الەمگە تانىمال قازاقستاندىق ءانشى ديماش قۇدايبەرگەننىڭ لاتىن امەريكاسىنداعى كونتسەرتىنە بيلەتتەر رەكوردتىق ۋاقىتتا ساتىلىپ كەتتى، دەپ حابارلايدى "ادىرنا" ۇلتتىق پورتالى Zakon.kz-كە سىلتەپ.
ءانشىنىڭ ايتۋىنشا، مەكسيكاداعى العاشقى كونتسەرتىنە بيلەتتەر نەبارى 40 مينۋتتا ساتىلىپ بىتكەن. وسىعان بايلانىستى ۇيىمداستىرۋشىلار قوسىمشا كونتسەرت جاريالاعان، الايدا وعان ارنالعان بيلەتتەر دە بار بولعانى 8 مينۋتتا تۇگەل ساتىلعان.
«رەپەتيتسيا اياقتالدى. جارىق ءسوندى... جانە مەنىڭ سەزىنگەنىم – تەك شەكسىز ريزاشىلىق. ءبىرىنشى كونتسەرتتىڭ بيلەتتەرى 40 مينۋتتا ساتىلدى. ءبىز ەكىنشى كونتسەرت قوستىق – ول نەبارى 8 مينۋتتا ساتىلدى. مەكسيكا، سەن مەنىڭ ارمانىمنان دا اسىپ ءتۇستىڭ. بۇل تەك كونتسەرتتەر ەمەس... بۇل – جارىق پەن ماحابباتپەن جازىلعان ءبىزدىڭ ورتاق تاريحىمىز. ەنەرگيالارىڭىزعا، سەنىمدەرىڭىزگە جانە ادالدىقتارىڭىزعا العىس ايتامىن. راحمەت، مەكسيكا»، – دەپ جازدى ديماش Instagram پاراقشاسىندا.
ديماش قۇدايبەرگەننىڭ مەكسيكاداعى كونتسەرتى لاتىن امەريكاسىندا ۇلكەن قىزىعۋشىلىق تۋدىرىپ، تىڭدارمانداردىڭ ەرەكشە ىقىلاسىنا يە بولدى.
