اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ارتىستەرى ديرەكتوردى قىزمەتتەن الۋعا قارسىلىق ءبىلدىردى
الماتىدا اۋەزوۆ اتىنداعى قازاق مەملەكەتتىك اكادەميالىق دراما تەاترىندا بەس جىلدا ءۇش رەت باسشى اۋىسقان. ارتىستەر قازىرگى ديرەكتور ءسابيت ابدىحالىقوۆتى ورنىنان الۋعا قارسىلىق ءبىلدىردى.
ابدىحالىقوۆتىڭ دا تەاتر ديرەكتورى بولىپ تاعايىندالعانىنا نەبارى ءبىر جىل بولعان. ارتىستەردىڭ ايتۋىنشا، مادەنيەت ءمينيسترى ەندى ونى قىزمەتىنەن الماق، دەپ حابارلادى كتك.
"ونەر ورداسىنىڭ باسشىسى ءسابيت ابدىحالىقوۆ اۋىسادى" دەگەن سىبىس شىققالى ەشكىمنىڭ جۇمىس ىستەۋگە قۇلقى جوق.
ء"سابيتتى اۋىستىرۋعا قانداي سەبەپ بار؟ سونى بىزگە ايتىڭىزدارشى؟ اۋىستىرادى دەپ ەستىپ جاتىرمىز. ول كىسى بىردەڭە جەدى مە؟ ول كىسى زەينەتكە شىعا ما؟ جوق! قانداي سەبەپ؟ بىزگە نەگە ايتپايدى؟", - دەپ اشىندى اكتريسا راشيدا حادجيەۆا.
كوپشىلىك قۇزىرلى ۆەدوموستۆانىڭ قازىرگى ديرەكتوردى قىزمەتىنەن الۋ تۋرالى يدەياسىن قولدامايدى.
"تاعى ءبىر باستىق كەلىپ، تاعى تالان-تاراجعا سالسا، نە بولامىز؟ ءبىز تەاتردا ءار باستىقتىڭ جاعدايىن ويلاپ، اركىمنىڭ كوڭىلىنە قاراپ جۇرگەندە، ونەر قايدا قالادى؟ ءسابيت – كەرەمەت مەنەدجەر. كورەرمەنىمىزدى قايتاردى، اقشامىزدى قايتاردى", - دەپ اتاپ ءوتتى اكتريسا نۇرجان بەكسۇلتانوۆا.
ۇجىمداعىلار ءسابيت ابدىحالىقوۆتىڭ جۇمىسىنا رازى. ءبىر جىلدا جاڭا قويىلىمدار مەن كورەرمەن كوبەيگەن. سايكەسىنشە، كاسساداعى تابىس مولايىپتى. ەڭ باستىسى، تەاتردىڭ تالاي جىلعى قوردالانعان 10 ميلليوننان اسا قارىزى تولىق وتەلگەن. قازىر تەاتردىڭ باسشىسى اۋرۋحانادا. جۇرەگىنە بىرنەشە رەت وتا جاسالىپ، شەتەلدە ەم الىپ جاتىر ەكەن. ال ونىڭ ورىنباسارىنا ۆيتسە-مينيستر قىسىم جاساعانىن ايتادى.
ء"مينيستردىڭ اتىنان داۋەشوۆ مىرزانىڭ ءوزى ماعان "ارىز جازىپ، ءوز ەرىكتەرىڭمەن كەتىڭدەر" دەپ جازىپ جاتىر", - دەيدى تەاتر ديرەكتورىنىڭ ورىنباسارى الىبەك امىرسەيىتوۆ.
جاڭا جىلدان باستاپ ارتىستەرگە ءتۇرلى ساحنا كيىمىن تىگىپ، ساحنانى بەزەندىرەتىن قىزمەتكەرلەردىڭ جالاقىسى قىسقارعان. وسىلايشا ساحنا مايتالماندارى مينيستر باسشى تاعايىنداۋدان گورى، جاستارعا جاعداي جاساپ، جالاقىنى كوبەيتسە دەيدى. ال مينيسترلىكتىڭ بەرگەن جاۋابى كەرەعار.
"بۇگىنگى كۇنى جۇمىستان بوساتۋ دەگەن بىزدە وي جوق. بىراق جۇمىستىڭ تيىمدىلىگىنە قاراي، ونىڭ ىسكەرلىگىنە قاراي، ارى قاراي "بۇل جۇمىستى الىپ كەتە الا ما، الىپ كەتە الماي ما؟" دەگەن ماسەلە تۋىنداۋى مۇمكىن. سونىمەن قاتار ۇجىمنىڭ پىكىرى بىزگە ماڭىزدى", - دەپ ءتۇسىندىردى مادەنيەت جانە سپورت مينيسترلىگى، مادەنيەت جانە ونەر ىستەرى دەپارتامەنتىنىڭ ديرەكتورى كۇمىس سەيىتوۆا.
ونەر ۇجىمى تەاتر ديرەكتورىنىڭ اۋىسۋىنا قاتىستى اڭگىمەنى الداعى بولاتىن كۇردەلى جوندەۋمەن بايلانىستىرىپ وتىر. جاڭا ماۋسىم اياقتالسا، تەاتر 2-3 جىلعا كۇردەلى جوندەۋگە جابىلادى ەكەن.
"بۇل دەگەنىمىز قىرۋار اقشا", - دەيدى وسىنداعىلار. سوندىقتان ونەر ۇجىمى مادەنيەت جانە سپورت ءمينيسترى اقتوتى رايىمقۇلوۆامەن جۇزبە-ءجۇز كەزدەسۋدى تالاپ ەتىپ وتىر.
Sputnik.
