يتاليانىڭ ۆەنەتو اۋدانىندا ۆەنەتسيا كارناۆالىن وتكىزۋگە تىيىم سالدى. بۇل تۋرالى carnevale.venezia.it سايتىنا سىلتەمە جاساپ، قازاقپارات حابارلادى.
شارانىڭ توقتالۋىنا كوروناۆيرۋستىڭ تارالىپ كەتۋى قاۋپى سەبەپ بولعان.
«ۆەنەتسيا كارناۆالىنىڭ كوپشىلىككە ارنالعان ءىس-شارالارىن بارلىق قۇزىرلى ورگاندارمەن كەلىسە وتىرىپ، ەكى كۇن بۇرىن توقتاتىلدى»، دەلىنگەن ۇيىمداستىرۋشىلار تاراتقان حابارلامادا. 2
3 اقپان كۇنگى مالىمەت بويىنشا، يتاليانىڭ لومبارديا جانە ۆەنەتو پروۆينتسيالارىنداعى 12 قالاعا كوروناۆيرۋسقا بايلانىستى كارانتين ەنگىزىلدى، ەلدىمەكەندەردەگى 50 مىڭعا جۋىق تۇرعىن ۇيدە قالۋعا ءماجبۇر. ەسكە سالا كەتسەك، يتاليادا كوروناۆيرۋستان ءۇشىنشى ادام قايتىس بولدى. قازىرگى ۋاقىتتا 152 ادام اۋرۋعا شالدىققان. سەنبى كۇنى يتاليا ۇكىمەتى ەكى ادام قايتىس بولعاننان كەيىن كوروناۆيرۋسپەن كۇرەس بويىنشا «توتەنشە شارالار» قاراستىراتىنىن مالىمدەپ، ەلدىڭ سولتۇستىك ايماعىنىڭ تۇرعىندارىنا ءوز ۇيلەرىنەن شىقپاۋعا كەڭەس بەردى.
سونىمەن قاتار، ميلانداعى «لا سكالا» تەاترى جەكسەنبى كۇنى كوروناۆيرۋس ينفەكتسياسىنا بايلانىستى ساقتىق ءۇشىن جۇمىسىن توقتاتقانىن ءمالىم ەتتى. بۇل تۋرالى اقپارات تەاتردىڭ Facebook-تەگى پاراقشاسىندا جاريالاندى.
