مەملەكەت باسشىسى مادەنيەت جانە سپورت ءمينيسترى اقتوتى رايىمقۇلوۆاعا جاڭا ءالىپبيدى جەتىلدىرۋگە قاتىستى تاپسىرما بەردى دەپ حابارلايدى Sputnik.
قازاقستان پرەزيدەنتى قاسىم-جومارت توقاەۆ لاتىن گرافيكاسىنا نەگىزدەلگەن جاڭا قازاق ءتىلى ءالىپبيىن جەتىلدىرۋدى تاپسىردى. بۇل تۋرالى مەملەكەت باسشىسى twitter-دەگى پاراقشاسىندا جازدى.
ء"الىپبيدى لاتىن قارپىنە كوشىرۋ تۋرالى تاريحي شەشىمنىڭ قابىلدانعانىنا ەكى جىلعا جۋىقتادى. بىراق قارپىمىزدە ءالى دە ولقىلىقتار بار. ءتىل ماماندارى جاڭا ءالىپبيدى جەتىلدىرۋى كەرەك", - دەيدى پرەزيدەنت.
توقاەۆ وسىعان بايلانىستى مادەنيەت جانە سپورت ءمينيسترى اقتوتى رايىمقۇلوۆاعا ءتيىستى تاپسىرما بەرگەنىن اتاپ ءوتتى.
"الدىمىزدا اۋقىمدى جۇمىس تۇر", - دەپ جازدى ول.
ەستەرىڭىزگە سالا كەتەيىك، وسى جىلدىڭ اقپانىندا سول كەزدەگى مەملەكەت باسشىسى، ەلباسى نۇرسۇلتان نازارباەۆ لاتىن گرافيكاسىنداعى قازاق ءالىپبيىنىڭ جاڭا نۇسقاسىن بەكىتكەن بولاتىن. جارلىقپەن مىنا جەردە تانىسۋعا بولادى.
