شىمكەنت قالالىق پەريناتالدىق ورتالىقتىڭ دارىگەرلەرى مەرزىمىنەن بۇرىن تۋعان ۇشەمدى امان الىپ قالدى. وكپەسى دۇرىس دامىماي تۋعان نارەستەلەردىڭ ۇشەۋى بىردەي دۇنيەگە كەلە سالا جاساندى تىنىس الۋ اپپاراتىنا قوسىلعان. بۇل تۋرالى شىمكەنت قالالىق دەنساۋلىق ساقتاۋ باسقارماسىنىڭ ءباسپاسوز قىزمەتى حابارلادى.
جانساقتاۋ بولىمىندە جاتقان ۇشەمنىڭ بەتى بەرى قاراپ، ءبىر ايعا جۋىق ارنايى كۇتىم جاسايتىن بولىمشەدە دارىگەرلەردىڭ باقىلاۋىندا بولدى.
بيىلعى جىلدىڭ ءۇشىنشى ۇشەمى 16 ناۋرىز كۇنى شىمكەنت قالالىق پەريناتالدىق ورتالىقتا دۇنيەگە كەلگەن ەدى. وسى كۇنى شاقالاقتاردىڭ اناسى، 34 جاستاعى ارايلىم سەمبيەۆاعا شۇعىل تۇردە وتا جاسالعان.
اي-كۇنى تولماي تۋعان سابيلەردىڭ سالماعى نەبارى 1,5 كەلىدەي عانا بولعان (1350 گرامم، 1790 گرامم جانە 1910 گرامم). مەرزىمىنەن بۇرىن دۇنيەگە كەلگەن شاقالاقتاردىڭ جاعدايى العاشقىدا اۋىر ەدى دەيدى دارىگەرلەر. ماماندار وكپەسى دۇرىس دامىماي تۋعان نارەستەلەردى جاساندى تىنىس الۋ اپپاراتىنا قوسىپ، كۇتىم جاسادى. بەس كۇن بويى جانساقتاۋ بولىمىندە جاتقان ۇشەمنىڭ بەتى بەرى قاراپ، ەكى اپتاعا جۋىق ميراديل ميركۋربانوۆ جەتەكشىلىك ەتەتىن ارنايى كۇتىم جاسايتىن بولىمشەدە دارىگەرلەردىڭ باقىلاۋىندا بولدى.
قالالىق پەريناتالدىق ورتالىقتا كۇتىلگەن نارەستەلەر وسى ۋاقىت ىشىندە سالماق قوسىپ، جاعدايلارى جاقساردى. اق حالاتتىلاردىڭ بىلىكتىلىگى مەن كۇتىمىنىڭ، تىنىمسىز ەڭبەگىنىڭ ناتيجەسىندە شالا تۋعان شاقالاقتار امان قالىپ، اناسى بالالارىن باۋىرىنا باستى. ءتورتىنشى رەت انا اتانعان 34 جاستاعى ارايلىم سەمبيەۆانىڭ جاقىندارى سابيلەرگە مەدينا، الينا جانە ياسينا دەگەن ەسىم بەرىپ وتىر.
«قازىر ولاردىڭ ومىرىنە ەش قاۋىپ جوق»، دەيدى ماماندار. بۇيىرتسا، ۇشەمدەر مەن اناسى 7 ءساۋىر كۇنى پەرزەنتحانادان شىعارىلماق.
