مينيسترلىك اقجارقىن تۇرلىبايدى ەكستراديتسيالاۋ تۋرالى ايتتى

سىرتقى ىستەر مينيسترلىگى قىتايدا ەسىرتكى كونترابانداسى ءۇشىن ۇستالعان اقجارقىن تۇرلىبايدى ەلگە قايتارۋ ماسەلەسىن ءتۇسىندىردى، دەپ حابارلايدى Sputnik قازاقستان تىلشىسى. ءمينيستردىڭ ءبىرىنشى ورىنباسارى شاحرات نۇرىشەۆتىڭ ايتۋىنشا، سوتتىڭ سوڭعى شەشىمى ءالى شىققان جوق. ونسىز اقجارقىن تۇرلىبايدى ەكستراديتسيالاۋعا سۇراۋ سالۋ مۇمكىن ەمەس. "سوتتىڭ سوڭعى وتىرىسى قىركۇيەك ايىندا بولعان. بىراق شەشىم ءالى شىققان جوق. ءبىز سونى كۇتىپ وتىرمىز. سوتتىڭ شەشىمى شىققاننان كەيىن ەكستراديتسيالاۋعا بولادى. ءتارتىپ بويىنشا ونىڭ تۋعان-تۋىستارى باس پروكۋراتۋراعا اقجارقىندى ەكستراديتسيالاۋ تۋرالى ءوتىنىشحات جولدايدى. سونىڭ نەگىزىندە باس پروكۋراتۋرا قىتايداعى كونتر ارىپتەستەرگە سۇراۋ سالادى. ولار ءوز كەزەگىندە سوتتالعان ادامدى بەرە مە، جوق پا، وزدەرى شەشەدى. وڭ شەشىم بولسا، ەكستراديتسيا جاسالادى", - دەدى نۇرىشەۆ Sputnik قازاقستان تىلشىسىنە بەرگەن سۇقباتىندا. ونىڭ سوزىنە قاراعاندا، اقجارقىن تۇرلىباي ەلگە قايتارىلعاننان كەيىن ونىڭ ءىسىن قازاقستاننىڭ سوتى قارايدى. سەبەبى ەكى ەلدىڭ زاڭناماسى ەكى بولەك جانە قىلمىس ءۇشىن بەرىلەتىن جازا ءارتۇرلى. ء"يا، جازانىڭ مەرزىمى وزگەرۋى مۇمكىن. سەبەبى قازاقستان مەن قىتايدىڭ زاڭناماسى ءبىر-بىرىنە ۇقسامايدى. ءبىر قىلمىس ءۇشىن ءارتۇرلى جازا بەرىلەدى. سوندىقتان بۇل جەردە ول ءوز جازاسىن قازاقستاننىڭ زاڭناماسى بويىنشا وتەۋى ءتيىس", - دەپ اتاپ كورسەتتى نۇرىشەۆ.

اقجارقىن تۇرلىبايدىڭ تاعدىرى

قازاقستان ازاماتى اقجارقىن تۇرلىباي 2014 جىلى ناۋرىزدا گۋانچجوۋ اۋەجايىندا ۇستالعان بولاتىن. وعان شەكارادان 4,5 كەلى ەسىرتكىنى الىپ وتپەك بولدى دەگەن ايىپ تاعىلدى. ول كەزدە وتانداسىمىز 20 جاستا بولعان ەدى. 2015 جىلدىڭ ماۋسىمىندا قىتاي سوتى ونى ءومىر بويىنا باس بوستاندىعىنان ايىردى. سوتتا اقجارقىن شەتەلدىك دوسى الداپ كەتكەنىن ايتىپ، كىناسىن مويىنداعان جوق. 2016 جىلى سوت شەشىمى جويىلىپ، ءىس قايتا قاراۋعا جىبەرىلدى.بيىل 3 قىركۇيەكتە قىتايدىڭ گۋانچجوۋ قالالىق سوتىندا اقجارقىن تۇرلىبايدىڭ ءىسى بويىنشا وتىرىس ءوتتى. سوت وتىرىسى 2 ساعاتتان استام ۋاقىت بولدى. اقجارقىن تۇرلىباي قىتاي تىلىندە جاۋاپ بەرىپ وتىردى. ال 9 قىركۇيەكتە وتانداسىمىزدىڭ اناسى زۋحرا سەيتىموۆا قازاقستان پرەزيدەنتىنە كومەك سۇراپ حات جازعانى حابارلاندى. ارتىنشا قاسىم-جومارت توقاەۆ قىتايعا ساپارى كەزىندە اقجارقىن تۇرلىبايدىڭ ماسەلەسىن كوتەردى.

اقجارقىن تۇرمەدە نەمەن اينالىسادى

قازاقستاننىڭ قىتايداعى ەلشىلىگىنىڭ مالىمەتىنە سۇيەنسەك، تۇرلىباي قاسىنداعى سوتتالعاندارعا اعىلشىن ءتىلىن ۇيرەتىپ ءجۇر. سىرتقى ىستەر مينيسترلىگى Sputnik قازاقستان ساۋالىنا بەرگەن رەسمي جاۋابىندا اقجارقىن تۇرلىباي كوركەم ادەبيەت وقيتىنىن ايتتى. دەنە شىنىقتىرۋمەن دە اينالىسادى. قىتاي ءتىلىن جاقسى مەڭگەرىپ العان. تۇزەتۋ مەكەمەسىندەگى جاعدايعا قاتىستى شاعىمى جوق ەكەن. قازاقستاننىڭ قىتايداعى ەلشىلىگىنىڭ قىزمەتكەرلەرى گۋانچجوۋداعى تۇرمەگە بارىپ، تۇرلىبايدىڭ قال-جاعدايىن ءبىلىپ تۇرادى. بۇعان قوسا، اقشالاي كومەك كورسەتىپ، سۇراعان كىتاپتارىن تاۋىپ بەرەدى.