سەنبى كۇنى بوگوتا قالاسىندا وتكەن سايلاۋالدى ميتينگ كەزىندە كولۋمبيا سەناتورى جانە كەلەسى جىلعى پرەزيدەنت سايلاۋىندا ۇمىتكەر بولۋى مۇمكىن ميگەل ۋريبە تۋربايعا قاستاندىق جاسالدى، دەپ حابارلايدى "ادىرنا" ۇلتتىق پورتالى.
قاستاندىق بوگوتانىڭ فونتيبون اۋدانىنداعى ساياباقتا بولعان. قارۋلى ادام سەناتوردىڭ ارقاسىنان وق اتقان. قالا مەرى كارلوس گالاننىڭ حابارلاۋىنشا، كۇدىكتى ۇستالعان.
الەۋمەتتىك جەلىلەردە تاراعان سۋرەتتەردە 39 جاستاعى ۋريبەنىڭ قانسىراپ جاتقان دەنەسىن بىرنەشە ادام ۇستاپ تۇرعانى كورىنەدى. Fundación Santa Fe اۋرۋحاناسىنىڭ رەسمي مالىمدەمەسىندە سەناتوردىڭ اۋىر حالدە اۋرۋحاناعا جەتكىزىلىپ، نەيروحيرۋرگيالىق جانە قان تامىرلارىنا وتا جاسالىپ جاتقانى ايتىلعان.
«ميگەل ءومىرى ءۇشىن كۇرەسىپ جاتىر»، - دەپ جازدى ونىڭ ايەلى ماريا كلاۋديا تاراسونا سەناتوردىڭ X (بۇرىنعى Twitter) پاراقشاسىندا.
كولۋمبيانىڭ باس پروكۋراتۋراسى تەرگەۋ باستالعانىن حابارلادى. ميگەل ۋريبەگە ەكى رەت وق اتىلعان، تاعى ەكى ادام جارالانعان.
كولۋمبيا ۇكىمەتى شابۋىلعا قاتىسى بار بارلىق ادامداردى ۇستاۋعا كومەكتەسكەندەرگە سىياقى جاريالادى.
پرەزيدەنت شابۋىلدان كەيىن فرانتسياعا جوسپارلانعان ساپارىن توقتاتتى. سەنبى كۇنى كەشكە وتكەن قاۋىپسىزدىك كەڭەسىنىڭ توتەنشە وتىرىسىندا كولۋمبيا تاريحىنداعى العاشقى سولشىل پرەزيدەنت پەترو شابۋىلدى ۇيىمداستىرۋشىلارعا قاتىستى تولىق جانە اشىق تەرگەۋ جۇرگىزىلەتىنىن ۋادە ەتتى. ول سونىمەن قاتار سەناتوردىڭ قاۋىپسىزدىگىنە جاۋاپتى ورگانداردىڭ جۇمىسىنا قاتىستى تەكسەرىس جۇرگىزىلەتىنىن مالىمدەدى.
ميگەل ۋريبە تۋرباي – 1991 جىلى كولۋمبياداعى ەڭ اۋىر كەزەڭدەردىڭ بىرىندە ۇرلانىپ، ولتىرىلگەن بەلگىلى ءجۋرناليستىڭ ۇلى.
كولۋمبياداعى كەزەكتى پرەزيدەنت سايلاۋى 2026 جىلعى 31 مامىرعا جوسپارلانعان. سەناتور ۋريبە ءوز كانديداتۋراسىن وسى جىلدىڭ ناۋرىز ايىندا ۇسىنعان بولاتىن.
ۇلتتىق پوليتسيا ديرەكتورى، گەنەرال كارلوس تريانانىڭ ايتۋىنشا، شابۋىل كەزىندە ۋريبەنىڭ جانىندا قالالىق كەڭەس مۇشەسى اندرەس بارريوس پەن تاعى 20 ادام بولعان. وقيعا ورنىندا شابۋىلعا قاتىسى بار دەگەن كۇدىكپەن كامەلەتكە تولماعان ءجاسوسپىرىم ۇستالدى.
