«قارا جورعا» قازاق ءبيىنىڭ برەندىنە اينالىپ كەلەدى دەسەك، استە قاتەلەسپەيتىن شىعارمىز. توي حالىقتىڭ قازىناسى بولسا، «قارا جورعا» ءبيى قازاقتىڭ سول قازىناسىنىڭ تورىنەن ويىپ ورىن الدى. ويتكەنى بۇل كۇندە «قارا جورعا» بيلەنبەيتىن توي كەمدە-كەم. بۇدان ءبىراز ۋاقىت بۇرىن «الاش ايناسى» گازەتى وسى ۇلتتىق ءبيىمىزدىڭ شيپاجايلاردا دا ەمدەۋ-ساۋىقتىرۋ ءبيى رەتىندە قولدانىلا باستاعانىن جازىپ ەدىك. ەندى، مىنە، «قارا جورعا» ۇلتتىق-پاتريوتتىق ءىس-شارالاردىڭ دا اجارىن اشىپ، ءسانىن كەلتىرەتىن بيگە اينالىپ كەلەدى.
كەشە قازاقستان حالقى تىلدەرىنىڭ فەستيۆالى اياسىندا ەلورداداعى قازاق گۋمانيتارلىق زاڭ ۋنيۆەرسيتەتىنىڭ الدىندا وسى جوعارى وقۋ ورنىنىڭ ستۋدەنتتەرى مەن وقىتۋشىلارى – باس-اياعى شامامەن 4 مىڭعا جۋىق ادام «بيلەيىك بىرگە، قارا جورعا» پاتريوتتىق اكتسياسىن «قارا جورعا» بيىمەن اشتى.
ايتقانداي، اكتسيانىڭ اشىلۋ راسىمىندە ءوزىنىڭ بالا كەزىندە وسى بيگە بيلەگەنىن ەسكەن العان ۋنيۆەرسيتەتتىڭ پرەزيدەنتى ماقسۇت نارىكباەۆ تا «قارا جورعاعا» جورعا ەكەنىن كورسەتىپ، ستۋدەنتتەرمەن بىرگە بيلەدى. ءادىل باعاسىن بەرە كەتەيىك، الپىستى القىمداعان ماقسۇت سۇلتانۇلى بۋىندارى بىلقىلداپ بيلەگەندە جيىرماداعى جاستى ءتانتى ەتەتىندەي-اق ءتاپ-ءتاۋىر ءبيشى ەكەن.
ال قالعان ستۋدەنتتەردىڭ باسىم كوپشىلىگى ءبيدى تولىق مانەرىندە بيلەي الماي، قول مەن يىقتى قوزعالتقاننان ارىگە بارمادى. بىراق ەشتەڭە ەتپەس، ءالى-اق ءبىر كىسىدەي قوزعالىپ، بيلەپ كەتەر دەگەن ۇمىتتەمىز. ويتكەنى ۋنيۆەرسيتەت باسشىسى ەندىگى ۋاقىتتا ستۋدەنتتەردى تاڭەرتەڭ وقۋ ورنىنا جارتى ساعات بۇرىن كەلۋگە شاقىرىپ، ءانۇراننان كەيىن «قارا جورعا» بيلەۋدى ادەتكە اينالدىرۋدى ۇسىندى. نەسى بار، بۇكىل قىتاي تاڭنان تۇرىپ، ۋ-شۋ جاتتىعىن ىستەپ جاتقاندا، ءبىز دە بويىمىزعا قان جۇگىرتىپ، «قارا جورعامەن» كۇندەلىكتى تىرلىكتى باستاساق، سالاۋاتتى ءومىر سالتى دەگەن سول بولار.
ماقسۇت نارىكباەۆ،قازاق گۋمانيتارلىق زاڭ ۋنيۆەرسيتەتىنىڭ پرەزيدەنتى:
– ءبىز – بارلىق جاعىنان تالانتتى حالىقپىز. ءان مەن كۇي، بي سەكىلدى ونەر تۋىندىلارىمىز دا كوپ. بىراق سويتە تۇرا، ءوزىمىزدىڭ توي-تومالاقتارىمىزدا وزگە جۇرتتىڭ اۋەنى مەن ءبيىن بيلەپ ءجۇرمىز. وسى ءۇردىستى وزگەرتىپ، نەگە ءبىز ءوزىمىزدىڭ ۇلتتىق ءبيىمىزدى بيلەمەيمىز؟ بۇگىنگى پاتريوتتىق اكتسيادا «قارا جورعا» ءبيىن بيلەيىك دەگەن وي وسى ماقساتتان تۋدى. ال «قارا جورعا» ءبيى، ونىڭ اۋەنى مەن قيمىل-قوزعالىسى حالىققا ەتەنە جاقىن. ونىڭ اۋەنىندە اسىرەسە قازاق ۇلتىنا رۋح بەرەتىن كۇش بار. ءبىزدىڭ وسى باستامامىزدى ل.گۋميلەۆ اتىنداعى ەۋرازيالىق ۇلتتىق ۋنيۆەرسيتەت تە قولداپ، تۇستەن كەيىن ولار دا ۋنيۆەرسيتەت بولىپ ءبىر مەزگىلدە «قارا جورعا» ءبيىن بيلەگەلى وتىر. سوندىقتان مەن وزگە جوعارى وقۋ ورىندارىن دا وسى باستامامىزعا قوسىلۋعا شاقىرامىن.
ايبىن باقىتۇلى،
«الاش ايناسى».