پرەزيدەنت استانالىق كەمەل ءجۇسىپوۆ ەسىمدى وقۋشىعا قولتاڭباسى مەن تىلەگىن جازىپ، كىتاپ سىيلادى، دەپ حابارلايدى "ادىرنا" ۇلتتىق پورتالى.
بۇل تۋرالى وقۋشى كەمەل ءجۇسىپوۆ ءوزىنىڭ Instagram پاراقشاسىندا ايتىپ، قۋانىشىمەن ءبولىستى. ول ءوز تۋعان كۇنىندە پرەزيدەنتكە حات جازعان ەكەن.
"قۇرمەتتى قاسىم-جومارت كەمەلۇلى، مەنىڭ اتىم ءسىزدىڭ اكەڭىزدىڭ اتىنداي - كەمەل. بۇگىن مەنىڭ تۋعان كۇنىم جانە وسىدان تۋرا 12 جىل بۇرىن اتا-انام ماعان وسى ەسىمدى قويعان. مەن استانادا تۇرامىن. قازاقستان تاريحىن، دۇنيەجۇزى تاريحىن جانە گەوگرافيانى جاقسى كورىپ، وقيمىن. ءارتۇرلى ەلدىڭ بانكنوتتارى مەن تيىندارىن جيناعاندى ۇناتامىن. ساياحاتتاۋدى جاقسى كورەمىن، بۇگىندە الەمنىڭ ءتورت ەلىندە بولدىم. مەن بۇكىل الەمدى ارالاۋدى ارماندايمىن. مەنىڭ ءاربىر ساپارىم جاڭا تانىستىققا تولى. ءسىزدى كورىپ، سويلەسىپ، قولتاڭباڭىزبەن "اكە تۋرالى وي-تولعاۋىڭىزدى" سىيلىق رەتىندە الۋدى ارماندايمىن. ءسىز مەنىڭ حاتىمدى وقيدى جانە ارمانىم ورىندالادى دەپ سەنەمىن", – دەپ جازعان ءجاسوسپىرىم.
بالانىڭ ايتۋىنشا، 21 جەلتوقساندا ونىڭ ارمانى ورىندالعان. كەمەل اناسىمەن بىرگە پرەزيدەنت اكىمشىلىگىنە شاقىرىلىپ، پرەزيدەنتتىڭ تىلەگى جازىلعان كىتاپتى سىيلىققا الدى.
"اكە تۋرالى وي-تولعاۋ" كىتابىنا مەملەكەت باسشىسى:
"كەمەل جۇسىپوۆكە ومىردە اق جول تىلەيمىز! ازامات بول!", - دەپ جازعان قاسىم-جومارت توقاەۆ.
سىيلىق ءۇشىن ەل پرەزيدەنتىنە العىسىن بىلدىرگەن كەمەل:
"پرەزيدەنت مەنىڭ حاتىمدى وقىدى. ماعان سىيلىق رەتىندە قاسىم-جومارت كەمەلۇلى توقاەۆتىڭ قولتاڭباسى مەن تىلەگى جازىلعان كىتاپ بەردى. مەنىڭ ارمانىم ورىندالدى، مەن وعان ءالى دە سەنبەيمىن. سىزگە كوپ راقمەت", - دەپ جازدى ول.
