بۇگىن، 24 مامىر – قازاقستاننىڭ حالىق ءارتىسى ديماش قۇدايبەرگەننىڭ تۋعان كۇنى، دەپ حابارلايدى «ادىرنا» ءتىلشىسى.
ونەر يەسىنىڭ تۋعان كۇنىنە وراي ونىڭ قىتايداعى جانكۇيەرلەرى بىرقاتار قايىرىمدىلىق اكتسياسىن وتكىزگەن. اتاپ ايتساق، قىتايلىق Dears جانكۇيەرلەر توبى ءانشىنىڭ گۋمانيتارلىق قىزمەتىن قولداۋ ماقساتىندا حالىقارالىق كوشى-قون ۇيىمى قورىنا 2000 اقش دوللارىنان استام كولەمدە قايىرىمدىلىق قارجى اۋدارعان. سونىمەن قاتار ديماشتىڭ 32 جاسقا تولۋىنا وراي RHR Shanghai Adoption Home قاڭعىباس مىسىقتار مەن يتتەرگە ارنالعان 26 760 يۋان (شامامەن 3950 اقش دوللارى) كولەمىندە كومەك كورسەتكەن.
بۇعان دەيىن “Phoenix Twitter Dears” حالىقارالىق فان-كلۋبى الماتىداعى ونكولوگيالىق اۋرۋعا شالدىققان بالالارعا ارنالعان حوسپيسكە قولداۋ كورسەتكەن ەدى.
ايتا كەتەيىك، ديماش قۇدايبەرگەن 1994 جىلى اقتوبە قالاسىندا مادەنيەت قايراتكەرلەرى قانات قۇدايبەرگەنۇلى مەن سۆەتلانا ايتباەۆانىڭ وتباسىندا دۇنيەگە كەلگەن. ەڭ العاش رەت سپەكتاكلدە ويناۋىمەن تانىلا باستاعان. بەس جاسىندا مۋزىكالىق كوللەدج ساحناسىندا العاش ءانشى رەتىندە ءان سالعان. التى جاسىندا “اينالايىن” رەسپۋبليكالىق بايقاۋىنىڭ “فورتەپيانو” نوميناتسياسىندا جەڭىمپاز اتانعان.
2010 جىلى «بايقونىردىڭ اسەم داۋىستارى» حالىقارالىق فەستيۆالىنىڭ ءى جۇلدە لاۋرەاتى اتانعان. 2012 جىلى رەسپۋبليكالىق «جاس قانات» جاس ءان ورىنداۋشىلار بايقاۋىنىڭ گران-پري جۇلدەسىنە يە بولعان. 2012 جىلى «ۆوستوچنىي بازار» حالىقارالىق بايقاۋىندا ءى ورىن العان. ءبىر جىلدان سوڭ «مەيكين ازيا» ءى حالىقارالىق فەستيۆالىنىڭ جەڭىمپازى اتانعان. 2014 جىلى اقتوبە قالاسىندا ا.جۇبانوۆ اتىنداعى مۋزىكالىق كوللەدجىندە “اكادەميالىق ءان ورىنداۋ” فاكۋلتەتىن ءبىتىرىپ، قازاق ۇلتتىق ونەر ۋنيۆەرسيتەتىنىڭ “ەسترادا ونەرى” فاكۋلتەتىنە تۇسكەن. ناعىز تانىمالدىق ۆيتەبسك قالاسىندا XXIV حالىقارالىق ەسترادالىق ءان ورىنداۋشىلار «سلاۆيان بازارى-2015» بايقاۋىندا گران-پري جەڭىپ العان سوڭ كەلگەن. ەكى كۇن ىشىندە جاس ءانشى 175 ۇپاي جيناعان. 2017 جىلى ديماش قۇدايبەرگەن قىتايداعى "Singer 2017" جوباسىندا ەكىنشى ورىن العان.
