"Qazatomónerkásip" kompanııasynyń burynǵy jetekshisi, qazaqstandyq quqyq qorǵaýshylar "saıası tutqyn" sanatyna qosqan Muhtar Jákishev shartty jazamen bostandyqqa shyǵatyn boldy. Búgin, 3 naýryzda Semeı qalalyq №2 soty Muhtar Jákishevtiń merziminen erte bosatý týraly úshinshi ótinishin qanaǵattandyrdy.
Sot sheshimi boıynsha, Muhtar Jákishev "probaııalyq baqylaýǵa alynady, jaza merzimi tolyq aıaqtalmaıynsha Qazaqstan aýmaǵynan shyǵarylmaıdy"
Sot otyrysyna Qazaqstannyń ár túkpirinen qoǵam belsendileri men Muhtar Jákishevti qoldaýshylar jınaldy. Olar sot bastalmaı turyp zalda Muhtar Jákishevke bostandyq surap, urandatty. Sotqa Muhtar Jákishev skaıp arqyly qatysty.
Byltyr 24 shildede Semeı qalasynyń №2 soty túrmede otyrǵanyna 10 jyldan asqan Muhtar Jákishevtiń shartty jazamen merziminen buryn bostandyqqa shyǵarý týraly ótinishin qanaǵattandyrýdan bas tartqan. Semeı soty "Jákishev memleketke keltirgen 99,6 mıllıard teńge (qazirgi kýrspen 258 mıllıon dollar) shyǵyndy ótemegenin" aıtqan. Qyrkúıek aıyndaǵy apellıaııalyq sot burynǵy sheshimdi ózgertpedi.
Sottyń aldynda jáne odan keıin Qazaqstannyń birneshe qalasynda bılikten Jákishevti bosatýdy talap etken narazylyq akııalary ótti.
Muhtar Jákishevti saıasattanýshylar "bilikti menedjer" dep sanaıdy. Ol 2009 jyly mamyrdyń 21-ine "Qazatomónerkásibi" kompanııasynyń basshysy qyzmetinen alynyp, mamyrdyń 24-ine tutqyndalǵan. "Venada (Avstrııa) "Qazatomónerkásip" kompanııasynyń zańsyz ókildigin ashý arqyly paıda tapty, astyrtyn kassa ustady, kúzetshisine qosymsha eńbekaqy tólep kelgen" degen aıyppen 14 jylǵa sottalǵan.
2012 jyly maýsym aıynda Muhtar Jákishektiń ústinen qozǵalǵan taǵy bir is boıynsha Astana qalasyndaǵy Saryarqa aýdanynyń №2 soty úkim shyǵardy.
Oǵan "iri kólemdegi alaıaqtyq" (qylmystyq kodekstiń 177-baby) jáne "ózine senip tapsyrylǵan bóten múlkin ıemdenip, shyǵyndaý" (176-bap), "zańdastyrý" (193-bap), "qylmystyq top qurý" (235-bap), "qyzmettik ókiletin asyra paıdalaný" (307-bap) baptary boıynsha aıyptar taǵylyp, 10 jylǵa bas bostandyǵynan aıyrý jazasyn belgiledi. Bul jaza burynǵy 14 jyldyq jazamen biriktirildi. Ekinshi qylmystyq is boıynsha sot otyrystaryna Muhtar Jákishev pen onyń ózi jaldaǵan advokattary qatyspaǵan.
Túrmede otyrǵan kezde úshinshi top múgedektigin alǵan Jákishev ózine taǵylǵan aıyptarmen kelispeıdi.
Qazaqstandyq quqyq qorǵaýshylar Jákishevti "saıası tutqyndar" tizimine qosqan. Quqyq qorǵaýshylar "Jákishev elden qashqan Muhtar Áblıazovpen (burynǵy bankır, Qazaqstan bıligin synaýshy) aralasqany úshin qysymǵa ushyrady" dep sanaıdy. Qazaqstan bıligi elde "saıası tutqyndar joq" dep esepteıdi.
Halyqaralyq uıymdar da birneshe ret Qazaqstan bıliginen Jákishevke bostandyq berýdi suraǵan. 2015 jyly Jákishevtiń shaǵymyn qaraǵan Birikken ulttar uıymynyń adam quqyqtary jónindegi komıteti onyń quqyǵy buzylǵanyn rastap, Qazaqstan bıligin tutqyndy bosatýǵa shaqyrǵan. 2018 jyly naýryz aıynda Helsınkı komıteti jáne "Ortalyq Azııadaǵy adam quqyǵy" qaýymdastyǵy Qazaqstannyń sol kezdegi prezıdenti Nursultan Nazarbaevqa ashyq hat jazyp, "naýqas saıası tutqyn" Muhtar Jákishevke "adamshylyq tanytyp" túrmeden bosatýdy suraǵan.
