ەلىمىزدە شىلدە ايىنىڭ العاشقى جەكسەنبىسىندە اتالىپ وتەتىن ۇلتتىق دومبىرا كۇنىنە وراي استانا قالاسىندا اۋقىمدى رەسپۋبليكالىق چەللەندج باستاۋ الدى، دەپ حابارلايدى ەلوردا اكىمدىگىنىڭ رەسمي سايتى.
استانا قالاسى ءبىلىم باسقارماسىنىڭ ادىستەمەلىك ورتالىعىنىڭ ۇيىمداستىرۋىمەن وتكەن «ناعىز قازاق – قازاق ەمەس، ناعىز قازاق – دومبىرا!» اتتى رەسپۋبليكالىق چەللەندجگە مۋزىكا ءپانى مۇعالىمدەرى مەن وقۋشىلار بەلسەندى قاتىسىپ، ۇلتتىق ونەردى ۇلىقتاۋعا ءوز ۇلەستەرىن قوستى.
ەلوردا بويىنشا چەللەندجگە 10 مىڭعا جۋىق وقۋشى قاتىستى. ولار مۋزىكا ءپانى مۇعالىمدەرىنىڭ جەتەكشىلىگىمەن استانانىڭ كورىكتى ورىندارىندا، مادەني نىساندارىندا جانە قوعامدىق كەڭىستىكتەرىندە كۇي ورىندادى.
باستامانىڭ نەگىزگى ماقساتى – وقۋشىلاردىڭ ونەرىن كوپشىلىككە تانىستىرۋ، ءبىر-ءبىرىنىڭ ورىنداۋىن قولداۋ جانە ەلىمىزدىڭ وزگە وڭىرلەرىندەگى قۇرداستارىن رەسپۋبليكالىق چەللەندجگە قوسىلۋعا شاقىرۋ.
وسىلايشا، ەلوردالىق وقۋشىلار ۇلتتىق ونەردى ۇلىقتاي وتىرىپ، دومبىرانىڭ ءۇنىن بۇكىل رەسپۋبليكاعا ناسيحاتتايتىن مادەني ەستافەتانى باستادى.
چەللەندجدى العاشقىلاردىڭ ءبىرى بولىپ الماتى، شىمكەنت قالالارىنىڭ، تۇركىستان مەن باتىس قازاقستان وبلىستارىنىڭ ءبىلىم بەرۋ ۇيىمدارى قابىلداپ، ۇلتتىق ونەردى ناسيحاتتاۋ ىسىنە بەلسەندى اتسالىستى.
دومبىرانىڭ كۇمبىرلەگەن ءۇنى ارقىلى قاتىسۋشىلار حالقىمىزدىڭ باي مادەني مۇراسىن دارىپتەپ، ۇلتتىق قۇندىلىقتاردى كەڭىنەن ناسيحاتتاۋدا.
بۇل باستاما ۇلتتىق ونەردىڭ ۇرپاقتان ۇرپاققا جالعاسۋىنا، جاستاردىڭ دومبىراعا دەگەن قىزىعۋشىلىعىنىڭ ارتۋىنا جانە ءتول مادەنيەتىمىزدىڭ كەڭىنەن دارىپتەلۋىنە زور سەرپىن بەرىپ وتىر. اسىرەسە، ءبىلىم بەرۋ ۇيىمدارىنىڭ ۇستازدارى مەن وقۋشىلارىنىڭ بەلسەندىلىگى ۇلتتىق تاربيەنى نىعايتىپ، وسكەلەڭ ۇرپاقتىڭ بويىندا وتانسۇيگىشتىك پەن رۋحاني قۇندىلىقتارعا دەگەن قۇرمەتتى قالىپتاستىرۋعا ىقپال ەتۋدە.
