«مەديازونا» مەن BBC بىرلەسكەن زەرتتەۋىندە ۋكرايناداعى سوعىستا رەسەيدەن شاقىرىلعان كەمىندە 15 077 موبيليزاتسيالانعان اسكەردىڭ قازا تاپقانى بەلگىلى بولدى، دەپ حابارلايدى "ادىرنا" ۇلتتىق پورتالى DW-گە سىلتەمە جاساپ.
جۋرناليستەردىڭ ايتۋىنشا، ولاردىڭ 42 پايىزى ۆلاديمير پۋتين جاريالاعان ء«ىشىنارا موبيليزاتسيادان» كەيىنگى ءبىر جىلدىڭ ىشىندە مەرت بولعان.
ەڭ كوپ شىعىن باشقۇرتستاندا (884 ادام) جانە تاتارستاندا (861 ادام) تىركەلگەن. حالىق سانىنا شاققاندا بۋرياتيا الدا تۇر – ءار 10 مىڭ ەر ادامنىڭ 23-ءى سوعىستا مەرت بولعان. كەيىنگى ورىنداردا تىۆا (13), ماگادان وبلىسى جانە چۋكوتكا (ارقايسىسى – 10) تۇر.
العاشقى ءولىم موبيليزاتسيا جاريالانعاننان كەيىنگى 5-كۇنى تىركەلگەن. كەمىندە 65 ادام اسكەري بولىمدەردە نەمەسە جيناق پۋنكتتەرىندە قازا تاپقان. قازا بولعانداردىڭ باسىم بولىگى 30–34 جاس ارالىعىنداعىلار. ەكىنشى ورىندا 35–39 جاس ارالىعىنداعىلار تۇر.
زەرتتەۋگە سايكەس، موبيليزاتسيالانعاندار ەڭ كوپ شىعىنعا 2023 جىلى ۋگلەدار ماڭىنداعى قىسقى جانە جازعى شابۋىلدار كەزىندە، سونداي-اق قازان-جەلتوقسانداعى اۆدەەۆكا ءۇشىن شايقاستاردا ۇشىراعان.
«مەديازونا» رەسەيدەگى جالپى موبيليزاتسيالانعانداردىڭ سانىن 527 مىڭ دەپ باعالاسا، پۋتين «318 مىڭ ادام شاقىرىلدى» دەپ مالىمدەگەن. رەسمي تۇردە موبيليزاتسيا ءالى اياقتالعان جوق.
