Ministrlık Aqjarqyn Tūrlybaidy ekstradisiialau turaly aitty

Syrtqy ıster ministrlıgı Qytaida esırtkı kontrabandasy üşın ūstalǧan Aqjarqyn Tūrlybaidy elge qaitaru mäselesın tüsındırdı, dep habarlaidy Sputnik Qazaqstan tılşısı. Ministrdıŋ bırınşı orynbasary Şahrat Nūryşevtıŋ aituynşa, sottyŋ soŋǧy şeşımı älı şyqqan joq. Onsyz Aqjarqyn Tūrlybaidy ekstradisiialauǧa sūrau salu mümkın emes. "Sottyŋ soŋǧy otyrysy qyrküiek aiynda bolǧan. Bıraq şeşım älı şyqqan joq. Bız sony kütıp otyrmyz. Sottyŋ şeşımı şyqqannan keiın ekstradisiialauǧa bolady. Tärtıp boiynşa onyŋ tuǧan-tuystary bas prokuraturaǧa Aqjarqyndy ekstradisiialau turaly ötınışhat joldaidy. Sonyŋ negızınde bas prokuratura Qytaidaǧy kontr ärıptesterge sūrau salady. Olar öz kezegınde sottalǧan adamdy bere me, joq pa, özderı şeşedı. Oŋ şeşım bolsa, ekstradisiia jasalady", - dedı Nūryşev Sputnik Qazaqstan tılşısıne bergen sūqbatynda. Onyŋ sözıne qaraǧanda, Aqjarqyn Tūrlybai elge qaitarylǧannan keiın onyŋ ısın Qazaqstannyŋ soty qaraidy. Sebebı ekı eldıŋ zaŋnamasy ekı bölek jäne qylmys üşın berıletın jaza ärtürlı. "İä, jazanyŋ merzımı özgeruı mümkın. Sebebı Qazaqstan men Qytaidyŋ zaŋnamasy bır-bırıne ūqsamaidy. Bır qylmys üşın ärtürlı jaza berıledı. Sondyqtan būl jerde ol öz jazasyn Qazaqstannyŋ zaŋnamasy boiynşa öteuı tiıs", - dep atap körsettı Nūryşev.

Aqjarqyn Tūrlybaidyŋ taǧdyry

Qazaqstan azamaty Aqjarqyn Tūrlybai 2014 jyly nauryzda Guanchjou äuejaiynda ūstalǧan bolatyn. Oǧan şekaradan 4,5 kelı esırtkını alyp ötpek boldy degen aiyp taǧyldy. Ol kezde otandasymyz 20 jasta bolǧan edı. 2015 jyldyŋ mausymynda Qytai soty ony ömır boiyna bas bostandyǧynan aiyrdy. Sotta Aqjarqyn şeteldık dosy aldap ketkenın aityp, kınäsın moiyndaǧan joq. 2016 jyly sot şeşımı joiylyp, ıs qaita qarauǧa jıberıldı.Biyl 3 qyrküiekte Qytaidyŋ Guanchjou qalalyq sotynda Aqjarqyn Tūrlybaidyŋ ısı boiynşa otyrys öttı. Sot otyrysy 2 saǧattan astam uaqyt boldy. Aqjarqyn Tūrlybai qytai tılınde jauap berıp otyrdy. Al 9 qyrküiekte otandasymyzdyŋ anasy Zuhra Seitımova Qazaqstan prezidentıne kömek sūrap hat jazǧany habarlandy. Artynşa Qasym-Jomart Toqaev Qytaiǧa sapary kezınde Aqjarqyn Tūrlybaidyŋ mäselesın köterdı.

Aqjarqyn türmede nemen ainalysady

Qazaqstannyŋ Qytaidaǧy elşılıgınıŋ mälımetıne süiensek, Tūrlybai qasyndaǧy sottalǧandarǧa aǧylşyn tılın üiretıp jür. Syrtqy ıster ministrlıgı Sputnik Qazaqstan saualyna bergen resmi jauabynda Aqjarqyn Tūrlybai körkem ädebiet oqitynyn aitty. Dene şynyqtyrumen de ainalysady. Qytai tılın jaqsy meŋgerıp alǧan. Tüzetu mekemesındegı jaǧdaiǧa qatysty şaǧymy joq eken. Qazaqstannyŋ Qytaidaǧy elşılıgınıŋ qyzmetkerlerı Guanchjoudaǧy türmege baryp, Tūrlybaidyŋ qal-jaǧdaiyn bılıp tūrady. Būǧan qosa, aqşalai kömek körsetıp, sūraǧan kıtaptaryn tauyp beredı.