوبانى ناقتىلاۋ ءۇشىن قوسىمشا 121 ملن تەڭگە قاجەت بولىپ وتىر. سۋ ماسەلەسى اۋداننىڭ باستى باسىمدىقتارىنىڭ ءبىرى رەتىندە قاراستىرىلادى. ماكپال اۋىلىندا سۋ قۇبىرى جۇيەسى تولىق جاڭارتىلىپ، 74 ابونەنت ورتالىق سۋ جۇيەسىنە قوسىلدى.
«ۇلگى اۋىلىنداعى سۋ قۇبىرى جەلىلەرىنىڭ 95%-ى اياقتالعان. 788 ملن تەڭگە بولىنگەن بۇل جوبا شىلدە ايىندا پايدالانۋعا بەرىلمەك. سونىمەن قاتار، زاوزەرنوە اۋىلىنداعى سۋ جەلىسىن قايتا قۇرۋعا 297 ملن تەڭگە قاراستىرىلعانمەن، قوسىمشا 12 ملن تەڭگە قاجەت. ۋاقىتشا بۇل اۋىلعا «كوكشە تسەمەنت» كاسىپورنى اۋىزسۋ جەتكىزىپ وتىر»، – دەپ تولىقتىردى اكىم.اقتاس جانە ماكينكا اۋىلدارىنىڭ توزعان سۋ جەلىلەرىنە 55,6 ملن تەڭگەگە اعىمداعى جوندەۋ جۇمىستارى جوسپارلانعان. ال كاراتال مەن ستەپنياك اۋىلدارىندا سۋدى تۇششىتۋ جۇيەسى بار كەشەندى بلوك-مودۋلدەر ورناتىلىپ جاتىر. ستەپنياك قالاسىنداعى جىلۋ جۇيەسىنىڭ ۇزىندىعى – 15,6 كم. وتكەن جىلىتۋ ماۋسىمىندا كومىر تاپشىلىعى مەن جىلۋ جەتكىزۋدەگى قيىندىقتار تىركەلدى. وسىعان بايلانىستى ەكى قازاندىقتاعى 6 پەشتى اۋىستىرۋ تۋرالى شەشىم قابىلدانىپ، بۇل جۇمىسقا وبلىستىق بيۋدجەتتەن 122 ملن تەڭگە ءبولىندى. اۋداندا جول ماسەلەسى دە بىرتىندەپ شەشىلۋدە. «اۋىل – ەل بەسىگى» باعدارلاماسى اياسىندا قوعام جانە تاسشالقار اۋىلدارىنىڭ ىشكى جولدارىنا ورتاشا جوندەۋ جۇمىستارى جۇرگىزىلۋدە. بۇل جۇمىستارعا 80 ملن جانە 157 ملن تەڭگە ءبولىندى. اۋداندا 25 مەكتەپ پەن 2 بالاباقشا جۇمىس ىستەيدى. بيىل كەڭاششى، اندىقوجا باتىر جانە ستەپنياكتاعى №1 مەكتەپتە كۇردەلى جوندەۋ جۇرگىزىلىپ جاتىر. ماكينكا مەكتەبىن جوندەۋگە 225 ملن تەڭگە ءبولىندى. بۇلاندى اۋىلىندا 80 ورىندىق مەكتەپتىڭ قۇرىلىسى اياقتالىپ، اۋلا اباتتاندىرۋ جۇمىستارى جۇرگىزىلىپ جاتىر. مەديتسينا سالاسىندا 45 ورىندىق اۋرۋحانا مەن 200 ادامعا ارنالعان ەمحانانىڭ قۇرىلىسى اياقتالۋعا جاقىن. بۇل جوباعا 6,1 ملرد تەڭگە ءبولىندى. تامىز ايىندا تولىق ىسكە قوسۋ جوسپارلانىپ وتىر. سونىمەن قاتار، اندىقوجا باتىر اۋىلىندا جاڭا فەلدشەرلىك-اكۋشەرلىك پۋنكت سالىندى.
«قازىر اۋداندا 18 دارىگەر جۇمىس ىستەيدى، قاجەتتىلىك – 9 مامان. كادر تاپشىلىعىن شەشۋ ءۇشىن اكىم اتىنداعى اتاۋلى شاكىرتاقى تاعايىندالىپ، 10 ستۋدەنت مەديتسينالىق جوعارى وقۋ ورىندارىندا وقىپ جاتىر. بيىل ونىڭ 4-ەۋى وقۋىن اياقتاپ، اۋدانعا كەلمەك»، – دەدى اكىم.جىل باسىنان بەرى 127 جاڭا جۇمىس ورنى اشىلعان. الەۋمەتتىك وسال توپتارعا 15,5 ملن تەڭگە كولەمىندە ماتەريالدىق كومەك كورسەتىلدى. بۇل اۋدان حالقىنىڭ 3,1 پايىزىنا تەڭ. جۇمىسسىزدىق دەڭگەيى – 5,2 پايىز، تىركەلگەنى – 1,4 پايىز. اۋداندا 14 كلۋب پەن 20 كىتاپحانا جۇمىس ىستەيدى. جاستاردىڭ بوس ۋاقىتىن ءتيىمدى وتكىزۋ ماقساتىندا جاڭا سپورت الاڭدارى، بالالار الاڭدارى ورناتىلىپ، ۇلتتىق سپورت تۇرلەرى دامىتىلىپ جاتىر. كەڭاششى اۋىلىندا فۋتبول الاڭى سالىندى. بۇقارالىق سپورتتى دامىتۋ جولىندا «جەڭىس» سپورت كەشەنى مەن جاڭارتىلعان ستاديون ءوز جۇمىسىن جالعاستىرۋدا.
