بەسىككە سالۋ (سالت).
ءالدي-ءالدي اق بوپەم،
اق بەسىككە جات بوپەم.
(بەسىك جىرى)
بەسىك قاسيەتتى، كيەلى قۇتتى مۇلىك، ءسابيدىڭ التىن ۇياسى بولىپ ەسەپتەلەدى. «ەل ءىشى – التىن بەسىك» دەگەن ءسوز بەسىكتىڭ قۇدىرەتىن كورسەتەدى. جاڭا تۋعان بالانى بەسىككە سالۋ دا حالقىمىز ءۇشىن ەلەۋلى ءداستۇردىڭ ءبىرى. بەسىككە سالۋ جولى ۇلكەن نەمەسە ەلدىڭ تاربيەلى، ونەگەلى اجەلەرىنە، ايەلدەرگە تاپسىرىلادى. ول بەسىكتى وتپەن الاستاپ «تىشتىرما» جاساپ الىپ، بالانى بەسىككە بولەيدى.بەسىك ۇستىنە جەتى ءتۇرلى قادىرلى، تازا زاتتار قويىلادى. بەسىككە سالعان ادامعا «بەسىككە سالار» ياعني كادەلى سىي بەرىلەدى. وسىنداي قۋانىش ۇستىندە «بەسىك جىرى» ايتىلادى:
ايىر قالپاق كيىسىپ،
اقىرىپ جاۋعا ءتيىسىپ،
باتىر بولار ما ەكەنسىڭ؟
بارماقتارىڭ مايىسىپ،
ءتۇرلى ويۋ ويىسىپ،
شەبەر بولار ما ەكەنسىڭ؟
تاڭدايلارىڭ تاقىلداپ،
ءسوزىڭدى جۇرت ماقۇلداپ،
شەشەن بولار ما ەكەنسىڭ؟
بەسىكتىڭ ءسابي دەنساۋلىعىنا، تازالىعىنا پايداسى وتە زور. بەسىكتەگى ءسابيدىڭ بويى، قول اياعى ءتۇزۋ، شيراق بولادى. سونداي-اق بەسىك بالانى كەزدەيسوق قۇلاعان زاتتان، سۋىق پەن ىستىقتان دا قورعايدى. پالە-جالادان ساقتاسىن دەپ ىرىمداپ، وعان تۇمار، بۇركىت تۇياعى، جىلاننىڭ باس سۇيەگى، كىرپى سياقتى زاتتار تاعىپ قويادى.
بەسىك اعاشتان، نەگىزىندە تالدان ءيىپ جاسالادى. سەبەبى تال باسقا اعاشتاي ەمەس يىلمەلى، مورت سىنبايدى، قۇرت تۇسپەيدى، جات ءيىسى بولمايدى. بەسىكتىڭ مىناداي قۇرال-جابدىقتارى بولادى: جاستىق، مامىق، جورگەك، تۇبەك، شۇمەك، قولداۋ، تارتپا باۋ ت.ب.
