سيريادان قايتارىلعان قازاقستاندىق تەرروريستىك ۇيىم مۇشەلەرىنىڭ ءبارى ولگەن ادامدارمەن فوتو مەن ۆيدەوعا تۇسەتىنىن ايتادى.
استاناداعى سوتتا يگيل*-دىڭ قۇرامىندا بولعان 14 قازاقستاندىقتىڭ ءىسى قارالىپ جاتىر. 33 جاستاعى سوتتالۋشى امانجول جانسەڭگىروۆ ءبىرىنشى بولىپ جاۋاپ بەردى. ول پروكۋروردىڭ دايەكتەرىنە جاۋاپ بەردى، دەپ حابارلايدى Sputnik قازاقستان تىلشىسى.
تۇسكە دەيىنگى وتىرىستا پروكۋرور ەدىل مۇرات سوتتالۋشىلاردىڭ سيرياداعى ارەكەتتەرى جايىندا ايتا كەلە، قارۋلى قاقتىعىستان كەيىنگى ءبىر جاعدايدى مىسالعا كەلتىردى. يگيل* تەرروريستىك ۇيىمىنىڭ مۇشەلەرى جەڭىلىسكە ۇشىراعان ءتورت ادامنىڭ باسىن كەسىپ تاستاپ، قالا كوشەلەرىنىڭ بىرىنە جۇرت ۇرەيىن تۋدىرۋ ماقساتىندا جەتى تاۋلىككە تاستاپ كەتكەن.
"تەرروريستىك توپ مۇشەسى جانسەڭگىروۆ وسى باستاردىڭ جانىندا تۇرىپ، ونىڭ ءبىرىن اياعىمەن باسىپ، قولىنا اتىس قارۋىن ۇستاپ تۇرىپ، سۋرەتكە تۇسكەن. ول سۋرەت عالامتور ارقىلى كوپشىلىككە تاراپ كەتكەن", - دەدى پروكۋرور.
تۇستەن كەيىنگى وتىرىستا امانجول جانسەڭگىروۆ ءوز ارەكەتىن ءتۇسىندىردى. ونىڭ سوزىنە قاراعاندا، تەرروريستىك توپتىڭ سەركەلەرى جاڭا مۇشەلەردى ادەيى ۆيدەو مەن فوتوعا ءتۇسىرىپ وتىرعان. ءسويتىپ، ءوز ەلىنە قايتپاسىن دەپ، عالامتورعا جۇكتەپ ءجۇردى. ال ۆيدەو مەن فوتوعا تۇسۋدەن باس تارتاتىنداردى بىردەن "تىڭشى" دەپ، اتۋ جازاسىنا كەسكەن. كوبىسى ءوز بالالارى مەن ايەلدەرى ءۇشىن قورىققان. سول سەبەپتى فوتو-ۆيدەوعا تۇسۋگە ءماجبۇر بولدى.
"سول كۇنگى قاقتىعىستان كەيىن كوپ ادام تۇرىپ، فوتوعا ءتۇسىپ جاتتى. كوپ ادام تۇرعاسىن، مەن دە باردىم. ول جەردىڭ مەنتاليتەتى سونداي، بارلىعى ولگەن ادامدارمەن فوتو مەن ۆيدەوعا تۇسەدى. مەنىڭ قاسىمدا اسكەري ءامىر ساد بولدى. ول ماعان ەندى بارىپ سەن ءتۇس دەدى. "نەگە؟" دەدىم. مەن سەنىڭ اسكەري ءامىرىڭمىن دەپ جاۋاپ بەردى. ايتقانىمدى تىڭدا، بار تۇر دەدى. مەن تۇردىم. سوسىن اياعىڭدى قوي دەدى. اياعىمدى قويدىم. قولىڭدى كوتەر دە، كۇل دەدى. بىراق مەن ول فوتونى ينتەرنەتكە سالعان ەمەسپىن. ولار ءوز تەلەفوندارىنا ءتۇسىردى، ارتىنان وشىرەمىز دەدى", - دەدى جانسەڭگىروۆ.
