شىندىعىندا، «التىن ادام» ءان سالىپ ءجۇر. «مۇمكىن ەمەس، قاي جەردە؟..» — دەپ تاڭدانۋىڭىز عاجاپ ەمەس. باسقا ەمەس، ول ۇلى اباي مەن شاكارىم، ۇلى مۇحتار تۋعان ەجەلگى سەمەي قالاسىندا كونە ساقتاردىڭ كومەكەي اۋەنىمەن جىر ايتىپ ءجۇر. «التىن ادامنىڭ» اتى-ءجونى — سەرالى مۇحامەدسادىقوۆ…
ءبىر عاجابى، جوعارى ءبىلىمدى قۇقىق سالاسى بويىنشا مەڭگەرگەن سەرالى جاستايىنان قازاقتىڭ تاريحىنا، حالقىمىزدىڭ ەجەلگى، دالىرەك ايتساق، و باستان ساقتاردىڭ كونە ونەرىنە ولەردەي عاشىق بولىپتى. مىنە، سول ۇلتتىق تاريحقا، ونەرگە دەگەن عاشىقتىق جاس جىگىتتى اقىرى ساقتىڭ كومەكەي اۋەنىن جان-تانىمەن مەڭگەرۋگە جەتەلەپتى.
- اسىلىندە، كومەكەيمەن ءان سالۋ ءداستۇرى ەجەلگى ساقتارعا، ياعني ءبىزدىڭ اتا-بابالارىمىزعا ءتان. بۇل ونەردى التايدا قارقىرا دەپ اتاسا، ءبىزدىڭ حالقىمىزدا كومەكەي اۋەنىن قاراقىر دەپ اتايدى. بۇل نەگىزىنەن ساقتاردىڭ اسكەري ءانى سانالادى. مۇنى وسى ونەردىڭ قىر-سىرىنا قانىعا ءجۇرىپ انىقتادىم. جالپى، قاراقىر اۋەنى كوپ جاعدايدا شىعىس قازاقستان وبلىسىندا پايدا بولعان.
ال وسى ونەردىڭ «قونۋىنا» كەلسەم، مەنىڭ ەڭ ۇلكەن، ءتۇپ اتام بايجۇما باقسى دەگەن تانىمال ادام بولعان. ول كىسى كورشىلەس قىتايدا باقسىلىعىمەن تانىلىپ عانا قويماي، وسى قاراقىر اۋەنىمەن اۋرۋلاردى ەمدەپ، سىرقاتتى قايتارا بىلگەن. ءتىپتى سول بايجۇما اتام وزىنەن كومەك سۇراپ كەلگەن ادامنىڭ بولاشاعىن كومەكەي دىبىستارى ارقىلى ءدوپ باسىپ، بولجاي بىلگەن دە كورىنەدى. سونداي-اق ۇلكەن ناعاشى اتام ارقارباي باقسى دا قىلقوبىزدى تارتا وتىرىپ، وسى قاراقىر اۋەنىمەن ءان سالعان ەكەن. دەمەك، ماعان وسى ۇلتتىق ونەر ارعى اتالارىمنان جۇققان بولۋى مۇمكىن دەپ ويلايمىن، — دەيدى بىزبەن اڭگىمە بارىسىندا سەرالى مۇحامەدسادىقوۆ.
20 جىلدان استام ۋاقىتتان بەرى كومەيمەن كوسىلتە ءان سالىپ، ارعىسى التاي، بەرگىسى تارباعاتاي ءوڭىرىنىڭ تۇرعىندارىن تاڭداي قاقتىرىپ، تاڭعالدىرىپ كەلە جاتقان سەرالى بۇگىندە تاۋەلسىز قازاق ەلىنىڭ باستى برەندىنە اينالعان ەجەلگى ساق جاۋىنگەرى — «التىن ادامنىڭ» سالماعى 30 كەلىلىك كيىمىن وزىنە ساحنالىق كيىم رەتىندە تاڭداپ الىپتى. ونىڭ مۇنداعى ماقساتى دا، ارمانى دا ايقىن.
- مەن ءاربىر ەلدىڭ ۇلتتىق برەندى بولۋى قاجەت دەپ ويلايمىن. مىسالى، الەمدەگى قاي ەلدى بولماسىن، كەز كەلگەن كولدەنەڭ كوك اتتى ولاردى ءبىر كىشكەنتاي دۇنيەسى ارقىلى عانا تانيدى. ال ءبىز تاۋەلسىزدىك العانىمىزعا 20 جىلعا جۋىقتاسا دا، ءدال وسى برەند ماسەلەسىنە نازار اۋدارماي كەلەمىز. سوندىقتان مەن ساق جاۋىنگەرىنىڭ «التىن ادام» كيىمىن دالىرەك ايتسام، ساق پاتشاسى تارعىتايدىڭ كيىمىن وزىمە ساحنالىق كيىم رەتىندە ادەيى تاڭداپ الدىم. ويتكەنى تارعىتاي پاتشادان قالعان مۇرا «التىن ادام» كيىمى تاۋەلسىز قازاقستاننىڭ باستى برەندى بولۋعا سۇرانىپ-اق تۇر. ال باستى ماقساتىم — بىرىنشىدەن، «التىن ادام» ەكىنشىدەن، ەجەلگى ساقتاردىڭ اسكەري ءانى — كومەكەي اۋەنى، قاراقىر ارقىلى قازاق ەلىنىڭ ەجەلدەن مادەنيەتتى ءارى وركەنيەتتى مەملەكەت بولعانىن الەم ەلدەرىنە مويىنداتىپ، تانىتۋ! ءوز باسىم مۇنى تۋعان حالقىم الدىنداعى ازاماتتىق بورىشىم دەپ تۇسىنەمىن، — دەيدى بىزگە سەرالى مۇحامەدسادىقوۆ.
ءبىر قۋانتارلىعى، التاي ەلىنىڭ ونەرلى ورەندەرى قاراقىر (كومەكەي) اۋەنىمەن بار بولعانى ءتورت — ءتورت جارىم ساعات ءان ايتۋعا عانا شىداسا، سەمەيلىك سەرالى مۇحامەدسادىقوۆ ءبىر وتىرعاندا كومەكەيمەن 8 ساعات توقتاماستان جىر ايتىپ، التاي جانە تىۆا ەلدەرى تۇرعىندارىن تاڭ-تاماشا قالدىرىپتى. بولاشاقتا ول 12 ساعات ءۇزىلىسسىز جىر ايتىپ، بۇيىرتسا، قازاق ەلىن گيننەستىڭ الەمدىك رەكوردتار كىتابىنا جازۋدى ارمانداپ ءجۇر.
حالىقارالىق «شابىت» جانە «جاس قانات» بايقاۋلارىنىڭ جەڭىمپازى، التاي وڭىرىندە وتكەن كومەكەيمەن ءان سالۋشىلاردىڭ حالىقارالىق دوداسىندا مىڭنان تۇلپار، جۇزدەن جۇيرىك شىققان سەرالى مۇحامەدسادىقوۆ شىندىعىندا، ەجەلگى ساق ونەرى ارقىلى تاۋەلسىز ءھام كەڭ بايتاق قازاق ەلىن دۇنيەنىڭ ءتورت بۇرىشىنا تانىستىرماق. ولاي بولسا، «ىسكە ءسات، سەرالى!»، — دەيمىز ءبىز، وعان!
جومارت مولداحمەتۇلى
