تاۋەلسىز جۋرناليست روبين اكرويد «ۇلى قولباسشى شىڭعىسحاننىڭ جوعالعان مولاسىن تاپتىم» دەپ، جارتى الەمگە جار سالدى.
«بۇل مالىمدەمە ونىڭ — «شىڭعىسحان: كيەلى مازار، جۇمباق قازىنا» (“Genghis: Sacred Tomb, Secret Treasure”) كىتابىنا ەنگەن»، — دەپ حابارلايدى بريتاندىق رressgazette باسىلىمى (29 قاڭتار، 2016 جىل).
اكرويد بەلگىسىز مولانىڭ ورنى سولتۇستىك موڭعولياداعى بيىك تاۋدىڭ باسىندا دەپ ەسەپتەيدى. ونىڭ جانىندا نەمەرەسى قۇبىلايدىڭ جاتقانى جايلى دا اقپار بەرەدى.
ول اتتى ەكسپەديتسيا قاتارىندا سايىن دالانى كەزىپ، كوشپەندىلەر اراسىندا ءومىر ءسۇرىپ، «ۇلكەن جۇمباق عيباداتحانا» شولىمەن 700 كم ءجۇرىپ شىققان.
جۋرناليست ۇلى قولباسشىنىڭ 1227 جىلدىڭ تامىزىندا قازىرگى سولتۇستىك قىتاي اۋماعىندا دۇنيە سالعانىنا قاراماستان، دەنەسى جەرلەنۋى ءۇشىن موڭعوليا اۋماعىنا جەتكىزىلگەن دەگەن قورىتىندىعا كەلىپتى.
ول ءوز كىتابىندا: «شىڭعىسحان قىتاي جەرىندەگى ىشكى موڭعوليالىق وردوستا جەرلەنبەگەن. ونىڭ اتاقتى كەسەنەسى ءجاي عانا ەسكەرتكىش. سونىمەن قاتار، حان جەرلەنگەن جەردى ۇرانحاي تايپاسى كۇزەتكەن. ولار سالىق پەن اسكەري قىزمەتتەن بوساتىلعان. سول سەبەپتى، قاعاندى جەرگە تاپسىرۋ ءراسىمىنىڭ كۋاسى بولعان كۇزەتشىلەر تۋرالى دەرەكتەن ولاردىڭ ءولىم جازاسىنا كەسىلگەنىن تۇسىنۋگە بولادى» دەگەن.
ەجەلگى موڭعول دەرەكتەرىن اۋدارعاننان سوڭ جانە ءوزىنىڭ جەردەگى زەرتتەۋلەرىنەن كەيىن اكرويد ۇلى قاعاننىڭ اقىرعى مەكەنى تۋرالى بۇرىنعى تەوريالار مەن دەرەكتەردى جوققا شىعارىپ وتىر. سونىمەن قاتار، جۋرناليست ءوزىنىڭ تەورياسىنىڭ موڭعول ۇكىمەتىمەن ماقۇلدانعانىن ايتادى.
