الماتى قالاسىنىڭ اكىمى مەدەۋ اۋدانىندا سالىنىپ جاتقان جاڭا مەكتەپتىڭ قۇرىلىسىنداعى كىدىرىس ءۇشىن Bazis-A كومپانياسىن سىنعا الدى، دەپ حابارلايدى “ادىرنا” ۇلتتىق پورتالى.
«جايلى مەكتەپ» ۇلتتىق جوباسى اياسىندا 2000 وقۋشىعا ارنالعان وقۋ ورنىنىڭ جوباسىندا ءۇش قاباتتى عيمارات، اسحانا، اكت زالى، سپورت ستاديونى جانە تۇراق قاراستىرىلعان.
اكىمنىڭ ايتۋىنشا، مەكتەپ قۇرىلىسىنداعى جۇمىستار بەلگىلەنگەن مەرزىمنەن كەشىگۋدە. دارحان ساتىبالدى مەردىگەر ۇيىمنان بارلىق جۇمىستى 2025 جىلدىڭ تامىزىنا دەيىن اياقتاپ، قىركۇيەك ايىندا وقۋشىلاردى قابىلداۋعا دايىن بولۋدى تالاپ ەتتى.
“الەكساندر ياكۋبوۆيچ، قىركۇيەكتە بالالار وسى جەردە وقۋى كەرەك. ءبىز سىزدەرگە سەنىم ارتتىق، الايدا ۋادە ورىندالمادى. الماتى بويىنشا توعىز مەكتەپ سىزدەرگە تاپسىرىلدى – بۇگىندە وسى جوبالاردىڭ بارلىعى سىزدەردىڭ جۇمىستارىڭىزعا تىرەلىپ تۇر. بۇدان ءارى سوزۋعا بولمايدى. بۇل – بالالارعا قاتىستى ماسەلە ءارى بيۋدجەت قارجىسى”، – دەدى اكىم كومپانيا وكىلىنە.
سونىمەن قاتار، قالا باسشىسى شىعىس اينالما جولى بويىنداعى جاسىل ايماقتاردى ارالاپ، اۆتوماتتى سۋارۋ جۇيەسىن جوندەۋ قاجەتتىگىن اتاپ ءوتتى. بۇل جۇمىستار «تازا قازاقستان» باعدارلاماسى اياسىندا جۇزەگە اسىرىلادى. اكىم قالانى اباتتاندىرۋ جۇمىستارىن جەكە باقىلاۋىندا ۇستايتىنىن جەتكىزدى.
“قالانىڭ تازالىعى – بارلىعىمىزعا ورتاق مىندەت. قازىرگى تاڭدا كوپتەگەن كوممەرتسيالىق نىساندار – ءدامحانالار، مەيرامحانالار مەن دۇكەندەر – ىرگەلەس اۋماقتى تازارتۋدان جالتارىپ وتىر. مۇندايعا جول بەرىلمەۋى ءتيىس”، – دەدى ول.
سونداي-اق، اكىم كىشى ستانيتسا اۋماعىندا ەكى جىلدان استام بوس تۇرعان توعىز عيماراتتى ارالاپ كوردى. اتالعان اۋماقتا الەۋمەتتىك نىساندار جەتىسپەيتىنىن ايتقان اكىم بۇل نىسانداردى كوممۋنالدىق مەنشىككە بەرۋ ماسەلەسىن قاراستىرۋدى تاپسىردى.
ۇقساس جاڭالىقتار
