ءسالافيزمنىڭ سالدارىنان تۋعان قىزىنان تىرىدەي ايىرىلعان وسكەمەندىك انامەن كەزدەستىك. ايتۋىنشا سالافيزم اعىمىن ۇستاناتىن ەر ادام قىزىنىڭ اۋىر كۇيزەلىستىك جاعدايدا جۇرگەن ءساتىن پايدالانىپ، وعان ينتەرنەتپەن تەرىس ءدىندى ۋاعىزداۋ ارقىلى كۇيەۋگە شىعۋعا كوندىرىپ، ۇيىنە كىرگىزىپ العان. قازىر قىزىمەن بايلانىسى مۇلدەم ۇزىلگەن. كۇيەۋى اناسىمەن كەزدەسۋىنە قاتاڭ تىيىم سالعان.
-بىزگە باستاپ بايانداپ بەرىڭىزشى. قىزىڭىز قانداي ەدى؟
اناسى: قىزىم اقىلدى، جايناپ تۇرعان قىز ەدى عوي. كوللەدجىن وقىتتىم، جيحاز دۇكەنىندە ساتۋشى بولىپ جۇمىس ىستەپ جۇرگەن. مەنى تىڭدايتىن، سىڭىلىسىنە قامقور، ۇنەمى جانىمدا بولاتىن... وعاش مىنەزىن كورگەن جوقپىن.
-قىزىڭىزدىڭ دىنگە قىزىعۋشىلىعى قالاي باستالدى؟
اناسى: ول قاتتى اۋىرىپ ءجۇردى. قانت ديابەتى اۋرۋىنا شالدىعىپ، ەكى بۇيرەگى جۇمىس ىستەمەي، دياليزدە ءجۇردى. ماما، مەن ولەمىن عوي،-دەپ ولىمنەن قاتتى قورىقتى. دارىگەرلەر دە ماعان سولاي ايتقان بولاتىن. قۇداي تۋرالى، و دۇنيە تۋرالى ءجيى ويلانا باستادى. سودان ءبىر كۇنى ۇزىن كيىنىپ، باسىنا ادەمى ورامال سالىپ، ناماز وقىپ ۇيرەنەمىن دەپ مەشىتكە كەتتى. جۇرەگىم قاتتى اۋىردى. قايتەدى ەندى، ءبىر اياعى كوردە، ءبىر اياعى جەردە تۇر عوي. ناماز وقىسا وقىسىن، كوڭىلى جۇبانىپ كۇيزەلىسىنەن ارىلار دەپ ويلادىم... ارتى بۇلاي بولارىن ءبىلدىم بە.....
-سوندا ءدىندى مەشىتتەن ۇيرەندى مە؟
اناسى: جوق، ول مەشىتكە سول جولى عانا باردى. ودان كەيىن ءدىندى ينتەرنەتتەن وقىپ ۇيرەنىپ ءجۇردى. ونىڭ نەنى وقىپ جۇرگەنىنە ءمان بەرمەدىم. سويتسەم قازىرگى تەرىس دىندەگى كۇيەۋىمەن دە سول ينتەرنەت ارقىلى تانىسىپتى.
-قىزىڭىزدىڭ تەرىس ءدىني اعىمدا ەكەنىن قالاي ءبىلدىڭىز؟
اناسى: ۇيدەن شىعىپ كەتىپ ءۇش كۇن جوعالدى. ماعان قوڭىراۋ شالىپ ءوزىنىڭ كۇيەۋگە تيگەنىن، شاريعات زاڭى بويىنشا ءۇش كۇن كۇيەۋىنىڭ قاسىندا قالاتىنىن ايتتى. مەن شوشىپ كەتتىم: «كۇيەۋگە شىققانىڭ قالاي، ەكى بۇيرەگىڭ جۇمىس ىستەمەي تۇرعاندا كۇيەۋى نەسى»،- دەپ ايقايلادىم...قىزىم كەشكە كەلىپ، ءبارىن تۇسىندىرەتىنىن ايتتى. كەشكە ۇيگە كەلدى. ەسىكتى اشسام باسىنان اياعىنا دەيىن قاپ-قارا بولىپ كيىنگەن، بەتىنە دە ماسكا كيىپ الىپتى. مەن سول جەردە ەسىمنەن تاندىم..... ەسىمدى جيسام باسىمدى سۇيەپ، قىزىم بەتىمە سۋ بۇركىپ وتىر ەكەن. «انداعى كيىمىڭدى شەش، جوعال كوزىمە كورىنبەي، قارا كيىمىڭدى شەشپەسەڭ ۇيگە كىرمە»،- دەپ ايقايلادىم... بار ويىم، قىزىما سولاي ايتسام، قايتادان ءوز كيىمىن كيىپ قايتىپ كەلەر دەپ ويلاعانمىن عوي..... قايدام، ءوز قىزىم ازعانا ۋاقىتتىڭ ىشىندە قاتتى وزگەرىپتى. الگى كۇيەۋىمەن تەلەفونمەن سويلەستى دە، ۇيدەن شىعىپ كەتىپ قالدى. قايتىپ ورالمادى.
-دەنساۋلىعى نە بولدى؟
اناسى: ارادا ءبىر اپتا وتكەندە قىزىم دەنەسى ءىسىنىپ، رەانيماتسيا بولىمىنە الىپ بارا جاتقانىن حابارلادى. جانۇشىرىپ اۋرۋحاناعا باردىم. بارسام سول قارا كيىمدەرى شاشىلىپ دالىزدە قالىپتى. كيىمدەرىنەن جاعىمسىز ءيىس شىعىپ تۇردى. اللادان قىزىمنىڭ اماندىعىن تىلەپ ءۇش كۇن اۋرۋحانانىڭ ەسىگىن كۇزەتتىم. دارىگەرلەر جانىن امان الىپ قالىپ، بۇيرەك اۋىستىرۋ كەرەكتىگىن ايتتى. استانا قالاسىنداعى عىلىمي ورتالىققا حابارلاسىپ وتا جاساۋعا كەلىستىك. ءوزىمنىڭ ءبىر بۇيرەگىمدى بەرەتىن بولدىم. قىزىما قارا كيىمدەرىڭدى استاناعا كيىپ بارماشى دەپ ءوتىندىم. ول مەنى حيدجاپ كيمەسەم وپەراتسياعا بارماي، وسىندا قالىپ ولەمىن دەپ قورقىتتى. نە كەرەك، ونىڭ ايتقاندارىنا ەرىكسىز كوندىم. نە كيسە دە ءتىرى جۇرسە ەكەن دەپ تىلەيدى ەكەنسىڭ. وپەراتسيا اياقتالىپ، ەكەۋمىز قاتار ەكى توسەكتە جاتتىق... سوندا قىزىم ماعان ايتتى: ماما، سەن بىلەسىڭ بە مەنىڭ ءدىنىم ەڭ تازا ءدىن. ەگەر سوعىس بولسا، ناماز وقىمايتىن اناڭدى دا، اعاڭدى دا ساتىپ كەتەتىن ءدىن،-دەدى. مەن ودان: «ەگەر اللا كۇيەۋىڭ مەن اناڭنىڭ جانىن قايسىسىن ءبىرىنشى الايىن دەپ سۇراسا، نە دەيسىڭ،-دەپ سۇرادىم. سوندا قىزىم شىمىرىكپەستەن: ارينە سەنىڭ جانىڭدى ءبىرىنشى ال دەپ ايتار ەدىم،-دەدى.... ءدال سول ساتتە مەن ودان سىرت اينالدىم. جۇرەگىم قاتتى اۋىرىپ، كوڭىلىم ابدەن قالدى.. «اتا-بابامىزدا بۇلايشا قارا جامىلۋ بولماعان. ساعان قارا جامىلدىرعان كۇيەۋىڭ، سەنى مەنەن ايىرعان مىنا كۇيەۋىڭ سەسپەي قاتسىن»،- دەپ قارعادىم. ول سول ساتتە: سەن ءبىزدى قارعادىڭ،-دەپ ۇزاق جىلادى- ماعان بۇل بۇيرەكتى سەن بەرگەن جوقسىڭ، بۇنى ماعان سەن ارقىلى اللاح بەرىپ تۇر»- دەدى. مەنىڭشە ولاردىڭ اللا تاعالاسى مۇلدەم باسقا... ءتۇسىنۋ قيىن ولاردى...
-نەگىزگى كيكىلجىڭگە سەبەپ تەك وسى قارا كيىم عانا ما؟ باسقا سەبەپ جوق پا؟
اناسى: ارينە تەرىس ءدىن. «سەن ناماز وقىمايسىڭ، سەنىمەن ارالاسۋعا بولمايدى»،- دەيدى ماعان. مەن وعان ەكى رەت ءومىر سىيلادىم عوي. ءومىر سىيلادىم دەپ تۇرعان جوقپىن، ءتىپتى قاجەت بولسا ەكى بۇيرەگىمدى بىردەي بەرۋگە دايىنمىن. مەن اناسىمىن عوي. تەرىس دىنگە كىرگىزگەن اناۋ كۇيەۋىن جەك كوردىم. اۋرۋ قىزىمنىڭ ونداي تەرىس ءدىندى ۇستانۋشى، بۇرىن سوتتالعان ادامعا كۇيەۋگە شىعۋىنا مۇلدەم قارسى بولدىم. ماعان بازاردان ەت ساتىپ اكەلىپ حارام تاماق جەپ وتىرسىڭ دەپ مەنىمەن بىرگە ءبىر داستارحاندا وتىرىپ تاماق ىشۋدەن باس تارتتى. ناماز وقىماعان ادام سويعان مالدىڭ ەتى حارام دەدى...ناماز وقىمايتىن اداممەن ارالاسۋ كۇنا بولادى دەدى...تەلەۆيزور كورمە، مۋزىكا تىڭداما... نە دەگەن ءدىن بۇل سوندا؟
-كۇيەۋ بالاڭىزبەن ءتىل تابىسىپ، ولاردى دا ءتۇسىنىپ كورۋگە تىرىسپادىڭىز با؟
اناسى: تىرىستىم. قىزىما رەنجىسەم دە ونى ءبىر كورۋ ءۇشىن بارىنە دايىن بولدىم. شەمونايحا قالاسىنا قىزىمدى ىزدەپ تۇرىپ جاتقان ۇيلەرىنە 2-3 رەت باردىم. اۋلاسىن بيىك ەتىپ قورشاپ تاستاعان. قاقپانىڭ ەسىگىن اشپاي قويدى. «قىزىم، مەنى كەشىرىڭدەرشى، مەن سەندەردى جاقسى كورەمىن. سەنى تىم بولماسا اندا-ساندا ءبىر كورىپ تۇرايىنشى. كۇيەۋىڭدى ەرتىپ تۋعان ۇيىڭە كەلىپ تۇرشى،- دەپ ايقايلاپ جالىندىم. قىزىم ەسىكتىڭ ارعى جاعىنان: ماما، سەن ەندى بۇل ۇيگە كەلمە، قىزىڭ جوق، مەنى ءولىپ قالعان دەپ ويلا،-دەپ سىبىرلادى. سول كەزدە جانىندا تۇرعان كۇيەۋى: قىزىڭنىڭ نە دەگەنىن ەستىدىڭ عوي، ەندى كەلسەڭ ءولتىرىپ تاستايمىن،-دەدى. سالافيت كۇيەۋى مەنى قىزىممەن كەزدەستىرمەۋگە تىرىسادى. سويلەسىپ قالسا شەشەسىنە دەگەن ماحابباتى ويانىپ، ونى تاستاپ كەتە مە دەپ قورقادى. سول ءۇشىن ونى ازعىرىپ، ماعان كۇشپەن قارسى قويىپ ۇستاپ وتىر. ميىن ابدەن ۋلاپ تاستاعان. مەن ءۇشىنشى رەت بارعاندا تۋعان قىزىم كۇيەۋىنىڭ ايتۋىمەن پوليتسياعا ماعان قارسى ارىز جازدى. بۇل نەتكەن سۇمدىق؟ سوندا قىزىما بۇل ءدىننىڭ دۇرىس ەمەس ەكەندىگىن ايتىپ، وعان ەشكىم كومەكتەسە الماي ما؟
-ەگەر قىزىڭىز ءسىزدىڭ وسى سۇقباتىڭىزدى كورەتىن بولسا، وعان نە ايتار ەدىڭىز؟
-وعان تەرىس ءدىني اعىمنان قايتىپ، دەنساۋلىعىڭدى كۇتىپ، تۋىس-تۋعانىڭمەن ارالاسىپ، دۇرىس ءومىر ءسۇر دەپ ايتار ەدىم.. سەنى ساعىندىق...ءسىڭىلىڭ سەنى ساعىنىپ ىلعي دا جىلايدى..
بايعۇس انانىڭ بۇدان ارى سويلەسۋگە جۇرەگى شىدامادى. جانارى جاسقا شىلاعان ايەل بىزبەن ءۇنسىز قوشتاسىپ كەتە باردى.
سۋرەت اشىق ينتەرنەت كوزىنەن الىندى
سۇقباتتى جۇرگىزگەن
شقو ءدىن ماسەلەلەرىن زەرتتەۋ ورتالىعىنىڭ مامانى ە.كۇرمانعاليەۆ،
"ادىرنا" ۇلتتىق پورتالى
