رەسەي عالىمدارىنىڭ زەرتتەۋىنشە، كوروناۆيرۋستى «تەجەۋگە» قابىلەتتى ىستىق جانە قۇرعاق اۋا رايى ماۋسىمنىڭ باسىندا بولادى. سوندىقتان رەسەي وقىمىستىلارى «ۆيرۋستىڭ تولىق جويىلىپ كەتۋى ءۇشىن ماۋسىمنىڭ اياعى مەن شىلدە ايىن كۇتۋ كەرەك» دەپ وتىر. گيدرومەتورتالىعىنىڭ عىلىمي جەتەكشىسى رومان ۆيلفاند ريا نوۆوستي سايتىنا بەرگەن سۇحباتىندا وسىلاي دەگەن.
«ەگەر 25-28 تەمپەراتۋرا تۋرالى ايتاتىن بولساق، ول ەۋروپالىق اۋماقتىڭ وڭتۇستىگىندە جانە ازيادان ماۋسىم ايىنىڭ باسىندا كليمات مالىمەتتەرى بويىنشا ورناتىلادى. بىراق كليمات بويىنشا كۇننىڭ قاتتى ىسيتىن كەزى شىلدە ايىنىڭ باسى»،-دەيدى سينوپتيك.
ونىڭ بۇل پىكىرىن بيولوگيا عىلىمدارىنىڭ دوكتورى، GMU (اقش) جۇيەلىك بيولوگيا مەكتەبىنىڭ پروفەسسورى انچا بارانوۆا دا قۋاتتاپ وتىر.
«جەر بەتىندە قاتتى ىستىق بولعاندا ۆيرۋس تەجەلەدى. ىلعالدى سالقىن تەمپەراتۋدا ۆيرۋستىڭ ساقتالۋى ءۇش كۇن بولسا، ىستىق اۋا رايى كەزىندە ول جەردە ءۇش ساعات «وتىرۋى» مۇمكىن. مىنە، وسىنىڭ ارقاسىندا جۇقتىرعاندار سانى ازايادى. ۆيرۋس ماۋسىم، شىلدە ايىندا تەجەلۋى كەرەك»، - دەيدى بارانوۆا.
الايدا يتالياندىق ۆيرۋسولوگ روبەرتو بۋريوني جازدا پاندەميا جىلىنۋ سالدارىنان قۇلدىراۋى مۇمكىن دەگەن ءميفتى جوققا شىعارىپ وتىر. مامان ۆيرۋسپەن كۇرەستە كەيبىر مەملەكەتتەر ەنگىزگەن شەكتەۋ شارالارى عانا ءتيىمدى ەكەنىن اتاپ ءوتتى. سوندىقتان "جازدا ۆيرۋس كەتەدى",-دەپ ارقانى كەڭگە سالۋعا تاعى بولمايدى
