يسرايل ساپارباي: تەڭىزدى جۇت! مۇحيتتى، مۇنايدى جۇت!

6116
Adyrna.kz Telegram

جالماۋىز!

جالما، جالما!!

قالدىرما،

ءبارىن جالما،

جالىنعانعا،

قاراما جارىم جانعا.

جالماۋىزدار جاھاندى جايلايدى ەكەن،

دۇنيەنىڭ قاۋىزى تارىلعاندا.

...

جالما، جالما،

جەتى باس جەبىر نەمە!

كومىرگە دە اۋىز سال، تەمىرگە دە!

كومەيىڭە كومىلگەن ارۋاقتار

كورىڭدە دە،

وكىرسىن تورىڭدە دە!

...

ەلدىڭ مۇڭىن،

قايتەسىڭ جۇرتتىڭ سورىن،

اشىلىپ تۇر ارانىڭ، مىقتىم، سەنىڭ!

الماتى مەن استانا پويىزىنداي

ءارلى-بەرلى جۇگىرسىن جۇتقىنشاعىڭ.

...

مىنانى جۇت،

قالدىرما، انانى جۇت!

اۋىلدى جۇت!

مالدى جۇت!

دالانى جۇت!

قابىردى جۇت!

قامبانى، قالانى جۇت!

سابىردى جۇت،

سالتتى جۇت،

سانانى جۇت!

...

اسپاندى جۇت!

اۋا مەن جەردى جالما!

جەردەن اسقان جاھاندا شەرلى بار ما؟!

ءزاۋ-زاتتاردى يلەيدى ەندى ەسەرلەر،

باۋ-باقتاردى بيلەيدى ەندى قارعا!

...

كولدى قىلعىت،

كوكتەگى كۇن، ايدى جۇت!

تەڭىزدى جۇت!

مۇحيتتى، مۇنايدى جۇت!

قيىعىمەن كوزىنىڭ قاراپ قويىپ،

ميىعىنان وتىرسىن قۇداي كۇلىپ..!

 

زامان

جاقسىسى اتىلعان زامان،
جامانى ساتىلعان زامان.
ەركەگى قاتىننان جامان،
قاتىنى شاتىلعان زامان.
ءىبىلىس ىلىققان زامان،
ءبۇلىنىپ، بىلىققان زامان.
قۇلقىنى قۇنىققان زامان،
قۇدايىن ۇمىتقان زامان!
بايلىققا باس ۇرعان زامان
ءاپتىڭدى قاشىرعان زامان.
ارانى اشىلعان زامان،
ادامى اشىنعا زامان!

تالابىن تاسقا ۇرعان زامان،
تارىداي شاشىلعان زامان
ارامدى اس قىلعان زامان،
ادالدى لاس قىلعان زامان.
تالاعى تاسىردان جامان،
تارىداي شاشىلعان زامان.
ايلاسىن اسىرعان زامان،
ابىرويى اشىلعان زامان.
ۇلدارى ۇرىنعان زامان،
قىزدارى قىدىرعان زامان.
تۇلكىدەي قۇبىلعان زامان،
تۇگەلدەي جىن ۇرعان زامان!!!

ايايمىن ماحابباتتى جەتىم قالعان
وكىنبەيمىن بىرەۋدى وپسەڭ دە ءولىپ،
وكىنبەيمىن بىرەۋگە كەتسەڭ دە ەرىپ.
جازمىشتىڭ ماعان جازعان پەندەسىنە
مەن-داعى كەزىگەرمىن كوپ سەندەلىپ.

مۇڭ با ەكەن،
مۇنىڭ ءبارى ۋايىم با ەكەن؟!
بۇگىندە ويىم بوتەن، جايىم بوتەن.
قوينىنا قونا الماعان قوس اققۋعا
قول بۇلعاپ قالا بەرەر – قايىڭ مەكەن…

جابىقپا،
جارىلقاسىن بەتىڭدى الدان.
وتكەن كۇن وشكەن، كوشكەن سەكىلدى ارمان…
بولار-اۋ ءبارى دە ۇمىت،
امالىم نە،
ايايمىن ماحابباتتى جەتىم قالعان.

ماحامبەتشە
كوگەنگە كوزى كونبەگەن،
كوكىرەگىندە شامى سونبەگەن،
ىرىدەن ىزەت كورە الماي
ىرىگەن ءىشى شەرمەنەن،
ساناسى سامسوز جۇرسە دە
ساناتقا، سانعا ەنبەگەن،
اسىل ءبىر تۋعان اقىندى
قاي كەزدە قايعى جەڭبەگەن؟..
ارعىماق اساۋ باپتاعان،
الدىنان ەشكىم قاقپاعان.
ارماننىڭ قۇسىن الپەشتەپ،
اللانىڭ ءىسىن جاقتاعان،
التىنمەن ارىن اپتاعان،
انانىڭ ءسۇتىن اقتاعان –
اسىپ ءبىر تۋعان اقىندى
قاي كەزدە اجال تاپپاعان؟...
جاي ۇستاپ تۋعان جاتىردان،
اشىنسا – اشۋ شاقىرعان،
شالدۋارلارعا شارت سىنبا،
الديارلارعا اقىلمان،
ءبانداۋي مىنا تىرلىككە
ءباداۋي باسىن قاتىرعان –
زالالسىز، ءزىلسىز اقىنعا
قاي زامان بالىن تاتىرعان؟!
اششىنى تاتىپ ۇشىنعان،
ءتاتتىنى تاتىپ تۇشىنعان،
ۇياعا تۇقىم ءتۇسىرىپ،
قياعا تۇيعىن ۇشىرعان،
ءمىناجات كەشىپ ءار جۇما
ءتارجىما تارتقان مىسىردان...
بايباتشا كوڭىل اقىنعا
قاي پاتشا تاعىن ۇسىنعان؟
ەلجىرەپ ەسىك اشپاعان
تالايعا ءتاڭر – تاس قامال.
شايىرعا زايىر كىمىڭ بار
تاعدىرعا تالاق تاستاعان؟
ءتۇتىنى بىرگە دەمەسەڭ،
ءبىتىمى بولەك باسقادان،
قايراعان ءتىسىن اقىنعا
قاي نادان ءيتىن قوسپاعان؟...

سانا سىرقاتى نەمەسە بۇقارعا ەلىكتەۋ

ءسوز سالار ساباز تاپپاي سابالاققا،
جانارىم جاۋتاڭدايدى جاماعاتقا.
سىرەسىپ اكىم وتىر «اتكەنشەكتە»،
سىرا ءىشىپ اقىن وتىر ساياباقتا.
قاراباي قامشى ءۇيىرىپ قاناعاتقا،
اتىمتاي اداسىپ ءجۇر دالا جاقتا.
جۇلدىزىم جۇلدىز ەمەس، اينا-كوكتە
اينالىپ كەتكەن بىلەم قارا داققا...

جابىسىپ جارىم تۇندە جاراۋ اتقا
قاراقشى قاراشا ءۇيدى توناماق پا؟..
قاراتال ساۋساقتارىن تاربيتادى
قاپ-قارا جۇلدىزداردى ساناماققا.
قاسىندا قارايلايتىن بالا جوقتا،
قارا شال قارعىس ايتار قاعاناتقا.
قاراشا ءۇي،
قارا قورىم،
قايرا ن، اۋىل
قارايدى قامكوڭىلمەن قالا جاققا.
قاناتىن جايىپ ءبىر قۇس بار الاپقا،
تاراپقا تامۇق ءتۇنى تاراماق پا؟...
قاپ تاۋىن قارا بۇلت جايلاپ الىپ،
قاعبانى قارا تۇمان ورماق پا؟...
قۇدايىم بۇيىرماعان جاماناتقا–
جاي ءتۇستى جازاتايىم مانا باققا...
اققۋدىڭ قاۋىرسىن كوكتە قالقىپ،
قارعالار قارق-قارق كۇلەر جاعا جاقتا.
شالقۋعا، شالقايۋعا شاما جوقتا،
پاقىرعا، حاق تاعالا، تابالاتپا.
قالقايعان قارا باستان قانداي قايىر،
قاسىڭدا قاۋقىلداسار قارا جوقتا؟!
قايداعى قاعىلعان وي قاراقاتپا
قايتەسىڭ قاماپ، قاناپ بارا جاتسا؟
قارايتىن قاتىنعا دا بەت قالمادى
تاۋسىلعان اپپاق ۇنى قارا قاپشا.
بەسىكتە بەلى بەكەم بالا جوقتا
ەسىكتەن قىدىر بابا قاراماق پا؟..
وشاقتا ويناپ جاتىر وت پەن جالىن،
قازاندا قايناپ جاتىر قارا بوتقا.
سابىلىپ سوقا باسىم سان الاپقا،
سازانداي اۋناقشيدى سانام وتتا...
بۇيرەگىم بۇلك ەتپەيتىن بولىپ الدى
عايىپقا،
عاجايىپقا،
عالاماتقا....
اينالىپ جازعان باسىم الا دوپقا،
تاعدىرىم تاڭىلعانداي تاعالى اتقا.
اتساڭ وق، ايتساڭ ءسوزىڭ وتپەيتۇعىن،
شىنىمەن بۇل شىركىنگە شارا جوق پا؟

مەنiڭ مۇڭىم تەك قانا مەنiڭ قايعىم ەمەس قوي
مەنiڭ مۇڭىم تەك قانا مەنiڭ قايعىم ەمەس قوي،
قالعىپ كەتكەن قايمانا – قاڭعىپ جۇرگەن
ەلەستەي...
كوشتi قالاي تۇزەرمiن،
ەستi قالاي جيارمىن،
وڭ جاعىمنان جەل ەسپەي،
سول جاعىمنان ەل وسپەي؟

“بەتەگەدەن بيiكپiن، الاسامىن جۋساننان”...
كورiنە مە كوكجيەك كوز سۇزگەنمەن قۇر شاڭنان؟
الارماننىڭ سۇلەيi,
بەرەرمەننiڭ ۇرەيi –
اقىن قايدا بۋسانعان؟!
باتىر قايدا قۇرسانعان؟!

جاڭا تۋعان جاس بالا...
كiرپياز با، كiم ءوزi?
كiمگە ىرىس، كiمگە قۇت كiندiگiمنiڭ
كiنازi?
اۋىزدىعىن شايناعان ارعىماعىم بولماسا،
كiمگە كەرەك قازاقتىڭ قويداي قوڭىر مiنەزi?

زامان مىناۋ اپشىنعان ايداھارداي جالانىپ،
نە بولماقشى قاپتاسا قاراسپاندى قارا بۇلت؟..
قام-قاپەرسiز باسىما قايتا ورالماس كۇن كەلسە،
قاسقىر باسىم قانشىققا قالمايمىن با تالانىپ؟..

ەركە مiنەز ەز ەمەس،
ەركەك تەكتi ەل ەم عوي؟!.
ەكi كوزiم تەلمiردi-اۋ ەسiك جاققا ەلەڭدەي...
كوكبورiم-اۋ،
كوپ-كورiم قۋاردى ما بوكتەرiڭ،
بورiكتiرگەن كiم سەنi?
تۇسكە ءجۇرسiڭ نەگە ەنبەي؟

...مەنiڭ قايعىم تەك قانا مەنiڭ مۇڭىم ەمەس قوي؟!
قالعىپ كەتكەن قايمانا – قاڭعىپ جۇرگەن ەلەستەي...
كوشتi قالاي تۇزەرمiن،
ەستi قالاي جيارمىن،
وڭ جاعىمنان جەل ەسپەي،
سول جاعىمنان ەل وسپەي؟!

 

پىكىرلەر