ديماش بەرليندەگى جەكە كونتسەرتى اياقتالعاننان كەيىن TV Berlin تەلەارناسىنا سۇحبات بەردى، دەپ حابارلايدى "ادىرنا" ۇلتتىق پورتالى Dimashnews-كە سىلتەپ.
ءانشى الدىمەن كونتسەرتىنە كەلگەن جانكۇيەرلەرگە العىسىن ايتىپ، بەرلينگە كەلگەنىنە قۋانىشتى ەكەنىن جەتكىزدى.
«مۇندا بولعانىما قاتتى تولقىپ تۇرمىن. بارلىق نەمىس جانكۇيەرلەرىمە جانە ەۋروپاداعى بارلىق تىڭدارماندارىما شىن جۇرەكتەن العىس ايتقىم كەلەدى»، – دەدى ديماش سۇحباتىندا.
ءانشى ءوز شابىتىن جانكۇيەرلەرىنەن الاتىنىن اتاپ ءوتتى. سونىمەن قاتار، ول حالىقارالىق مانسابىن باستاعان كەزىندە وزىنە ميسسيا جۇكتەگەنىن ايتتى.
ء«وزىمدى، ەلىمدى، مادەنيەتىمدى، حالقىمىزدىڭ داستۇرلەرىن الەمگە تانىتۋ – مەنىڭ نەگىزگى ماقساتىم. سول ميسسيا مەنى العا جەتەلەپ كەلەدى»، - دەدى ول.
ديماشتىڭ ايتۋىنشا، ءوز مادەنيەتىن مۋزىكاعا ەنگىزۋ ونىڭ شىعارماشىلىعىنىڭ باستى باعىتتارىنىڭ ءبىرى.
«مەنىڭ كوماندامداعى بارلىق مۇشەلەر دە وسى ارمانىما ورتاق جاندار. ءبىز ءۇشىن مادەنيەتتەر اراسىنداعى الماسۋ اسا ماڭىزدى»، – دەدى ءانشى.
سونداي-اق، ديماش بۇۇ اياسىندا ەلشى رەتىندە قىزمەت اتقارىپ جۇرگەنىن ايتتى. ول نەگىزگى ميسسياسى كوشى-قون اگەنتتىگىمەن بايلانىستى جۇمىستارعا ۇلەس قوسۋ ەكەنىن جەتكىزدى.
كەلەسى كونتسەرتتەر تۋرالى دا اقپارات بەرىلگەن. بىرنەشە اپتادان كەيىن ديماش ەگيپەتتە ونەر كورسەتەدى. ءانشى بۇل ساپارعا العاش رەت شىعاتىنىن جانە دەمالىپ، جاڭا تاجىريبە جينايتىنىن اتاپ ءوتتى.
TV Berlin ءتىلشىسى سونداي-اق گەرمانيا، پولشا، يتاليا جانە باسقا ەلدەردەن كەلگەن جانكۇيەرلەرمەن سۇحباتتاستى. ولار ديماشتىڭ ەرەكشە داۋىسى مەن دارا تالانتىن عانا ەمەس، جانكۇيەرلەردى ءبىر اسپان استىندا بىرىكتىرەتىن تۇلعا رەتىندەگى قاسيەتىن دە اتاپ ءوتتى.
