سەنات توراعاسى داريعا نازارباەۆا بيزنەسكە بەرىلەتىن يندۋستريالدى سەرتيفيكات قىزمەتىن مەملەكەتكە قايتارۋدى ۇسىندى دەپ حابارلايدى Dalanews.kz.
پارلامەنت وتىرىسىندا ەلىمىزدەگى جەڭىل ونەركاسىپ ماسەلەسى ءسوز بولىپ، سەناتور سەرىك جاقسىبەكوۆ بيزنەسكە بەرىلەتىن يندۋستريالدى سەرتيفيكات قىزمەتىن سىنادى.
“بىلاي قاراعاندا جەپ-جەڭىل جۇمىس سەكىلدى. كومپانيا سەرتيفيكات الۋ ءۇشىن (“اتامەكەنگە” رەد.) ءوتىنىش جولدايدى. ءسويتىپ 2 ايدان 6 ايعا دەيىنگى ارالىقتا الگى ءوتىنىشتى سارىلىپ كۇتەدى. ءوتىنىشتى قابىلداپ العاندار نە حابارىن ايتپايدى، نە جاۋابىن جولدامايدى. تىپتەن تۇسىنىكسىز.
سەرتيفيكات الۋدىڭ ەرەجەسىنە ساي كومپانياعا ساراپشى كەلىپ، باعالاۋ جۇمىسىن جۇرگىزۋ كەرەك ەكەن.
سەرتيفيكاتتى وتكىزىپ قويعان كاسىپورىن الگى ساراپشىنى اپتالاپ، ايلاپ كۇتەدى. ونىڭ قاشان، قاي مەزگىلدە كەلەتىنى حابارلانبايدى. مىنەكەي، كورىپ شىعىڭىز…”، – دەگەن جاقسىبەكوۆ قولىنداعى قاعازدى نازارباەۆاعا ۇستاتتى.
“ول جاقتاعىلار سىزدەر كوتەرگەن ماسەلەدەن قۇلاعدار. بۇل جۇمىستى بارىنشا ىقشامداپ، جۇيەلەۋگە تىرىسىپ جاتىر…”، – دەدى شولپانقۇلوۆ.
نازارباەۆا “اتامەكەننىڭ” كاسىپكەرلەرگە بەرەتىن يندۋستريالدى سەرتيفيكات قىزمەتىن سىناپ، بۇل جۇمىستى مەملەكەت قۇزىرەتىنە قايتارۋدى ۇسىندى.
“بۇل ءىستى مەملەكەتكە جۇكتەۋ كەرەك. جالپى ءتۇرلى سەرتيفيكات تابىستايتىن قىزمەت تۇرلەرىن مەملەكەت جاۋاپكەرشىلىگىنە قايتارعان ءجون. نەگە؟ “اتامەكەن” بۇل ءىستى اكەتە الماي وتىرعانىن وزدەرىڭىز ايتتىڭىزدار. ناتيجەسى شامالى ەكەن. سەرتيفيكات تابىستاۋدىڭ ءوزىن پارا الىپ، پارا بەرەتىن الاڭقايعا اينالدىرىپتى.
ونىڭ ۇستىنە يندۋستريالدى سەرتيفيكاتتار مەملەكەتتىك تاپسىرىستىڭ ستاندارتىنا ساي ەمەس. مۇندا دا جەڭ ۇشىنان جالعاسقان جەمقورلىقتى اڭعارامىز. سۇراعانىن بەرسە، الگى سەرتيفيكاتتى كىم كورىنگەن الۋى مۇمكىن.
جالپى بۇل سالاداعى بىلىق باستان اسادى. سەرتيفيكات بەرۋدى مەملەكەتكە قايتارىپ، ءتارتىپ ورناتۋ كەرەك”، – دەدى داريعا نازارباەۆ.
يندۋستريالدى سەرتيفيكات كاسىپورىننىڭ ءونىم وندىرەتىنىن راستايتىن قۇجات. ءوتىنىش بەرۋشىنىڭ تەحنيكالىق، تەحنولوگيالىق، رەسۋرستىق مۇمكىندىكتەرى بار ەكەنىن كورسەتەدى، ءونىم وندىرۋگە شاماسى جەتەتىندىگىن ايعاقتايدى، تىزىمدە كورسەتىلگەن قىزمەت اۋقىمىن كورسەتۋگە قاۋقارى جەتەتىنىن دالەلدەيدى.
جەڭىل ونەركاسىپپەن اينالىساتىن جانە جيھاز ازىرلەيتىن كاسىپكەرلەردەن مەملەكەتتىك ساتىپ الۋعا قاتىسۋ ءۇشىن يندۋستريالدى سەرتيفيكات تالاپ ەتىلەدى.
“اتامەكەن” وسى ارقىلى اتى بار، زاتى جوق كاسىپورىندارمەن كۇرەسەتىنىن ايتقان.
ء“بىز جەڭىل ونەركاسىپ ونىمدەرىن ەكسپورتتاعاننان گورى، 17 ەسە كوپ يمپورتتايمىز.
قازىرگى كەزدە قازاقستاندا جەڭىل ونەركاسىپكە كوبىنەسە ۆەدومستۆولىق مەملەكەتتىك تاپسىرىستار ارقىلى قولداۋ جاسالىپ وتىر، سولاردىڭ ەسەبىنەن كاسىپورىندار جۇمىسىن جالعاستىرۋدا. بىراق ءتۇرلى سەبەپتەرگە بايلانىستى بۇل كاسىپورىندارعا تەحنولوگيالىق تۇرعىدان دامۋعا، اسسورتيمەنتتى كەڭەيتۋگە مۇمكىندىك بەرمەيدى.
مەملەكەتتىك ساتىپ الۋعا الىپ-ساتارلار كوپ قاتىسادى. تاپسىرىس بەرۋشى تومەن باعاعا قىزىعىپ، ساپاسىز يمپورتتىق تاۋار الادى. ناتيجەسىندە بيۋدجەت قاراجاتى ەلدەن شىعارىلىپ، باسقا ەلدەردىڭ ەكونوميكاسىن دامىتۋعا دەمەۋشى بولادى”، – دەيدى ءوز كەزەگىندە داريعا نازارباەۆ.
