ۇلتتىق قاۋىپسىزدىك كوميتەتىنىڭ قىزمەتكەرلەرى قارۋ-جاراق ۇرلاماقشى بولعانداردى ۇستادى، - دەپ حابارلايدى Tengrinews.kz تىلشىسى ۇقك سايتىنا سىلتەمە جاساپ.
كوميتەتتىڭ مالىمەتىنشە، الماتى قالاسى مەن الماتى وبلىسىنىڭ 10 تۇرعىنى قىلمىستىق جاۋاپكەرشىلىككە تارتىلدى.
زاڭسىز اينالىمنان 3 "كالاشنيكوۆ" اۆتوماتى، 3 گراناتااتقىش، 2 جاۋىنگەرلىك گراناتا، 14 پيستولەت، 1700-دەن اcا پاترون مەن قارۋدىڭ كەرەك-جاراقتارى الىندى.
"سوتقا دەيىنگى تەرگەپ-تەكسەرۋ بارىسىندا ىشكى ىستەر ورگاندارى قىزمەتكەرىنىڭ قىلمىستىق قۇقىق بۇزۋشىلىققا قاتىسۋ فاكتىسى انىقتالدى. لاۋازىمدى ادام قر ءىىم تەڭگەرىمىندە تۇرعان وق-دارىلەردى ۇرلاۋدى جۇزەگە اسىرعان. سونىمەن قاتار، قارۋ قۇراستىرۋ بويىنشا جاسىرىن شەبەرحانانىڭ ارەكەتى توقتاتىلدى", - دەلىنگەن كوميتەتتىڭ سايتىندا.
27 قاڭتاردا الماتى قالاسى المالى اۋداندىق سوتىنىڭ ۇكىمىمەن سوتتالۋشىلار ءارتۇرلى مەرزىمدەرگە باس بوستاندىقتارىنان ايرىلدى.
