Chilidıŋ Valdiviia qalasynda älemge tanymal änşı Dimaş Qūdaibergennıŋ şyǧarmaşylyǧyna arnalǧan mädeni aksiia ūiymdastyryldy, dep habarlaidy «Adyrna» tılşısı Dimashnews.kz-ke sılteme jasap.
Atalǧan ıs-şara qalanyŋ negızı qalanǧan künge orai jyl saiyn ötkızıletın, auqymdy mädeni-muzykalyq jäne qoǧamdyq baǧdarlamalarmen qatar jüretın dästürlı qalalyq festival şeŋberınde jüzege asyrylǧan. Al biylǧy merekelık şarada 60 myŋnan astam adam qatysqan.
«Bastama Chilidıŋ är qalasyndaǧy Dimaş janküierlerınıŋ qoldauymen jüzege asty. Valdiviiaǧa Kalama, Santiago, Vinia-del-Mar, Konsepson, Chilian, Los-Andjeles jäne Temuko qalalarynan jinalǧan Dears qauymdastyǧy ökılderı arnaiy keldı. Keibırı merekege qatysyp, qazaqstandyq önerpaz şyǧarmaşylyǧyn jaŋa tyŋdarmanǧa tanystyru üşın 850 şaqyrymǧa juyq jol jürıp öttı»,- delıngen habarlamada.
Qatty jauynǧa qaramastan, janküierler qalanyŋ jaǧalau bölıgınde QR-kody bar aqparattyq materialdar taratyp, aksiia qonaqtaryna Dimaştyŋ änderın tyŋdap, şyǧarmaşylyǧymen jaqynyraq tanysuǧa mümkındık bergen. Muzykalyq baǧdarlama qalalyq meiramhanalardyŋ bırınde ötken. Chililık änşı Pablo Romero keş barysynda Dimaş repertuaryndaǧy All by Myself, Mahabat Ber Magan, Adagio jäne S.O.S. kompozisiialaryn oryndaǧan.
Keş qonaqtaryna ışektı ansambl de öner körsetken. Sahnada skripkada Isaac Ulloa, violonchelde Samuel Carreño, fortepianoda Roberto Sánchez oinap, Olimpico jäne The Love of Tired Swans şyǧarmalarynyŋ aspaptyq nūsqalaryn ūsynǧan.
