Áýezov atyndaǵy Qazaq memlekettik akademııalyq drama teatrynyń ártisteri dırektordy qyzmetten alýǵa qarsylyq bildirdi
Almatyda Áýezov atyndaǵy Qazaq memlekettik akademııalyq drama teatrynda bes jylda úsh ret basshy aýysqan. Ártister qazirgi dırektor Sábıt Ábdihalyqovty ornynan alýǵa qarsylyq bildirdi.
Ábdihalyqovtyń da teatr dırektory bolyp taǵaıyndalǵanyna nebári bir jyl bolǵan. Ártisterdiń aıtýynsha, mádenıet mınıstri endi ony qyzmetinen almaq, dep habarlady KTK.
"Óner ordasynyń basshysy Sábıt Ábdihalyqov aýysady" degen sybys shyqqaly eshkimniń jumys isteýge qulqy joq.
"Sábıtti aýystyrýǵa qandaı sebep bar? Sony bizge aıtyńyzdarshy? Aýystyrady dep estip jatyrmyz. Ol kisi birdeńe jedi me? Ol kisi zeınetke shyǵa ma? Joq! Qandaı sebep? Bizge nege aıtpaıdy?", - dep ashyndy aktrısa Rashıda Hadjıeva.
Kópshilik quzyrly vedomostvanyń qazirgi dırektordy qyzmetinen alý týraly ıdeıasyn qoldamaıdy.
"Taǵy bir bastyq kelip, taǵy talan-tarajǵa salsa, ne bolamyz? Biz teatrda ár bastyqtyń jaǵdaıyn oılap, árkimniń kóńiline qarap júrgende, óner qaıda qalady? Sábıt – keremet menedjer. Kórermenimizdi qaıtardy, aqshamyzdy qaıtardy", - dep atap ótti aktrısa Nurjan Beksultanova.
Ujymdaǵylar Sábıt Ábdihalyqovtyń jumysyna razy. Bir jylda jańa qoıylymdar men kórermen kóbeıgen. Sáıkesinshe, kassadaǵy tabys molaıypty. Eń bastysy, teatrdyń talaı jylǵy qordalanǵan 10 mıllıonnan asa qaryzy tolyq ótelgen. Qazir teatrdyń basshysy aýrýhanada. Júregine birneshe ret ota jasalyp, shetelde em alyp jatyr eken. Al onyń orynbasaryna vıe-mınıstr qysym jasaǵanyn aıtady.
"Mınıstrdiń atynan Dáýeshov myrzanyń ózi maǵan "aryz jazyp, óz erikterińmen ketińder" dep jazyp jatyr", - deıdi teatr dırektorynyń orynbasary Álibek Ámirseıitov.
Jańa jyldan bastap ártisterge túrli sahna kıimin tigip, sahnany bezendiretin qyzmetkerlerdiń jalaqysy qysqarǵan. Osylaısha sahna maıtalmandary mınıstr basshy taǵaıyndaýdan góri, jastarǵa jaǵdaı jasap, jalaqyny kóbeıtse deıdi. Al mınıstrliktiń bergen jaýaby kereǵar.
"Búgingi kúni jumystan bosatý degen bizde oı joq. Biraq jumystyń tıimdiligine qaraı, onyń iskerligine qaraı, ary qaraı "bul jumysty alyp kete ala ma, alyp kete almaı ma?" degen másele týyndaýy múmkin. Sonymen qatar ujymnyń pikiri bizge mańyzdy", - dep túsindirdi mádenıet jáne sport mınıstrligi, mádenıet jáne óner isteri departamentiniń dırektory Kúmis Seıitova.
Óner ujymy teatr dırektorynyń aýysýyna qatysty áńgimeni aldaǵy bolatyn kúrdeli jóndeýmen baılanystyryp otyr. Jańa maýsym aıaqtalsa, teatr 2-3 jylǵa kúrdeli jóndeýge jabylady eken.
"Bul degenimiz qyrýar aqsha", - deıdi osyndaǵylar. Sondyqtan óner ujymy mádenıet jáne sport mınıstri Aqtoty Raıymqulovamen júzbe-júz kezdesýdi talap etip otyr.
Sputnik.
