بۇگىن استانا قالاسى №93 مەكتەپ-ليتسەيدە «بالا ءۇنى» جوباسىن قولداۋ بويىنشا «ءبىزدىڭ داۋىس» اتتى ەرەكشە ءبىلىم بەرۋ قاجەتتىلىگى بار بالالاردىڭ ەرەكشە كونتسەرتى بولدى.
ءىس-شارا «قازاقستان بالالارى» ونكۇندىگى اياسىندا ۇيىمداستىرىلعان. ماقسات – ەرەكشە بالالاردىڭ ءۇنىن تىڭداۋ ارقىلى ينكليۋزيۆتى قوعام قالىپتاستىرۋعا وزىندىك ۇلەس قوسۋ.
كونتسەرتتە ءتۇرلى دياگنوزداعى ەرەكشە بالالار ءوز ونەرلەرىن پاش ەتتى. ولاردىڭ قاتارىندا پسيحيكالىق دامۋى تەجەلگەن، تىلدىك دامۋىندا اۋىتقۋى بار جانە مىنەز-قۇلقىنىڭ وزگەرىسى بار دارىندى بالالار بار.
«بيىلدان باستاپ بۇل ءىس-شارانى ءداستۇرلى تۇردە جىل سايىن وتكىزەمىز. سونىمەن قاتار كەلەسى وقۋ جىلىنان باستاپ، مەكتەپتىڭ ءاربىر ءىس-شاراسىنا مىندەتتى تۇردە ەرەكشە بالالاردىڭ ورىنداۋىنداعى ەكى نومەردى قوسامىز» – دەدى مەكتەپ ديرەكتورى بەكسۇلتان باسىقارا.
