بۇگىن – حالىق ءارتىسى، تەاتر جانە كينو اكتەرى ىدىرىس نوعايباەۆتىڭ تۋعانىنا 95 جىل. ول قازاق ساحنا ونەرىنىڭ دامۋىنا زور ۇلەس قوسقان كورنەكتى ونەر قايراتكەرى، تەرەڭ پسيحولوگيالىق وبرازدارىمەن ەرەكشەلەنگەن اكتەر.
ىدىرىس نوعايباەۆ 1931 جىلى 15 مامىردا الماتى وبلىسى تالعار قالاسىندا دۇنيەگە كەلگەن. جاستايىنان ۇلتتىق ونەرگە جاقىن ءوسىپ، 15 جاسىندا الماتى كوركەمونەر ۋچيليششەسىنە وقۋعا تۇسەدى. كەيىن 1950-جىلداردىڭ باسىندا ماسكەۋدەگى ا.ۆ.لۋناچارسكي اتىنداعى تەاتر ونەرى ينستيتۋتىندا ءبىلىم الادى. ونىڭ ۇستازى – پروفەسسور ي.م.راەۆسكي.
1954 جىلدان باستاپ م.اۋەزوۆ اتىنداعى قازاق مەملەكەتتىك دراما تەاترىنىڭ قۇرامىندا قىزمەت ەتىپ، كاسىبي اكتەرلىك جولىن باستايدى. ساحناداعى العاشقى رولدەرىنىڭ ءبىرى – نازىم حيكمەتتىڭ «فارحات-شىرىن» سپەكتاكلىندەگى فارحات بەينەسى.
ىدىرىس نوعايباەۆ ساحنادا كۇردەلى مىنەزدى، تەرەڭ پسيحولوگيالىق كەيىپكەرلەردى سومداۋمەن تانىلدى. ونىڭ رەپەرتۋارىندا قازاق جانە الەم كلاسسيكاسىنىڭ ءىرى تۋىندىلارى بار. اتاپ ايتقاندا:
- «ايمان-شولپان» – كوتىبار
- «ەڭلىك–كەبەك» – ەسەن
- «قاراقىپشاق قوبىلاندى» – قوبىلاندى
- «اباي» – اباي
- «قان مەن تەر» – قالەن
- «قوزى كورپەش – بايان سۇلۋ» – قاراباي
- شەكسپير شىعارمالارى – وتەللو، پەترۋچچيو
اكتەر م. گوركي شىعارمالارىنداعى كەيىپكەرلەردى سومداۋ ارقىلى دا ەرەكشە تانىلدى. ونىڭ شىعارماشىلىعىندا الەۋمەتتىك-پسيحولوگيالىق تەرەڭدىك، ادام جانىنىڭ كۇردەلى يىرىمدەرىن اشۋ باستى ورىن الدى.
1955 جىلدان باستاپ ىدىرىس نوعايباەۆ كينو سالاسىندا دا جەمىستى ەڭبەك ەتتى. ول ۇلتتىق كينونىڭ دامۋىنا ەلەۋلى ۇلەس قوستى. تانىمال فيلمدەردەگى رولدەرى:
- «مازاسىز كوكتەم» – ىدىرىس
- «بوتاكوز» – امانتاي
- ء«ومىر جولىندا» – وسپان
- «اسۋدا» – دانيار
- «العاشقى مۇعالىم» – نارماعانبەت
- «قىز جىبەك» – سىرلىباي
1970 جىلدان باستاپ الماتى مەملەكەتتىك ونەر ينستيتۋتىندا (قازىرگى قازاق ۇلتتىق ونەر ۋنيۆەرسيتەتى) جانە رەسپۋبليكالىق ەسترادا ستۋدياسىندا ۇستازدىق ەتتى. بىرنەشە بۋىن جاس اكتەرلەردى تاربيەلەدى.
ول حالىقارالىق دەڭگەيدە دە ونەر كورسەتىپ، ماسكەۋ، قازان، ۋفا، نۇكىس جانە يراننىڭ شيراز قالاسىندا گاسترولدىك ساپارلاردا بولعان.
ىدىرىس نوعايباەۆ – كسرو مەملەكەتتىك سىيلىعىنىڭ لاۋرەاتى (1974), «قۇرمەت بەلگىسى» وردەنىنىڭ يەگەرى، قازاق تەاتر ونەرىنىڭ التىن قورىنا ەنگەن تۇلعا.
