قازاقستاندا سوڭعى جىلدارى جاسوسپىرىمدەر اراسىندا ءوز-وزىنە قول جۇمساۋ جاعدايلارىنىڭ ارتۋى قوعامدى الاڭداتۋدا. زورلىق-زومبىلىق، بۋللينگ جانە پسيحوەموتسيونالدىق قىسىمنىڭ جاسوسپىرىمدەرگە تەرىس اسەر ەتۋى بۇل قايعىلى جاعدايلارعا سەبەپ بولۋى مۇمكىن. باتىس قازاقستان وبلىسىنىڭ پسيحولوگيالىق دەنساۋلىق ورتالىعىنىڭ ماماندارى وسى ماسەلە بويىنشا ءوز پىكىرلەرىن ءبىلدىرىپ، پسيحولوگيالىق قولداۋ شارالارىنىڭ ماڭىزدىلىعىن اتاپ ءوتتى.
باتىس قازاقستان وبلىسىندا ءسۋيتسيدتىڭ الدىن الۋ ماقساتىندا بىرنەشە باعىت بويىنشا پسيحوپروفيلاكتيكالىق جۇمىستار جۇرگىزىلۋدە. پسيحولوگ كين وكسانا ستەپانوۆنا سۋيتسيدكە بەيىم جاسوسپىرىمدەردىڭ مىنەز-قۇلقىنداعى الاڭداتارلىق بەلگىلەردى ۋاقىتىلى انىقتاپ، ناقتى شارالار قابىلداۋدىڭ ماڭىزدى ەكەنىن اتاپ ءوتتى. ونىڭ ايتۋىنشا، جاسوسپىرىمدەر اراسىنداعى ءسۋيتسيدتىڭ الدىن الۋ ءۇشىن ءبىلىم بەرۋ، دەنساۋلىق ساقتاۋ، الەۋمەتتىك قورعاۋ جانە ىشكى ىستەر جۇيەلەرىنىڭ ۇيلەسىمدى جۇمىسى قاجەت.
پسيحوپروفيلاكتيكالىق شارالار ءۇش نەگىزگى باعىتتا جۇزەگە اسىرىلادى. باستاپقى پسيحوپروفيلاكتيكا - سۋيتسيدتىك ۇردىستەردىڭ الدىن الۋ. وسى ماقساتتا قالا جانە اۋدان دەڭگەيىندە پسيحولوگتار اتا-انالارمەن لەكتسيالىق ساباقتار وتكىزىپ، وقۋشىلارمەن ترەنينگتەر ۇيىمداستىرادى. سونداي-اق، سۋيتسيدكە بەيىم توپتارمەن جۇمىس جۇرگىزۋ ءۇشىن ارنايى دياگنوستيكالىق تەكسەرۋلەر جۇرگىزىلەدى. بۇدان كەيىن سۋيتسيدتىك ارەكەتتەردىڭ الدىن الۋ - سۋيتسيدكە بەيىم جاسوسپىرىمدەرمەن پسيحوكوررەكتسيالىق جۇمىس جۇرگىزۋ. بۇل باعىتتا پسيحولوگتار سۋيتسيدكە ارەكەتتەنگەن جاسوسپىرىمدەرمەن جۇمىس جاساپ، ولاردىڭ جاعدايىن جاقسارتۋ ءۇشىن پسيحولوگيالىق قولداۋ كورسەتەدى. جانە ماڭىزدىسى رەابيليتاتسيا - سۋيتسيدتەن كەيىن جاقىندارىن جوعالتقان ادامداردى جانە وقيعاعا كۋا بولعان ادامداردى پسيحولوگيالىق تۇرعىدان قالپىنا كەلتىرۋ. بۇل جاعدايدا پسيحولوگتار وتباسىلارمەن جۇمىس ىستەپ، ولاردىڭ مىنەز-قۇلقىنداعى تۇزەتۋلەردى قاراستىرادى، - دەدى وپدو پسيحولوگى كين وكسانا.
اتا-انا جاۋاپكەرشىلىگى الدىڭعى ورىندا
پسيحولوگتار اتا-انالارعا بالالارىنىڭ جاعدايىن باقىلاپ، ونىمەن ۇنەمى سويلەسۋدىڭ ماڭىزدىلىعىن ەسكەرتەدى. كين وكسانا ستەپانوۆنا بالامەن بولاشاق تۋرالى اڭگىمەلەسۋدى جانە جوسپارلار قۇرۋدى ۇسىنادى. بۇل اڭگىمەلەر ءپوزيتيۆتى ءارى كونسترۋكتيۆتى بولۋى كەرەك، سەبەبى ولار ءجاسوسپىرىمنىڭ پسيحولوگيالىق كۇيىن جاقسارتادى. ونىڭ ايتۋىنشا، بالاعا وپتيميستىك كوزقاراس قالىپتاستىرۋ كەرەك، وعان سەنىم بەرىپ، ماقساتتارعا قول جەتكىزۋگە قابىلەتتى ەكەنىن كورسەتۋ ماڭىزدى. بالانى باسقا بالالارمەن سالىستىرۋدان اۋلاق بولۋ كەرەك. مۇنداي سالىستىرۋلار ءجاسوسپىرىمنىڭ ءوزىن-ءوزى باعالاۋىن تومەندەتەدى. ونىڭ ورنىنا، ونى تەك بۇگىنگى جانە ەرتەڭگى كەزەڭدەرمەن سالىستىرىپ، بولاشاقتا جەتىستىككە جەتۋگە ءۇمىت بەرۋ قاجەت، - دەيدى پسيحولوگ.
جاسوسپىرىمدەردىڭ كۇن ءتارتىبىن ساقتاۋ دا ماڭىزدى اسپەكت بولىپ تابىلادى. ولاردىڭ دۇرىس ۇيىقتاۋى، دۇرىس تاماقتانۋى، تازا اۋادا كوپ ۋاقىت وتكىزۋلەرى، سونداي-اق سپورتپەن اينالىسۋلارى قاجەت. دەپرەسسيانىڭ فيزيكالىق جاعدايعا دا اسەر ەتەتىنىن ەسكەرە وتىرىپ، ءجاسوسپىرىمنىڭ فيزيكالىق جانە پسيحولوگيالىق جاعدايى تەڭەستىرىلۋى ءتيىس. ودان بولەك، بالانى جاڭا ىستەرمەن اينالىسۋعا شاقىرۋ دا ماڭىزدى. مىسالى، سپورت زالىندا جاتتىعۋ جاساپ، جاڭا سەرۋەندەرگە شىعۋ، كينوعا بارۋ، كورمەلەرگە قاتىسۋ سياقتى ءىس-شارالار بالانىڭ ومىرىنە ارتۇرلىلىك ەنگىزىپ، ونى وڭ پسيحولوگيالىق كۇيگە كەلتىرۋگە كومەكتەسەدى.
ماماندارمەن بايلانىستى ۇزبەۋ ماڭىزدى
ەگەر جاعداي قيىنداپ، اتا-انالاردىڭ كومەگى جەتكىلىكسىز بولسا، پسيحولوگ نەمەسە پسيحوتەراپەۆتپەن كەڭەس الۋ وتە ماڭىزدى. باتىس قازاقستان وبلىسىنىڭ پسيحولوگيالىق دەنساۋلىق ورتالىعى حالىققا پسيحولوگتاردىڭ كومەگىن ۇسىنىپ، تاۋلىك بويى جۇمىس ىستەيتىن سەنىم تەلەفوندارى مەن ونلاين قىزمەتتەردى دە ۇسىنادى. وبلىس پسيحولوگتارى حالىق اراسىندا پسيحولوگيالىق قولداۋ كورسەتۋ ورتالىعىنىڭ تاۋلىك بويى جۇمىس ىستەيتىن سەنىم تەلەفونى - 7420, بايلانىس ورتالىعى – 111, تەلەگرامم بوت (@Mental_SupportBot), Call ورتالىعى 3580 نومىرلەرى ارقىلى اقپارات تاراتىپ، پسيحولوگپەن ونلاين كونسۋلتاتسيا الۋ مۇمكىندىگىن [www.mentalcenter.kz](http://www.mentalcenter.kz) سايتىنان دا الۋعا بولادى.
جاسوسپىرىمدەر اراسىندا ءسۋيتسيدتىڭ الدىن الۋ تەك مەديتسينالىق نەمەسە الەۋمەتتىك ەمەس، پسيحولوگيالىق تۇرعىدان دا ماڭىزدى ماسەلە. پسيحولوگيالىق قولداۋ مەن دۇرىس باعىت-باعدار بەرۋ ءجاسوسپىرىمنىڭ پسيحولوگيالىق جاعدايىن جاقسارتۋعا، ونىڭ بولاشاققا دەگەن سەنىمىن ارتتىرۋعا مۇمكىندىك بەرەدى. وسىلايشا، بالانىڭ ءومىرىن ساقتاپ قالۋ جانە ونىڭ پسيحيكالىق دەنساۋلىعىن نىعايتۋ ءۇشىن قوعام بولىپ بىرىگۋ وتە ماڭىزدى شارالاردىڭ ءبىرى.
