«Qara jorǧa» qazaq biınıŋ brendıne ainalyp keledı desek, äste qatelespeitın şyǧarmyz. Toi halyqtyŋ qazynasy bolsa, «Qara jorǧa» biı qazaqtyŋ sol qazynasynyŋ törınen oiyp oryn aldy. Öitkenı būl künde «Qara jorǧa» bilenbeitın toi kemde-kem. Būdan bıraz uaqyt būryn «Alaş ainasy» gazetı osy ūlttyq biımızdıŋ şipajailarda da emdeu-sauyqtyru biı retınde qoldanyla bastaǧanyn jazyp edık. Endı, mıne, «Qara jorǧa» ūlttyq-patriottyq ıs-şaralardyŋ da ajaryn aşyp, sänın keltıretın bige ainalyp keledı.
Keşe Qazaqstan halqy tılderınıŋ festivalı aiasynda elordadaǧy Qazaq gumanitarlyq zaŋ universitetınıŋ aldynda osy joǧary oqu ornynyŋ studentterı men oqytuşylary – bas-aiaǧy şamamen 4 myŋǧa juyq adam «Bileiık bırge, Qara jorǧa» patriottyq aksiiasyn «Qara jorǧa» biımen aşty.
Aitqandai, aksiianyŋ aşylu räsımınde özınıŋ bala kezınde osy bige bilegenın esken alǧan universitettıŋ prezidentı Maqsūt Närıkbaev ta «Qara jorǧaǧa» jorǧa ekenın körsetıp, studenttermen bırge biledı. Ädıl baǧasyn bere keteiık, alpysty alqymdaǧan Maqsūt Sūltanūly buyndary bylqyldap bilegende jiyrmadaǧy jasty täntı etetındei-aq täp-täuır bişı eken.
Al qalǧan studentterdıŋ basym köpşılıgı bidı tolyq mänerınde bilei almai, qol men iyqty qozǧaltqannan ärıge barmady. Bıraq eşteŋe etpes, älı-aq bır kısıdei qozǧalyp, bilep keter degen ümıttemız. Öitkenı universitet basşysy endıgı uaqytta studentterdı taŋerteŋ oqu ornyna jarty saǧat būryn keluge şaqyryp, Änūrannan keiın «Qara jorǧa» bileudı ädetke ainaldyrudy ūsyndy. Nesı bar, bükıl qytai taŋnan tūryp, u-şu jattyǧyn ıstep jatqanda, bız de boiymyzǧa qan jügırtıp, «Qara jorǧamen» kündelıktı tırlıktı bastasaq, salauatty ömır salty degen sol bolar.
Maqsūt NÄRIKBAEV,Qazaq gumanitarlyq zaŋ universitetınıŋ prezidentı:
– Bız – barlyq jaǧynan talantty halyqpyz. Än men küi, bi sekıldı öner tuyndylarymyz da köp. Bıraq söite tūra, özımızdıŋ toi-tomalaqtarymyzda özge jūrttyŋ äuenı men biın bilep jürmız. Osy ürdıstı özgertıp, nege bız özımızdıŋ ūlttyq biımızdı bilemeimız? Bügıngı patriottyq aksiiada «Qara jorǧa» biın bileiık degen oi osy maqsattan tudy. Al «Qara jorǧa» biı, onyŋ äuenı men qimyl-qozǧalysy halyqqa etene jaqyn. Onyŋ äuenınde äsırese qazaq ūltyna ruh beretın küş bar. Bızdıŋ osy bastamamyzdy L.Gumilev atyndaǧy Euraziialyq ūlttyq universitet te qoldap, tüsten keiın olar da universitet bolyp bır mezgılde «Qara jorǧa» biın bilegelı otyr. Sondyqtan men özge joǧary oqu oryndaryn da osy bastamamyzǧa qosyluǧa şaqyramyn.
Aibyn Baqytūly,
«Alaş ainasy».
