مەملەكەت باسشىسى قاسىم-جومارت كەمەلۇلى توقاەۆتىڭ 2025 جىلدى «جۇمىسشى ماماندىقتار جىلى» دەپ جاريالاۋىنا وراي باتىس قازاقستان وبلىسىندا «ەڭبەك. ادام. قۇرمەت» اتتى فەستيۆال ءوتتى.
بۇل ايتۋلى شارانىڭ باستى ماقساتى – ەل دامۋىنا ولشەۋسىز ۇلەس قوسىپ جۇرگەن قاراپايىم ەڭبەك ادامدارىنىڭ ەڭبەگىن باعالاۋ، ولارعا قۇرمەت كورسەتۋ جانە جاس ۇرپاققا ۇلگى ەتۋ.
فەستيۆالگە ءار سالادا تەر توگىپ جۇرگەن ەڭبەك ادامدارى قاتىستى. ءىس-شارا بارىسىندا ەڭبەك ادامدارىنىڭ ءومىر جولى، كاسىبي جەتىستىكتەرى مەن ەڭبەككە دەگەن ادال كوزقاراستارى ناسيحاتتالدى. قاتىسۋشىلار ءوز تاجىريبەلەرىمەن ءبولىسىپ، تاڭداعان ماماندىعىنا دەگەن ماقتانىشىن ءبىلدىردى.
وبلىس اكىمى ناريمان تورەعاليەۆ ءوز سوزىندە مەملەكەت باسشىسىنىڭ:
«ەڭبەك ادامىنا قۇرمەت كورسەتۋ – مەملەكەتتىك ساياساتتىڭ باستى باعىتىنىڭ ءبىرى. ءبىز ادال ەڭبەكتى ءاردايىم جوعارى باعالايمىز»، – دەگەن ءسوزىن اتاپ ءوتىپ، بۇگىنگى قوعامدا كوزگە كورىنبەي، بىراق ەلدىڭ دامۋىنا ەلەۋلى ۇلەس قوسىپ جۇرگەن جانداردىڭ ەڭبەگىن جوعارى باعالاۋ قاجەتتىگىن ايتتى.
– «شىن مانىندە، ەل مۇددەسى جولىندا ايانباي تەر توگىپ، كاسىبىنە ادالدىقپەن قاراپ، ۋاقىتپەن ساناسپاي ەڭبەك ەتىپ جۇرگەن ازاماتتار – بۇگىنگى قوعامنىڭ ايناسى»، – دەدى ءوڭىر باسشىسى.
شارا اياسىندا ءوز كاسىبىن دوڭگەلەتىپ وتىرعان كاسىپكەرلەر مەن ءتۇرلى سالا ماماندارى ءوز جۇمىستارى تۋرالى بايانداپ، “جۇمىسشى ماماندىقتارى” جىلىنىڭ ءمان-ماڭىزىنا ەرەكشە توقتالدى.
اۋداندىق ءماسليحاتتىڭ دەپۋتاتى، اۋداندىق ىسكەر ايەلدەر كەڭەسىنىڭ ءتورايىمى لياززات سەيتكەرەەۆا ءوز سوزىندە ءتورت جىل بۇرىن ىسكە قوسىلعان ءجۇن وڭدەۋ تسەحىنىڭ جۇمىسىمەن تانىستىردى. بۇگىندە بۇل ءوندىرىس وشاعىندا بۇعان دەيىن جۇمىسسىز جۇرگەن اۋىل ايەلدەرى ەڭبەك ەتۋدە. ولار حالىقارالىق ء“بىر اۋىل – ءبىر ءونىم” جوباسى اياسىندا جۇننەن تاپىشكە، كيىز ەتىك، كىلەمشەلەر مەن جۇمساق ويىنشىقتار سەكىلدى ءتۇرلى ونىمدەر شىعارىپ جاتىر.
-“2025 جىلدىڭ “جۇمىسشى ماماندىقتار جىلى” دەپ جاريالانۋى — ەلدىڭ نەگىزگى قوزعاۋشى كۇشى سانالاتىن ەڭبەك ادامدارىنا كورسەتىلگەن ۇلكەن قۇرمەت. بۇل — تەك اتاۋلى جىل ەمەس، ناقتى ءىس پەن ناقتى قولداۋدىڭ جىلى.
بۇگىنگى شارا — ەڭبەك ادامىن دارىپتەۋدىڭ، ولاردى كورىپ، تانۋدىڭ جارقىن ۇلگىسى. قاراپايىم ەڭبەك يەلەرىنىڭ ءومىرى مەن تابىسى جاستارعا ۇلكەن موتيۆاتسيا. وسىنداي شارالار جىل سايىن جالعاسىپ، جۇمىسشى ماماندىقتارىنىڭ بەدەلى ودان ءارى ارتا تۇسسە ەكەن دەپ تىلەيمىن!”،-دەدى لياززات سەيتكەرەەۆا.
ورال ترانسفورماتور زاۋىتىنىڭ شەبەرى لياززات ءجۇمادىلدا جاس مامانداردى دايارلاۋ جايىن بايانداپ، نازىك جاندىلاردىڭ دا وندىرىستە تابىستى ەڭبەك ەتىپ جاتقانىن ايتتى. ول كۇن سايىن كاتۋشكا ىشىنە قاجەتتى بولشەكتەر ورناتادى. كوزگە قاراپايىم كورىنگەنىمەن، ءدال سول بولشەك بۇكىل مەحانيزمنىڭ جۇمىس ىستەۋىنە ىقپال ەتەدى.
حالىقتىڭ تۇرمىس ساپاسىن ارتتىرۋعا ۇلەس قوسىپ، اۋىلدىڭ الەۋمەتتىك-ەكونوميكالىق دامۋىنا وزىندىك جاڭاشىل يدەيالارىن ەنگىزۋگە نيەتتەنگەن شىڭعىرلاۋ اۋدانىنىڭ جەكە كاسىپكەرى سىرىم جولدىگۇلوۆ «اۋىل اماناتى» باعدارلاماسى اياسىندا نەسيە الىپ، الدىمەن شاعىن ناۋبايحانا اشتى. كاسىبىن دوڭگەلەتكەن كاسىپكەر قازىر وڭىردە تەڭدەسى جوق كاسىبي قولعاپتار ءوندىرىسىن دامىتىپ، كاسىپورنىن شاعىن تسەحتان ءوندىرىس ورنىنا دەيىن جەتىلدىرگەن.
ال كوپبالالى انا سامال ايتقۇلوۆا 2022 جىلى «تابيعي سۇتتەن ىرىمشىك ءوندىرۋ» جوباسى بويىنشا مەملەكەتتىك قايتارىمسىز گرانت يەگەرى اتانىپ، ورال قالاسىندا ءوز ءونىمىن شىعارىپ، ساتۋمەن اينالىسۋدا. قازىر ونىڭ تسەحى بار، ەكى ساتۋشىسى مەن ءبىر كومەكشىسى جۇمىس ىستەيدى — ياعني، سامال ءوز وتباسىمەن بىرگە تاعى ءۇش ادامدى جۇمىسپەن قامتىپ وتىر.
ءبىر كەزدەرى جۇمىس ىزدەگەن جان بۇگىنگى تاڭدا وزگەلەرگە جۇمىس بەرىپ، ارمانداعان كاسىپپەن لايىقتى ءومىر سۇرۋدە.
جيىن بارىسىندا اۋداننان كەلگەن وكىلدەر “اۋىل اماناتى” باعدارلاماسى اياسىندا ءوز وڭىرلەرىندە اتقارىلىپ جاتقان جۇمىستار مەن مەملەكەتتىك قولداۋدىڭ ناتيجەلەرى جونىندە ءبولىستى.
فەستيۆال اياسىندا الاڭدا كەڭ كولەمدى جارمەڭكەلەر ۇيىمداستىرىلدى. وندا “اۋىل اماناتى” باعدارلاماسىنىڭ قاتىسۋشىلارى مەن مەملەكەتتىك گرانت يەگەرلەرى ءوز ونىمدەرىن ۇسىندى. جۇمىس ىزدەۋشىلەر ءۇشىن 80-نەن استام جۇمىس بەرۋشى 500-دەن استام بوس جۇمىس ورىندار جارمەڭكەسى ءوتتى.
شارا بارىسىندا قاتىسۋشىلار ۇلتتىق ويىندار مەن ءتۇرلى بايقاۋلارعا قاتىسۋعا مۇمكىندىك الدى. الاڭنىڭ ورتاسىندا تىگىلگەن كيىز ۇيلەردە وبلىستىڭ بارلىق اۋداندارىنان كەلگەن ءتۇرلى جۇمىسشى ماماندىق يەلەرى ءوز كاسىپتەرىن تانىستىردى. ال اۋقىمدى شارانى قولونەر مەن شەبەرلىك تۋىندىلارىنىڭ كورمەسى ەرەكشە ارلەندىرىپ، كورەرمەندەردى ءتانتى ەتتى.
