Bügın, 24 mamyr – Qazaqstannyŋ halyq ärtısı Dimaş Qūdaibergennıŋ tuǧan künı, dep habarlaidy «Adyrna» tılşısı.
Öner iesınıŋ tuǧan künıne orai onyŋ Qytaidaǧy janküierlerı bırqatar qaiyrymdylyq aksiiasyn ötkızgen. Atap aitsaq, qytailyq Dears janküierler toby änşınıŋ gumanitarlyq qyzmetın qoldau maqsatynda Halyqaralyq köşı-qon ūiymy qoryna 2000 AQŞ dollarynan astam kölemde qaiyrymdylyq qarjy audarǧan. Sonymen qatar Dimaştyŋ 32 jasqa toluyna orai RHR Shanghai Adoption Home qaŋǧybas mysyqtar men itterge arnalǧan 26 760 iuan (şamamen 3950 AQŞ dollary) kölemınde kömek körsetken.
Būǧan deiın “Phoenix Twitter Dears” halyqaralyq fan-kluby Almatydaǧy onkologiialyq auruǧa şaldyqqan balalarǧa arnalǧan hospiske qoldau körsetken edı.
Aita keteiık, Dimaş Qūdaibergen 1994 jyly Aqtöbe qalasynda Mädeniet qairatkerlerı Qanat Qūdaibergenūly men Svetlana Aitbaevanyŋ otbasynda düniege kelgen. Eŋ alǧaş ret spektaklde oinauymen tanyla bastaǧan. Bes jasynda muzykalyq kolledj sahnasynda alǧaş änşı retınde än salǧan. Alty jasynda “Ainalaiyn” Respublikalyq baiqauynyŋ “Fortepiano” nominasiiasynda jeŋımpaz atanǧan.
2010 jyly «Baiqonyrdyŋ äsem dauystary» halyqaralyq festivalınıŋ I jülde laureaty atanǧan. 2012 jyly respublikalyq «Jas Qanat» jas än oryndauşylar baiqauynyŋ Gran-pri jüldesıne ie bolǧan. 2012 jyly «Vostochnyi bazar» halyqaralyq baiqauynda I oryn alǧan. Bır jyldan soŋ «Meikin Aziia» I halyqaralyq festivalınıŋ jeŋımpazy atanǧan. 2014 jyly Aqtöbe qalasynda A.Jūbanov atyndaǧy Muzykalyq kolledjınde “akademiialyq än oryndau” fakultetın bıtırıp, Qazaq Ūlttyq öner universitetınıŋ “estrada önerı” fakultetıne tüsken. Naǧyz tanymaldyq Vitebsk qalasynda XXIV Halyqaralyq estradalyq än oryndauşylar «Slavian bazary-2015» baiqauynda Gran-pri jeŋıp alǧan soŋ kelgen. Ekı kün ışınde jas änşı 175 ūpai jinaǧan. 2017 jyly Dimaş Qūdaibergen Qytaidaǧy "Singer 2017" jobasynda ekınşı oryn alǧan.
