QR İndustriia jäne infraqūrylymdyq damu bırınşı vise-ministrı Qaiyrbek Öskenbaev «COVID-19» koronavirustyq infeksiiasyn taratpau baǧytynda atqarylyp jatqan jūmystar turaly aityp berdı.
Vise ministrdıŋ deregınşe, qazırgı kezde temırjol salasynda 125 myŋ, äue qatynasynda - 20 myŋ, qūrylysta - 600 myŋ adam jūmys ısteidı. Olar jūmystan qysqartylmaityn körınedı.
İndustriia jäne infraqūrylymdyq damu ministrlıgı «Qazaqtelekom» AQ-men bırlesıp, «Kölık baǧyttarynyŋ onlain kartasyn» äzırlegen. Osy kartanyŋ kömegımen onlain rejımde kölık qatynastaryn qarap otyruǧa bolady. Karantin engızılgen qalalar qyzyl tüspen belgılenıptı.
Vise ministrdıŋ aituynşa, temırjol qatynasynda jolauşylardyŋ jüruı toqtaǧan, bıraq jük tasymaly bola beredı.
"Temırjol kölıgı salasynda el aumaǧynda tötenşe jaǧdai jäne jekelegen qalalarda karantindık rejım engızılgen sätten bastap Qazaqstan aumaǧyna baǧyttalǧan körşı temırjol äkımşılıkterınıŋ barlyq halyqaralyq poiyzdary, «QTJ» ŪK» AQ halyqaralyq jolauşylar jäne qalamaŋy poiyzdary toqtatyldy.
Elımız boiynşa qaterlı derttı jūqtyrǧandar sanynyŋ artuyna bailanysty äkımdıkter temırjolmen tūrǧyndar qozǧalysyn qosymşa şekteu boiynşa şaralar qabyldady. Temırjol şaruaşylyǧy qyzmetkerlerın tasymaldauǧa arnalǧan poiyzdardy qospaǧanda Qazaqstan aumaǧynda qatynaityn barlyq temırjol jolauşylar poiyzdary toqtatyldy. Jalpy alǧanda, 133 jūp jolauşylar jäne qalamaŋy poiyzdarynyŋ jüruı şektelıp, qalǧan 24 poiyz boiynşa barynşa saqtyq şaralary qabyldanady. Habarlasqan künıne qaramastan jolauşylarǧa satyp alǧan biletterınıŋ qūny tolyq kölemde qaitarylady, - dep atap öttı.
Al avtomobil kölıgınıŋ barlyq türlerımen Qytai, Resei, Qyrǧyzstan, Özbekstan jäne Moŋǧoliiamen ekıjaqty jolauşylar jäne jük tasymaldau, onyŋ ışınde 117 tūraqty baǧyt, sondai-aq tranzittık jolauşylar tasymaly toqtatylǧan. Bıraq, būl tyiym sanitarlyq-epidemiologiialyq talaptardy saqtai otyryp, jüzege asyrylatyn halyqaralyq qatynastaǧy jük avtokölıgı qūraldarymen jük tasymaldauǧa taralmaidy.
Öskebaev öŋırlerde karantin engızılgenge deiıngı jäne odan keiıngı avtomobil kölıgımen jolauşylar tasymaldaudy şekteu boiynşa ūsynystar berılgenın habarlady. "Ol avtovokzaldar, avtobeketter men jolauşylarǧa qyzmet körsetu tırekterı jūmysyn, qalalyq tasymaldy qospaǧanda avtokölıkpen jolauşylar tasymalynyŋ barlyq türın toqtatu; tūraqty qalalyq jäne qalamaŋy avtobus tasymalyn 50%-ǧa jäne odan köp kölemde, sondai-aq olardyŋ tūraqtylyǧyn şekteu; tūraqty qalalyq jäne qalamaŋy avtobus tasymalynyŋ kün saiynǧy jūmys uaqytyn karantin engızılgen öŋırlerde saǧat 19-00-ge deiın, özge öŋırlerde saǧat 21-00-ge deiın şekteu; qalalyq jäne qalamaŋy tasymalyndaǧy avtobus salondarynda dezinfeksiia jasau jiılıgın arttyru, qalaışılık taksi tasymalyn şekteu siiaqty şaralardy qarastyrady", - dedı vise ministr.
Sondai-aq, teŋız kölıgı boiynşa 5 nauryzdan bastap İrannan keletın jük avtokölık qūraldaryn Aqtau jäne Qūryq porttary arqyly ötkızu toqtatylǧan.
"16 nauryzdan şetelderden qaityp kele jatqan qazaqstandyq azamattardy qospaǧanda Aqtau jäne Qūryq porttary arqyly jolauşylar tasymaldau tolyqtai toqtatyldy. Sondai-aq, teŋız porttaryna kıru kezınde şet el kemelerınıŋ ekipaj müşelerınıŋ jaǧaǧa şyǧuyna tyiym salyndy. Bügıngı taŋda porttarda sanitarlyq-epidemiologiialyq talaptardy küşeitu boiynşa qosymşa şaralar qabyldanyp jatyr. Portqa keletın jük avtokölıkterınıŋ barlyǧyna dezinfeksiia jürgızıledı. Maŋǧystau oblysy äkımdıgınıŋ şeşımıne säikes aǧymdaǧy jylǧy 1 säuırden bastap porttardan şyǧatyn tranzittık jük avtokölıkterın şekaraǧa deiın şyǧaryp salady", - dep atap öttı.
"Adyrna" ūlttyq portaly
