"قازاتومونەركاسىپ" كومپانياسىنىڭ بۇرىنعى جەتەكشىسى، قازاقستاندىق قۇقىق قورعاۋشىلار "ساياسي تۇتقىن" ساناتىنا قوسقان مۇحتار جاكىشەۆ شارتتى جازامەن بوستاندىققا شىعاتىن بولدى. بۇگىن، 3 ناۋرىزدا سەمەي قالالىق №2 سوتى مۇحتار جاكىشەۆتىڭ مەرزىمىنەن ەرتە بوساتۋ تۋرالى ءۇشىنشى ءوتىنىشىن قاناعاتتاندىردى.
سوت شەشىمى بويىنشا، مۇحتار جاكىشەۆ "پروباتسيالىق باقىلاۋعا الىنادى، جازا مەرزىمى تولىق اياقتالمايىنشا قازاقستان اۋماعىنان شىعارىلمايدى"
سوت وتىرىسىنا قازاقستاننىڭ ءار تۇكپىرىنەن قوعام بەلسەندىلەرى مەن مۇحتار جاكىشەۆتى قولداۋشىلار جينالدى. ولار سوت باستالماي تۇرىپ زالدا مۇحتار جاكىشەۆكە بوستاندىق سۇراپ، ۇرانداتتى. سوتقا مۇحتار جاكىشەۆ سكايپ ارقىلى قاتىستى.
بىلتىر 24 شىلدەدە سەمەي قالاسىنىڭ №2 سوتى تۇرمەدە وتىرعانىنا 10 جىلدان اسقان مۇحتار جاكىشەۆتىڭ شارتتى جازامەن مەرزىمىنەن بۇرىن بوستاندىققا شىعارۋ تۋرالى ءوتىنىشىن قاناعاتتاندىرۋدان باس تارتقان. سەمەي سوتى "جاكىشەۆ مەملەكەتكە كەلتىرگەن 99,6 ميلليارد تەڭگە (قازىرگى كۋرسپەن 258 ميلليون دوللار) شىعىندى وتەمەگەنىن" ايتقان. قىركۇيەك ايىنداعى اپەللياتسيالىق سوت بۇرىنعى شەشىمدى وزگەرتپەدى.
سوتتىڭ الدىندا جانە ودان كەيىن قازاقستاننىڭ بىرنەشە قالاسىندا بيلىكتەن جاكىشەۆتى بوساتۋدى تالاپ ەتكەن نارازىلىق اكتسيالارى ءوتتى.
مۇحتار جاكىشەۆتى ساياساتتانۋشىلار "بىلىكتى مەنەدجەر" دەپ سانايدى. ول 2009 جىلى مامىردىڭ 21-ىنە "قازاتومونەركاسىبى" كومپانياسىنىڭ باسشىسى قىزمەتىنەن الىنىپ، مامىردىڭ 24-ىنە تۇتقىندالعان. "ۆەنادا (اۆستريا) "قازاتومونەركاسىپ" كومپانياسىنىڭ زاڭسىز وكىلدىگىن اشۋ ارقىلى پايدا تاپتى، استىرتىن كاسسا ۇستادى، كۇزەتشىسىنە قوسىمشا ەڭبەكاقى تولەپ كەلگەن" دەگەن ايىپپەن 14 جىلعا سوتتالعان.
2012 جىلى ماۋسىم ايىندا مۇحتار جاكىشەكتىڭ ۇستىنەن قوزعالعان تاعى ءبىر ءىس بويىنشا استانا قالاسىنداعى سارىارقا اۋدانىنىڭ №2 سوتى ۇكىم شىعاردى.
وعان ء"ىرى كولەمدەگى الاياقتىق" (قىلمىستىق كودەكستىڭ 177-بابى) جانە "وزىنە سەنىپ تاپسىرىلعان بوتەن مۇلكىن يەمدەنىپ، شىعىنداۋ" (176-باپ), "زاڭداستىرۋ" (193-باپ), "قىلمىستىق توپ قۇرۋ" (235-باپ), "قىزمەتتىك وكىلەتىن اسىرا پايدالانۋ" (307-باپ) باپتارى بويىنشا ايىپتار تاعىلىپ، 10 جىلعا باس بوستاندىعىنان ايىرۋ جازاسىن بەلگىلەدى. بۇل جازا بۇرىنعى 14 جىلدىق جازامەن بىرىكتىرىلدى. ەكىنشى قىلمىستىق ءىس بويىنشا سوت وتىرىستارىنا مۇحتار جاكىشەۆ پەن ونىڭ ءوزى جالداعان ادۆوكاتتارى قاتىسپاعان.
تۇرمەدە وتىرعان كەزدە ءۇشىنشى توپ مۇگەدەكتىگىن العان جاكىشەۆ وزىنە تاعىلعان ايىپتارمەن كەلىسپەيدى.
قازاقستاندىق قۇقىق قورعاۋشىلار جاكىشەۆتى "ساياسي تۇتقىندار" تىزىمىنە قوسقان. قۇقىق قورعاۋشىلار "جاكىشەۆ ەلدەن قاشقان مۇحتار ابليازوۆپەن (بۇرىنعى بانكير، قازاقستان بيلىگىن سىناۋشى) ارالاسقانى ءۇشىن قىسىمعا ۇشىرادى" دەپ سانايدى. قازاقستان بيلىگى ەلدە "ساياسي تۇتقىندار جوق" دەپ ەسەپتەيدى.
حالىقارالىق ۇيىمدار دا بىرنەشە رەت قازاقستان بيلىگىنەن جاكىشەۆكە بوستاندىق بەرۋدى سۇراعان. 2015 جىلى جاكىشەۆتىڭ شاعىمىن قاراعان بىرىككەن ۇلتتار ۇيىمىنىڭ ادام قۇقىقتارى جونىندەگى كوميتەتى ونىڭ قۇقىعى بۇزىلعانىن راستاپ، قازاقستان بيلىگىن تۇتقىندى بوساتۋعا شاقىرعان. 2018 جىلى ناۋرىز ايىندا حەلسينكي كوميتەتى جانە "ورتالىق ازياداعى ادام قۇقىعى" قاۋىمداستىعى قازاقستاننىڭ سول كەزدەگى پرەزيدەنتى نۇرسۇلتان نازارباەۆقا اشىق حات جازىپ، "ناۋقاس ساياسي تۇتقىن" مۇحتار جاكىشەۆكە "ادامشىلىق تانىتىپ" تۇرمەدەن بوساتۋدى سۇراعان.
