پرەزيدەنت قاسىم-جومارت توقاەۆ ءوزىنىڭ كۇيەۋ بالاسى تەمىرتاي ءىزباستيندى قازاقستاننىڭ بولگارياداعى ەلشىسى ەتىپ تاعايىندادى.
"مەملەكەت باسشىسىنىڭ جارلىعىمەن تەمىرتاي رىمتايۇلى ءىزباستين قازاقستاننىڭ بولگارياداعى توتەنشە جانە وكىلەتتى ەلشىسى قىزمەتىنە تاعايىندالدى" دەلىنگەن جۇما، 1 قاراشادا جاريالانعان اقوردا حابارلاماسىندا.
اشىق دەرەككوزدەرىندەگى مالىمەتكە سايكەس، 61 جاستاعى تەمىرتاي ءىزباستين - قاسىم-جومارت توقاەۆتىڭ قارىنداسى قارلىعا ءىزباستينانىڭ كۇيەۋى. ول 2009 جىلى قازاقستاننىڭ بولگارياداعى ديپلوماتيالىق وكىلدىگىنىڭ جەتەكشىسى بولىپ تاعايىندالعان. ديپلوماتيا سالاسىندا 1994 جىلدان بەرى قىزمەت اتقارىپ كەلەدى. قازاقستاندىق باق 2013 جىلى توقاەۆتىڭ ۇلى تيمۋر جانە ءىزباستيننىڭ ۇلى مۇحامەد اتىراۋ وبلىسىندا شيكىزات يگەرۋمەن اينالىساتىن "ابي پەترولەۋم كەپيتال" مۇناي كومپانياسىنىڭ قۇرىلتايشىلارى ەكەنىن جازعان.
جۇما، 31 قازاندا قازاقستاننىڭ وزگە ەلدەردەگى ەلشىلەرىنىڭ دە اۋىسقانى بەلگىلى بولدى. قازاقستاننىڭ قىتايداعى جاڭا ەلشىسى بولىپ عابيت قويشىباەۆ بولىپ تاعايىندالدى. ول 2015 جىلدان بەرى وسى قىزمەتتى اتقارعان، قازان ايىندا سىرتقى ىستەر ءمينيسترىنىڭ ءبىرىنشى ورىنباسارى بولعان شاحرات نۇرىشەۆتىڭ ورنىن باسقان. قويشىباەۆ بۇعان دەيىن پرەزيدەنت اكىمشىلىگىنىڭ سىرتقى ساياسات جانە حالىقارالىق بايلانىس ءبولىمى جەتەكشىسىنىڭ ورىنباسارى بولعان.
47 جاستاعى قويشىباەۆ ءار جىلدارى قازاقستاننىڭ قىتايداعى ەلشىلىگىندە ءتۇرلى قىزمەت اتقارعان. ەلدە نارازىلىق ورشىگەن تۇستا قازاقستاننىڭ قىتايداعى ەلشىسى اۋىسىپ وتىر. قىركۇيەك ايىندا قازاقستاننىڭ بىرنەشە قالاسىندا "قىتاي ەكسپانسياسىنا" قارسى ميتينگىلەر ءوتتى. نارازىلار قىتايمەن قارىم-قاتىناستى شەكتەۋدى، قىتاي زاۋىتتارىن جابۋدى تالاپ ەتتى. ولار بۇعان قوسا، پەكيننىڭ شىڭجاڭدا از ۇلتتارعا جاساپ وتىرعان قىسىمىن ايىپتاپ، ەتنيكالىق قازاقتاردىڭ "قايتا ساياسي تاربيەلەۋ لاگەرلەرىنە" قامالۋىن سىنادى.
2018 جىلى بىرىككەن ۇلتتار ۇيىمى شىڭجاڭدا ميلليونعا جۋىق ەتنيكالىق ۇيعىر مەن وزگە دە تۇركىتىلدى ۇلت وكىلدەرىن قىتايدىڭ سولتۇستىك-باتىسىنداعى "ساياسي تاربيە لاگەرلەرىندە" ۇستاپ وتىرعانى تۋرالى مالىمدەگەن. باستاپقىدا مۇنداي اقپاراتتى تەرىستەگەن پەكين كەيىن ونى "ەكسترەميزمگە قارسى شارا" دەپ تۇسىندىرگەن جانە ساياسي لاگەرلەردى ء"تىل ۇيرەنىپ، كاسىپكە باۋليتىن" ورتالىقتار دەپ اتاعان. ال قاماۋدا بولعان تۇتقىندار بۇل ورىنداردىڭ تۇرمەگە ۇقسايتىنىن، وندا ازاپتاۋ مەن قىسىم بارىن ايتادى.
اقوردانىڭ حابارلاۋىنشا، قازاقستاننىڭ لاتۆياداعى ەلشىسى بولىپ تيمۋر پىرىمبەتوۆ تاعايىندالعان. ول ۆيكتور تەمىرباەۆتىڭ ورنىن باسقان.
"ازاتتىق" راديوسى
