Besikke salý (salt).
Áldı-áldı aq bópem,
Aq besikke jat bópem.
(Besik jyry)
Besik qasıetti, kıeli qutty múlik, sábıdiń altyn uıasy bolyp esepteledi. «El ishi – altyn besik» degen sóz besiktiń qudiretin kórsetedi. Jańa týǵan balany besikke salý da halqymyz úshin eleýli dástúrdiń biri. Besikke salý joly úlken nemese eldiń tárbıeli, ónegeli ájelerine, áıelderge tapsyrylady. Ol besikti otpen alastap «tyshtyrma» jasap alyp, balany besikke bóleıdi.Besik ústine jeti túrli qadirli, taza zattar qoıylady. Besikke salǵan adamǵa «besikke salar» ıaǵnı kádeli syı beriledi. Osyndaı qýanysh ústinde «Besik jyry» aıtylady:
Aıyr qalpaq kıisip,
Aqyryp jaýǵa tıisip,
Batyr bolar ma ekensiń?
Barmaqtaryń maıysyp,
Túrli oıý oıysyp,
Sheber bolar ma ekensiń?
Tańdaılaryń taqyldap,
Sózińdi jurt maquldap,
Sheshen bolar ma ekensiń?
Besiktiń sábı densaýlyǵyna, tazalyǵyna paıdasy óte zor. Besiktegi sábıdiń boıy, qol aıaǵy túzý, shıraq bolady. Sondaı-aq besik balany kezdeısoq qulaǵan zattan, sýyq pen ystyqtan da qorǵaıdy. Pále-jaladan saqtasyn dep yrymdap, oǵan tumar, búrkit tuıaǵy, jylannyń bas súıegi, kirpi sııaqty zattar taǵyp qoıady.
Besik aǵashtan, negizinde taldan ıip jasalady. Sebebi tal basqa aǵashtaı emes ıilmeli, mort synbaıdy, qurt túspeıdi, jat ıisi bolmaıdy. Besiktiń mynadaı qural-jabdyqtary bolady: jastyq, mamyq, jórgek, túbek, shúmek, qoldaý, tartpa baý t.b.
