ءچيليدىڭ ۆالديۆيا قالاسىندا الەمگە تانىمال ءانشى ديماش قۇدايبەرگەننىڭ شىعارماشىلىعىنا ارنالعان مادەني اكتسيا ۇيىمداستىرىلدى، دەپ حابارلايدى «ادىرنا» ءتىلشىسى Dimashnews.kz-كە سىلتەمە جاساپ.
اتالعان ءىس-شارا قالانىڭ نەگىزى قالانعان كۇنگە وراي جىل سايىن وتكىزىلەتىن، اۋقىمدى مادەني-مۋزىكالىق جانە قوعامدىق باعدارلامالارمەن قاتار جۇرەتىن ءداستۇرلى قالالىق فەستيۆال شەڭبەرىندە جۇزەگە اسىرىلعان. ال بيىلعى مەرەكەلىك شارادا 60 مىڭنان استام ادام قاتىسقان.
«باستاما ءچيليدىڭ ءار قالاسىنداعى ديماش جانكۇيەرلەرىنىڭ قولداۋىمەن جۇزەگە استى. ۆالديۆياعا كالاما، سانتياگو، ۆينيا-دەل-مار، كونسەپسون، چيليان، لوس-اندجەلەس جانە تەمۋكو قالالارىنان جينالعان Dears قاۋىمداستىعى وكىلدەرى ارنايى كەلدى. كەيبىرى مەرەكەگە قاتىسىپ، قازاقستاندىق ونەرپاز شىعارماشىلىعىن جاڭا تىڭدارمانعا تانىستىرۋ ءۇشىن 850 شاقىرىمعا جۋىق جول ءجۇرىپ ءوتتى»،- دەلىنگەن حابارلامادا.
قاتتى جاۋىنعا قاراماستان، جانكۇيەرلەر قالانىڭ جاعالاۋ بولىگىندە QR-كودى بار اقپاراتتىق ماتەريالدار تاراتىپ، اكتسيا قوناقتارىنا ديماشتىڭ اندەرىن تىڭداپ، شىعارماشىلىعىمەن جاقىنىراق تانىسۋعا مۇمكىندىك بەرگەن. مۋزىكالىق باعدارلاما قالالىق مەيرامحانالاردىڭ بىرىندە وتكەن. چيليلىك ءانشى Pablo Romero كەش بارىسىندا ديماش رەپەرتۋارىنداعى All by Myself, Mahabat Ber Magan, Adagio جانە S.O.S. كومپوزيتسيالارىن ورىنداعان.
كەش قوناقتارىنا ىشەكتى انسامبل دە ونەر كورسەتكەن. ساحنادا سكريپكادا Isaac Ulloa, ۆيولونچەلدە Samuel Carreño, فورتەپيانودا Roberto Sánchez ويناپ، Olimpico جانە The Love of Tired Swans شىعارمالارىنىڭ اسپاپتىق نۇسقالارىن ۇسىنعان.
