Prezıdent Qasym-Jomart Toqaev óziniń kúıeý balasy Temirtaı Izbastındi Qazaqstannyń Bolgarııadaǵy elshisi etip taǵaıyndady.
"Memleket basshysynyń jarlyǵymen Temirtaı Rymtaıuly Izbastın Qazaqstannyń Bolgarııadaǵy tótenshe jáne ókiletti elshisi qyzmetine taǵaıyndaldy" delingen juma, 1 qarashada jarııalanǵan Aqorda habarlamasynda.
Ashyq derekkózderindegi málimetke sáıkes, 61 jastaǵy Temirtaı Izbastın - Qasym-Jomart Toqaevtyń qaryndasy Qarlyǵa Izbastınanyń kúıeýi. Ol 2009 jyly Qazaqstannyń Bolgarııadaǵy dıplomatııalyq ókildiginiń jetekshisi bolyp taǵaıyndalǵan. Dıplomatııa salasynda 1994 jyldan beri qyzmet atqaryp keledi. Qazaqstandyq BAQ 2013 jyly Toqaevtyń uly Tımýr jáne Izbastınniń uly Muhamed Atyraý oblysynda shıkizat ıgerýmen aınalysatyn "Abı Petroleým Kepıtal" munaı kompanııasynyń quryltaıshylary ekenin jazǵan.
Juma, 31 qazanda Qazaqstannyń ózge elderdegi elshileriniń de aýysqany belgili boldy. Qazaqstannyń Qytaıdaǵy jańa elshisi bolyp Ǵabıt Qoıshybaev bolyp taǵaıyndaldy. Ol 2015 jyldan beri osy qyzmetti atqarǵan, qazan aıynda syrtqy ister mınıstriniń birinshi orynbasary bolǵan Shahrat Nuryshevtiń ornyn basqan. Qoıshybaev buǵan deıin prezıdent ákimshiliginiń syrtqy saıasat jáne halyqaralyq baılanys bólimi jetekshisiniń orynbasary bolǵan.
47 jastaǵy Qoıshybaev ár jyldary Qazaqstannyń Qytaıdaǵy elshiliginde túrli qyzmet atqarǵan. Elde narazylyq órshigen tusta Qazaqstannyń Qytaıdaǵy elshisi aýysyp otyr. Qyrkúıek aıynda Qazaqstannyń birneshe qalasynda "Qytaı ekspansııasyna" qarsy mıtıngiler ótti. Narazylar Qytaımen qarym-qatynasty shekteýdi, Qytaı zaýyttaryn jabýdy talap etti. Olar buǵan qosa, Pekınniń Shyńjańda az ulttarǵa jasap otyrǵan qysymyn aıyptap, etnıkalyq qazaqtardyń "qaıta saıası tárbıeleý lagerlerine" qamalýyn synady.
2018 jyly Birikken Ulttar Uıymy Shyńjańda mıllıonǵa jýyq etnıkalyq uıǵyr men ózge de túrkitildi ult ókilderin Qytaıdyń soltústik-batysyndaǵy "saıası tárbıe lagerlerinde" ustap otyrǵany týraly málimdegen. Bastapqyda mundaı aqparatty teristegen Pekın keıin ony "ekstremızmge qarsy shara" dep túsindirgen jáne saıası lagerlerdi "til úırenip, kásipke baýlıtyn" ortalyqtar dep ataǵan. Al qamaýda bolǵan tutqyndar bul oryndardyń túrmege uqsaıtynyn, onda azaptaý men qysym baryn aıtady.
Aqordanyń habarlaýynsha, Qazaqstannyń Latvııadaǵy elshisi bolyp Tımýr Pirimbetov taǵaıyndalǵan. Ol Vıktor Temirbaevtyń ornyn basqan.
"Azattyq" radıosy
