Prezıdent astanalyq Kemel Júsipov esimdi oqýshyǵa qoltańbasy men tilegin jazyp, kitap syılady, dep habarlaıdy "Adyrna" ulttyq portaly.
Bul týraly oqýshy Kemel Júsipov óziniń Instagram paraqshasynda aıtyp, qýanyshymen bólisti. Ol óz týǵan kúninde Prezıdentke hat jazǵan eken.
"Qurmetti Qasym-Jomart Kemeluly, meniń atym sizdiń ákeńizdiń atyndaı - Kemel. Búgin meniń týǵan kúnim jáne osydan týra 12 jyl buryn ata-anam maǵan osy esimdi qoıǵan. Men Astanada turamyn. Qazaqstan tarıhyn, dúnıejúzi tarıhyn jáne geografııany jaqsy kórip, oqımyn. Ártúrli eldiń banknottary men tıyndaryn jınaǵandy unatamyn. Saıahattaýdy jaqsy kóremin, búginde álemniń tórt elinde boldym. Men búkil álemdi aralaýdy armandaımyn. Meniń árbir saparym jańa tanystyqqa toly. Sizdi kórip, sóılesip, qoltańbańyzben "Áke týraly oı-tolǵaýyńyzdy" syılyq retinde alýdy armandaımyn. Siz meniń hatymdy oqıdy jáne armanym oryndalady dep senemin", – dep jazǵan jasóspirim.
Balanyń aıtýynsha, 21 jeltoqsanda onyń armany oryndalǵan. Kemel anasymen birge prezıdent ákimshiligine shaqyrylyp, Prezıdenttiń tilegi jazylǵan kitapty syılyqqa aldy.
"Áke týraly oı-tolǵaý" kitabyna memleket basshysy:
"Kemel Júsipovke ómirde aq jol tileımiz! Azamat bol!", - dep jazǵan Qasym-Jomart Toqaev.
Syılyq úshin el prezıdentine alǵysyn bildirgen Kemel:
"Prezıdent meniń hatymdy oqydy. Maǵan syılyq retinde Qasym-Jomart Kemeluly Toqaevtyń qoltańbasy men tilegi jazylǵan kitap berdi. Meniń armanym oryndaldy, men oǵan áli de senbeımin. Sizge kóp raqmet", - dep jazdy ol.
