حالىقارالىق «شەكاراسىز تىلشىلەر» ۇيىمى كاسىبي قىزمەتىن اتقارۋ كەزىندە 67 ءجۋرناليستىڭ قازا تاپقانىن انىقتادى، دەپ حابارلايدى "ادىرنا" ۇلتتىق پورتالى.
بۇل - 2024 جىلدىڭ 1 جەلتوقسانىنان باستاپ، 2025 جىلدىڭ 1 جەلتوقسانىنا دەيىنگى دەرەك.
قازا بولعانداردىڭ باسىم بولىگى سوعىس قيمىلدارى مەن قىلمىستىق توپتاردىڭ ارەكەتتەرى سالدارىنان ومىرىمەن قوش ايتىسقان.
ۇيىم دەرەگىنە سۇيەنسەك، 67 ءجۋرناليستىڭ 53-ءى قارۋلى قاقتىعىستار ايماقتارىندا نەمەسە ۇيىمداسقان قىلمىستىق توپتاردان كوز جۇمعان. ەڭ قاۋىپتى ءوڭىر رەتىندە گازا سەكتورى اتالىپ وتىر. اتالمىش ايماقتا 29 جۋرناليست مەرت بولعان. ودان كەيىنگى ورىندا 9 جۋرناليست قازا تاپقان مەكسيكا تۇر. سونداي-اق ۋكراينا، سۋدان جانە سيريا جۋرناليستەر ءۇشىن اسا قاتەرلى ايماقتار قاتارىندا كورسەتىلگەن.
"شەكاراسىز تىلشىلەر" مالىمەتى بويىنشا، قازىرگى تاڭدا الەمنىڭ 62 ەلىندە 503 جۋرناليست تۇرمەدە وتىر. بۇل كورسەتكىش وتكەن جىلمەن سالىستىرعاندا ءسال ازايعانىمەن، جالپى جاعداي ءالى دە كۇردەلى كۇيىندە قامالعان.
قاماۋعا الىنعان جۋرناليستەر سانى بويىنشا قىتاي كوش باستادى. وندا 121 جۋرناليست تەمىر توردا وتىر. ودان كەيىن رەسەيدە 48, ميانمادا 47 ادام، بەلارۋستە 33 جۋرناليست، ۆەتنامدا 28 جانە ازەربايجان ەلىندە 25 جۋرناليست تۇرمەگە تۇسكەن.
سونىمەن قاتار رەسەي شەتەلدىك جۋرناليستەردى قاماۋعا الۋ بويىنشا الدىڭعى ورىندا. مۇندا 26 ۋكراين ءجۋرناليسى ۇستالعان. ەكىنشى ورىندا يزرايل – 20 پالەستينالىق جۋرناليست قاماۋدا وتىر.
بۇعان قوسا الەم بويىنشا 135 باق قىزمەتكەرى حابار-وشارسىز كەتكەندەر قاتارىندا تىركەلگەن. ولاردىڭ كەيبىرى وتىز جىلدان استام ۋاقىت بويى تابىلماعان. مۇنداي جاعدايلار 100-دەن استام ەلدە تىركەلگەنىمەن، كوبىنە تاياۋ شىعىس پەن لاتىن امەريكاسى ايماقتارىنا ءتان. "شەكاراسىز تىلشىلەر" مالىمەتىنشە، جۋرناليستەردىڭ كوپتەپ جوعالىپ كەتۋى سيريادا تىركەلگەن. باشار اساد بيلىگى كەزەڭىندە جوعالعان كوپتەگەن ءجۋرناليستىڭ تاعدىرى ءالى كۇنگە دەيىن بەلگىسىز.
