سەرىك ەلىكباي. "اينا"

16.11.2019

3700

كولحوز باستىعىنىڭ قىزى بولعاننان با، تەك وسىلاردىڭ ۇيىندە عانا ادام بويلى اينا بولاتىن. الىس جولعا شىعار سىلقىم كەلىنشەك، جات بوساعاسىن اتتار -ۇركەك ءۇمىت اۋىل قىزى وسى اينانىڭ الدىندا ايال تاباتىن.
جالعىز بالا، جالقى قىزدىڭ العاش مەكتەپ تابالدىرىعىن اتتاعاندا، وزگەگە ارمان شاعىن اينا سومكەسىندە بولاتىن.
قول جەتپەس كۇمىس ساپتى اينانىڭ ساۋلەسى جاس قىزدىڭ قيالىنداي قىر اسا بەرەتىن.
قىز بالا تال شىبىقتاي تارالىپ، وزگەشە، حاس سۇلۋلىقتى سەرىك ەتىپ ءوستى.
مەكتەپ بىتىرگەن كەزدە وسى ايماقتا بۇنداي بەت بىتكەننىڭ كوركەمى جوق بولاتىن.
قازاق دەگەن ەلدىڭ جىرلاردا ايتار كەيىپكەرى، توستىرماي كەلگەندەي.
ۋىز ءوڭ، شاربەت ەرىن قىز قينالماي جوعارعى وقۋعا ءتۇستى.
ەگدە، جاس ەر وقىتۋشىلار بۇنىڭ ءدارىسحاناسىندا كۇمىلجي، شىدەرلەنە بەرەتىن.
حور ەركەسى ناركەس كوزبەن باعاسىن ءبىلىپ، تاتتىلىگىن تانىپ العان.
وقۋدان سوڭ وبلىستىق اكىمشىلىكتە قىزمەتكە قالعان.
قالا ورتاسىنداعى جۇماق پاتەردىڭ جۋىنار بولمەسىن ءبۇتىن اينالاپ تاستاعان...
مەڭسىز ءمارمار دەنەسىن ءوز كوزىنەن قىزعاناتىن.
كوڭىلسىز كوپەكتەردەن ىرگەسىن بولەك سالاتىن...
تەك وسىلىق پاتشازادا كەلۋى ءتيىس...
تۇرمىسقا شىقساڭشى دەر اتا-انا تىلەگى قاراڭعىلىقتىڭ ۇكىمىندەي ەستىلەتىن.
ۇزاق توستى... قىزىلدىڭ قىزىعى، ارماننىڭ ۇزىنى ۇزىلگەندەي..
جيەن توسقان پەيىلدەرىنىڭ جەڭى جىرتىلىپ ، اتا-انا قايتتى...
ۇيىنە كەلگىسى كەلمەيتىن.
جۋىنار بولمەدەگى اينانىڭ ءبارىن ءبىر كۇنى تاس-تالقان جاسادى.
اينانى قولعا المايتىن بولدى. ار جاقتاعى كوپ ءاجىم مازاق جاسارداي.
زەينەت جاسقا ءبىر اي قالعاندا.. ومىردەن وزدى.
الىس تۋىستارى بەتىن جاپپاقشى بولىپ اينا ىزدەپ ەدى... ەمگە جوق ەكەن.