قازاقستاندىق ءانشى ديماش قۇدايبەرگەن الداعى الەمدىك تۋرنەسى اياسىندا 40-تان استام ەلدە ونەر كورسەتۋى مۇمكىن، دەپ حابارلايدى "ادىرنا" ءتىلشىسى.
بۇل تۋرالى ونەر يەسى Grammy ستۋدياسىنىڭ «Global Mixtape» جوباسىنىڭ العاشقى شىعارىلىمىندا ايتتى. جۋرناليست ۆالەري ليگە بەرگەن سۇحباتىندا ءانشى الداعى كونتسەرتتەرى، شىعارماشىلىق جوسپارلارى جانە جانكۇيەرلەرىمەن كەزدەسۋى تۋرالى ايتتى. سۇحبات بارىسىندا وڭتۇستىك امەريكا ەلدەرىنە جوسپارلانعان كونتسەرتتىك ساپار دا ءسوز بولدى. الەمدىك تۋرنە تۋرالى سۇراققا جاۋاپ بەرگەن ديماش ازىرگە ناقتى ەلدەردىڭ ءتىزىمىن جاريالاي المايتىنىن جەتكىزدى.
«ناقتى ايتا المايمىن، بىراق 20-دان استام ەل بولۋى مۇمكىن. بالكىم، 30-دان، ءتىپتى 40-تان دا اسىپ كەتەر. مەن مۇمكىندىگىنشە كوپ كونتسەرت بەرىپ، الەمنىڭ بارلىق ەلىن ارالاعىم كەلەدى. ويتكەنى جانكۇيەرلەرىممەن كەزدەسكەندى جاقسى كورەمىن»، – دەدى ءانشى.
سونىمەن قاتار ديماش نيۋ-يوركتەگى ايگىلى Madison Square Garden ارەناسىندا وتكەن كونتسەرتى تۋرالى دەرەكتى فيلم جارىققا شىعاتىنىن حابارلادى. ونىڭ ايتۋىنشا، تۋىندى الداعى ءبىر-ەكى اپتا ىشىندە YouTube ارناسىنا جاريالانۋى مۇمكىن.
ءانشى بۇل كونتسەرتتى ءوزى ءۇشىن عانا ەمەس، قازاقستان ءۇشىن دە ماڭىزدى وقيعا دەپ باعالادى.
