شىمكەنت قالاسىنىڭ ەكونوميكاسى سوڭعى جىلدارى تۇراقتى تۇردە ءوسىپ كەلەدى. بۇل – شاھار ەكونوميكاسىنا ينۆەستيتسيا تارتۋ بويىنشا جۇيەلى جۇمىس جۇرگىزىلۋىنىڭ ناتيجەسى.
ناقتىراق ايتار بولساق، بيىل قاڭتار-ءساۋىر ايلارىندا شىمكەنت قالاسىنا 233 ملرد تەڭگە ينۆەستيتسيا تارتىلدى. مۇنىڭ ءوزى وتكەن جىلدىڭ ءتيىستى كەزەڭىمەن سالىستىرعاندا 54 پايىزعا جوعارى كورسەتكىش. ەل ۇكىمەتى بەكىتكەن دەكومپوزيتسياعا سايكەس 2025 جىلى شىمكەنتكە 1 تريلليون 54 ملرد تەڭگە ينۆەستيتسيا تارتۋ كوزدەلگەن. قالا ەكونوميكاسىن ودان ءارى دامىتۋ ءۇشىن 2025-2029 جىلدار ارالىعىندا وڭدەۋ ونەركاسىبىندە 112 كاسىپورىن اشىلادى دەپ جوسپارلانعان. ول ءۇشىن ينۆەستيتسيالىق جوبالاردىڭ ارنايى پۋلى ازىرلەندى. بۇل جوبالارعا 406 ملرد تەڭگەگە ينۆەستيتسيا تارتىلۋى ءتيىس. وندا 8,5 مىڭنان استام جاڭا جۇمىس ورنى قۇرىلادى. بەس جىلدىق پۋلدى ورىنداۋ قازىردىڭ وزىندە باستالىپ كەتتى. بيىل قالادا وڭدەۋ ونەركاسىبى سالاسىندا 73 ملرد تەڭگەگە 22 كاسىپورىن اشۋ جوسپارلانعان. وندا 1,2 مىڭنان استام جۇمىس ورنى پايدا بولادى. ونىڭ ىشىندە «QazAlPack» جشس-ءنىڭ اليۋميني قاپتاماسىن وندىرەتىن زاۋىتى بيىل ناۋرىز ايىندا ىسكە قوسىلدى. اتالعان جوبالاردىڭ ىسكە قوسىلۋى ونەركاسىپ ءونىم كولەمىن 50 ملرد تەڭگەگە ۇلعايتۋعا جانە ەكسپورت كولەمىن 18 ملن اقش دوللارىنا دەيىن جەتكىزۋگە مۇمكىندىك بەرەدى. جوبانى ىسكە اسىرۋعا نيەتتى ينۆەستورلارعا ونەركاسىپ الاڭدارىندا ينفراقۇرىلىمى دايىن، ۇزاق مەرزىمگە جالعا بەرىلەتىن جەر تەلىمدەرى ۇسىنىلادى. كاسىپورىندار كوممۋنالدىق قىزمەتتەردىڭ اقىسىن ارزانداتىلعان تاريفپەن تولەيدى. ال، ارنايى ەكونوميكالىق ايماققا قاتىسۋشىلارعا سالىق جەڭىلدىكتەرى بەرىلەدى. قازىر قالادا 1 276 گەكتار جەردى الىپ جاتقان 7 وندىرىستىك الاڭ جۇمىس ىستەپ تۇر. ونىڭ ىشىندە اۋماعى 306 گەكتارلىق «جۇلدىز» جانە 132 گەكتارلىق «بوزارىق» يندۋستريالدى ايماقتارى 2024 جىلى ىسكە قوسىلدى. بۇگىندە ينۆەستورلاردى قولداۋدىڭ اشىق جانە سىندارلى ديالوگقا ىقپال ەتەتىن كوپ دەڭگەيلى ينفراقۇرىلىمى قالىپتاستى. ينۆەستيتسيالىق كاپيتالدى تارتۋدىڭ اشىق، تۇراقتى جانە بولجامدى شارتتارىن قامتاماسىز ەتۋگە ەرەكشە نازار اۋدارىلادى. وسىلايشا، وتاندىق جانە شەتەلدىك كاپيتالدىڭ قاتىسۋىمەن جۇزەگە اسىرىلاتىن ينۆەستيتسيالىق جوبا باستاماشىلارىنا ينۆەستيتسيالىق كەلىسىمشارتتارعا قول جەتكىزۋگە كومەك كورسەتىلۋدە. قالا ەكونوميكاسىنا تارتىلاتىن ينۆەستيتسيا كولەمىن ارتتىرۋ ماقساتىندا شىمكەنت قالاسى اكىمدىگىنىڭ 2025 جىلعى 24 قاڭتارداعى № 248 قاۋلىسىمەن «Shymkent Invest – Front office» ينۆەستيتسيالاردى تارتۋ جانە ينۆەستورلاردى قولداۋ ورتالىعى» جشس-ءى قۇرىلعان. اتالعان ۇيىمنىڭ نەگىزگى مىندەتتەرىنە قالانىڭ ينۆەستيتسيالىق تارتىمدىلىعىن ارتتىرۋ بويىنشا اناليتيكالىق زەرتتەۋلەر جۇرگىزۋ، ينۆەستورلاردىڭ قىزمەتىن سۇيەمەلدەۋدى قامتاماسىز ەتۋ، قولايلى ينۆەستيتسيالىق ءيميدجىن ىلگەرىلەتۋ، ونىڭ ىشىندە ينۆەستيتسيالىق مۇمكىندىكتەر تۋرالى اقپارات بەرۋ، «ءبىر تەرەزە» قاعيداتى بويىنشا ينۆەستورلارمەن ءوزارا ءىس-قيمىل جاساۋ جاتادى.
ۇقساس جاڭالىقتار
