№93 مەكتەپ-ليتسەيىندەگى «اتامەكەن» ەتنولاگەرى جايلى ويتولعام
استانا تورىندەگى №93 مەكتەپ-ليتسەيىندە بيىلعى جاز ەرەكشە ءبىر مانمەن باستالدى. بالالاردىڭ جازعى دەمالىسىن مازمۇندى ءارى تاربيەلىك ماعىناعا تولى ەتۋ ماقساتىندا ۇيىمداستىرىلعان لاگەر — جاي عانا ويىن مەن تىنىعۋ ورنى ەمەس، ۇلتتىق قۇندىلىقتار مەن وتباسىلىق تاربيەنىڭ التىن ۇياسىنا اينالىپ وتىر. اسىرەسە «اتامەكەن» ەتنولاگەرىنىڭ جۇمىسى جۇرت نازارىن اۋدارىپ، جۇرەككە جىلۋلىق، ساناعا ساۋلە سىيلادى.
اتامەكەن – اتا جولىنىڭ ىزىمەن…
بۇگىنگى جاھاندانۋ داۋىرىندە بالالاردى قازاقى بولمىس پەن رۋحاني دۇنيەگە جەتەلەيتىن، ولاردى ءوزىنىڭ تامىرىنا قاراي باستايتىن وسىنداي باستامالار اۋاداي قاجەت. №93 مەكتەپ-ليتسەيىنىڭ ديرەكتورى بەكسۇلتان پولاتبەكۇلىنىڭ باستاماسىمەن قولعا الىنعان «اتامەكەن» ەتنولاگەرى — جاس ۇرپاقتى اتا داستۇرىمەن تابىستىراتىن ەرەكشە كەڭىستىككە اينالدى. مۇندا ءاربىر كۇن — تاربيەلىك مانگە تولى. بالالار اسىق ويناپ، ارقان تارتىپ، كيىز باسىپ، قۇراق كورپە تىگەدى. شاشۋ شاشىپ، باتا بەرۋدى ۇيرەنىپ، باۋىرساق پەن قۇرت دايىندايدى. بۇل — جاي عانا تۇرمىستىق ءىس ەمەس، بۇل — ۇلتتىق جادتىڭ جاڭعىرۋى، تامىرمەن قايتا تابىسۋ. قىش قۇمىرا يلەپ، قۇممەن سۋرەت سالىپ، تابيعات اياسىندا قيالىن بەينەلەگەن بالانىڭ بويىنان قازاقى دۇنيەتانىم مەن ەستەتيكا ءورىس الىپ جاتقانىن بايقالادى.مەكتەپ پەن اتا-انا — ءبىر ساپتا
بيىلعى لاگەردىڭ تاعى ءبىر جاڭالىعى — اتا-انالارمەن بىرلەسكەن كۇندەردىڭ ەنگىزىلۋى. بۇل — وتە ورىندى، ءارى ۋاقىت تالابىنان تۋعان قادام. بالالارمەن بىرگە اتا-انالاردىڭ ۇلتتىق ويىندارعا، شىعارماشىلىق شارالارعا قاتىسۋى – ۇرپاق تاربيەسىنە ورتاق جاۋاپكەرشىلىكپەن قاراۋدىڭ كورىنىسى. ۇلتتىق تاربيە وتباسىنان باستالادى جانە مەكتەپپەن ۇشتاسقاندا عانا جەمىستى بولادى. مىنە، وسى ۇستانىم لاگەردىڭ تىنىس-تىرشىلىگىنەن كورىنىس تابۋدا. بالالارعا جازدا دەمالىس كەرەك-اق. بىراق بۇل دەمالىس تەك ەرمەك پەن ويىنعا عانا قۇرىلسا، وندا بالانىڭ ۋاقىتى بوسقا ءوتىپ كەتۋى مۇمكىن. ال «اتامەكەن» سەكىلدى ەتنولاگەر — ۋاقىتتى ءتيىمدى پايدالانىپ قانا قويماي، بالانىڭ جان-دۇنيەسىن تاربيەلەۋگە باعىتتالعان يگى ءىس. بۇل – ۇلتتىق بولمىس قالىپتاستىراتىن ورتا. ءبىر كەزدەرى اۋىلداعى اجەلەرىمىز بەن اتالارىمىز بالانىڭ ساناسىنا ۇلتتىق ءدىلدى – اڭگىمەمەن، ىسىمەن، ونەگەسىمەن سىڭىرەتىن. ال بۇگىندە ونداي مۇمكىندىك ازايىپ بارا جاتقاندا، مەكتەپتىڭ مۇنداي باستاماسى – وتكەن مەن بۇگىننىڭ اراسىن جالعايتىن التىن كوپىر سەكىلدى. «اتامەكەن» ەتنولاگەرى – №93 مەكتەپ-ليتسەيىنىڭ عانا ەمەس، تۇتاس ۇلتتىق ءبىلىم بەرۋ سالاسىنىڭ ۇلگى ەتەرلىك جوباسى. ۇستازدار مەن اتا-انالار تىزە قوسىپ، جاس ۇرپاققا ۇلتتىق رۋحتى، سالت-سانانى، ادامگەرشىلىك پەن ەڭبەككە باۋلۋدىڭ جارقىن مىسالىن كورسەتىپ وتىر. ۇرپاق تاربيەسى – ۇلت تاعدىرى. ال ۇلتتىڭ بولاشاعى – وسىنداي تاعىلىمدى ىستەرمەن نۇرلانىپ، جارقىن بولارى انىق!
