قر يندۋستريا جانە ينفراقۇرىلىمدىق دامۋ ءبىرىنشى ۆيتسە-ءمينيسترى قايىربەك وسكەنباەۆ «COVID-19» كوروناۆيرۋستىق ينفەكتسياسىن تاراتپاۋ باعىتىندا اتقارىلىپ جاتقان جۇمىستار تۋرالى ايتىپ بەردى.
ۆيتسە ءمينيستردىڭ دەرەگىنشە، قازىرگى كەزدە تەمىرجول سالاسىندا 125 مىڭ، اۋە قاتىناسىندا - 20 مىڭ، قۇرىلىستا - 600 مىڭ ادام جۇمىس ىستەيدى. ولار جۇمىستان قىسقارتىلمايتىن كورىنەدى.
يندۋستريا جانە ينفراقۇرىلىمدىق دامۋ مينيسترلىگى «قازاقتەلەكوم» اق-مەن بىرلەسىپ، «كولىك باعىتتارىنىڭ ونلاين كارتاسىن» ازىرلەگەن. وسى كارتانىڭ كومەگىمەن ونلاين رەجىمدە كولىك قاتىناستارىن قاراپ وتىرۋعا بولادى. كارانتين ەنگىزىلگەن قالالار قىزىل تۇسپەن بەلگىلەنىپتى.
ۆيتسە ءمينيستردىڭ ايتۋىنشا، تەمىرجول قاتىناسىندا جولاۋشىلاردىڭ ءجۇرۋى توقتاعان، بىراق جۇك تاسىمالى بولا بەرەدى.
"تەمىرجول كولىگى سالاسىندا ەل اۋماعىندا توتەنشە جاعداي جانە جەكەلەگەن قالالاردا كارانتيندىك رەجىم ەنگىزىلگەن ساتتەن باستاپ قازاقستان اۋماعىنا باعىتتالعان كورشى تەمىرجول اكىمشىلىكتەرىنىڭ بارلىق حالىقارالىق پويىزدارى، «قتج» ۇك» اق حالىقارالىق جولاۋشىلار جانە قالاماڭى پويىزدارى توقتاتىلدى.
ەلىمىز بويىنشا قاتەرلى دەرتتى جۇقتىرعاندار سانىنىڭ ارتۋىنا بايلانىستى اكىمدىكتەر تەمىرجولمەن تۇرعىندار قوزعالىسىن قوسىمشا شەكتەۋ بويىنشا شارالار قابىلدادى. تەمىرجول شارۋاشىلىعى قىزمەتكەرلەرىن تاسىمالداۋعا ارنالعان پويىزداردى قوسپاعاندا قازاقستان اۋماعىندا قاتىنايتىن بارلىق تەمىرجول جولاۋشىلار پويىزدارى توقتاتىلدى. جالپى العاندا، 133 جۇپ جولاۋشىلار جانە قالاماڭى پويىزدارىنىڭ ءجۇرۋى شەكتەلىپ، قالعان 24 پويىز بويىنشا بارىنشا ساقتىق شارالارى قابىلدانادى. حابارلاسقان كۇنىنە قاراماستان جولاۋشىلارعا ساتىپ العان بيلەتتەرىنىڭ قۇنى تولىق كولەمدە قايتارىلادى، - دەپ اتاپ ءوتتى.
ال اۆتوموبيل كولىگىنىڭ بارلىق تۇرلەرىمەن قىتاي، رەسەي، قىرعىزستان، وزبەكستان جانە موڭعوليامەن ەكىجاقتى جولاۋشىلار جانە جۇك تاسىمالداۋ، ونىڭ ىشىندە 117 تۇراقتى باعىت، سونداي-اق ترانزيتتىك جولاۋشىلار تاسىمالى توقتاتىلعان. بىراق، بۇل تىيىم سانيتارلىق-ەپيدەميولوگيالىق تالاپتاردى ساقتاي وتىرىپ، جۇزەگە اسىرىلاتىن حالىقارالىق قاتىناستاعى جۇك اۆتوكولىگى قۇرالدارىمەن جۇك تاسىمالداۋعا تارالمايدى.
وسكەباەۆ وڭىرلەردە كارانتين ەنگىزىلگەنگە دەيىنگى جانە ودان كەيىنگى اۆتوموبيل كولىگىمەن جولاۋشىلار تاسىمالداۋدى شەكتەۋ بويىنشا ۇسىنىستار بەرىلگەنىن حابارلادى. "ول اۆتوۆوكزالدار، اۆتوبەكەتتەر مەن جولاۋشىلارعا قىزمەت كورسەتۋ تىرەكتەرى جۇمىسىن، قالالىق تاسىمالدى قوسپاعاندا اۆتوكولىكپەن جولاۋشىلار تاسىمالىنىڭ بارلىق ءتۇرىن توقتاتۋ; تۇراقتى قالالىق جانە قالاماڭى اۆتوبۋس تاسىمالىن 50%-عا جانە ودان كوپ كولەمدە، سونداي-اق ولاردىڭ تۇراقتىلىعىن شەكتەۋ; تۇراقتى قالالىق جانە قالاماڭى اۆتوبۋس تاسىمالىنىڭ كۇن سايىنعى جۇمىس ۋاقىتىن كارانتين ەنگىزىلگەن وڭىرلەردە ساعات 19-00-گە دەيىن، وزگە وڭىرلەردە ساعات 21-00-گە دەيىن شەكتەۋ; قالالىق جانە قالاماڭى تاسىمالىنداعى اۆتوبۋس سالوندارىندا دەزينفەكتسيا جاساۋ جيىلىگىن ارتتىرۋ، قالاىشىلىك تاكسي تاسىمالىن شەكتەۋ سياقتى شارالاردى قاراستىرادى", - دەدى ۆيتسە مينيستر.
سونداي-اق، تەڭىز كولىگى بويىنشا 5 ناۋرىزدان باستاپ يراننان كەلەتىن جۇك اۆتوكولىك قۇرالدارىن اقتاۋ جانە قۇرىق پورتتارى ارقىلى وتكىزۋ توقتاتىلعان.
"16 ناۋرىزدان شەتەلدەردەن قايتىپ كەلە جاتقان قازاقستاندىق ازاماتتاردى قوسپاعاندا اقتاۋ جانە قۇرىق پورتتارى ارقىلى جولاۋشىلار تاسىمالداۋ تولىقتاي توقتاتىلدى. سونداي-اق، تەڭىز پورتتارىنا كىرۋ كەزىندە شەت ەل كەمەلەرىنىڭ ەكيپاج مۇشەلەرىنىڭ جاعاعا شىعۋىنا تىيىم سالىندى. بۇگىنگى تاڭدا پورتتاردا سانيتارلىق-ەپيدەميولوگيالىق تالاپتاردى كۇشەيتۋ بويىنشا قوسىمشا شارالار قابىلدانىپ جاتىر. پورتقا كەلەتىن جۇك اۆتوكولىكتەرىنىڭ بارلىعىنا دەزينفەكتسيا جۇرگىزىلەدى. ماڭعىستاۋ وبلىسى اكىمدىگىنىڭ شەشىمىنە سايكەس اعىمداعى جىلعى 1 ساۋىردەن باستاپ پورتتاردان شىعاتىن ترانزيتتىك جۇك اۆتوكولىكتەرىن شەكاراعا دەيىن شىعارىپ سالادى", - دەپ اتاپ ءوتتى.
"ادىرنا" ۇلتتىق پورتالى
