اقمولا وبلىسى ەلىمىزدىڭ باستى اگرارلى ايماعى رەتىندەگى مارتەبەسىن تاعى ءبىر مارتە دالەلدەدى – مۇندا 2025 جىلعى كوكتەمگى ەگىس ناۋقانى العاشقىلاردىڭ ءبىرى بولىپ اياقتالدى. رەسمي مالىمەت بويىنشا، بيىلعى كوكتەمدە 5,2 ميلليون گەكتار القاپقا ەگىن ەگىلدى، بۇل وتكەن جىلمەن سالىستىرعاندا 63 مىڭ گەكتارعا ارتىق. وبلىستىق اۋىل شارۋاشىلىعى جانە جەر قاتىناستارى باسقارماسىنىڭ مالىمەتىنشە، جۇمىستار اگروتەحنيكالىق تالاپتارعا ساي ءارى ۋاقىتىلى جۇرگىزىلدى.
اۋىل شارۋاشىلىعى تاۋارىن وندىرۋشىلەر كوكتەمگى ەگىسكە قىس مەزگىلىنەن باستاپ دايىندالا باستادى – قار توقتاتۋ جۇمىستارى ەرتە قولعا الىنىپ، كوكتەمدە 2 ميلليون گەكتاردان استام جەر وڭدەلدى. بۇل كورسەتكىش وتكەن جىلمەن سالىستىرعاندا ءۇش ەسە كوپ. ناۋقان كەزىندە 37 مىڭنان استام اۋىل شارۋاشىلىعى تەحنيكاسى، ونىڭ ىشىندە زاماناۋي ەگىس كەشەندەرى جۇمىسقا جۇمىلدىرىلدى. بۇل ەگىس جۇمىستارىن ۇزدىكسىز ءارى ۇيىمداسقان تۇردە وتكىزۋگە مۇمكىندىك بەردى.
«ۋاقتىلى قارجىلاندىرۋ مەن ءتيىمدى لوگيستيكانىڭ ارقاسىندا شارۋالار تۇقىم، تىڭايتقىش، جانار-جاعارمايدى دەر كەزىندە ساتىپ الا الدى. بۇل – ەگىس ناۋقانىن جوعارى دەڭگەيدە وتكىزۋگە نەگىز بولدى»، – دەدى اقمولا وبلىسىنىڭ اكىمى مارات احمەتجانوۆ.بيىل مەملەكەت تاراپىنان اۋىل شارۋاشىلىعىنا كورسەتىلگەن قولداۋ كولەمى بۇرىن-سوڭدى بولماعان دەڭگەيگە جەتتى. ءار ءتۇرلى قارجى ينستيتۋتتارى ارقىلى 778 شارۋاشىلىققا 100 ميلليارد تەڭگەدەن استام نەسيە بەرىلسە، اگراريلەرگە 76 مىڭ توننادان استام ارزانداتىلعان ديزەل وتىنى ءبولىندى. ەگىس القاپتارىنىڭ قۇرىلىمىندا دا وڭ وزگەرىستەر بايقالادى: ءداندى داقىلدار 4,6 ملن گەكتار القاپقا سەبىلسە، مايلى داقىلدار العاش رەت 430 مىڭ گەكتارعا دەيىن جەتتى. بۇل – وتكەن جىلمەن سالىستىرعاندا 161 مىڭ گەكتارعا ارتىق. سونىمەن قاتار مال ازىعى، كارتوپ جانە كوكونىس داقىلدارىنىڭ كولەمى دە ۇلعايعان. مامىر ايىنداعى ۋاقىتىلى جاۋعان جاڭبىر توپىراقتاعى ىلعال قورىن ارتتىرىپ، تۇقىمنىڭ جاقسى ونۋىنە ىقپال ەتتى. بۇل – بيىل مول ونىمگە ءۇمىت ارتۋعا مۇمكىندىك بەرەدى. ناۋقان بارىسىندا وزىق شىققان شارۋاشىلىقتار قاتارىندا «اگروفيرما رودينا» جشس، «اكتىك»، «زارەچنوە»، «نوۆوپريرەچنوە»، «بەلگورودسكوە»، «حلەبوروب» جانە «جەر-1» سەرىكتەستىكتەرى اتالدى.
«مەملەكەت تاراپىنان ناقتى قولداۋدى سەزىنۋدەمىز. بۇل ءبىزدى ءتيىمدى ءارى ساپالى جۇمىس ىستەۋگە ىنتالاندىرادى. ەندىگى باستى مىندەت – ەگىستىكتەردى زيانكەستەر مەن اۋرۋلاردان قورعاۋ جانە تەحنيكامىزدى وراق ناۋقانىنا دايىنداۋ»، – دەدى ەسىل اۋدانىنداعى شارۋاشىلىق ديرەكتورلارىنىڭ ءبىرى.الدا اگراريلەردى كەم ەمەس جاۋاپتى كەزەڭ – ەگىن جيناۋ كۇتىپ تۇر. دەگەنمەن اقمولا وبلىسىنداعى ەگىس ناۋقانىنىڭ ءساتتى ءارى سەنىمدى باستالۋى بۇكىل اۋىل شارۋاشىلىعى ماۋسىمىنا وڭ سەرپىن بەرىپ وتىر. بۇل – اگروسالانى جۇيەلى قولداۋدىڭ ناقتى ناتيجەسى.
