سەرىك ەلىكباي: شايتان مەن شايىر

915

(ساعىل اڭگىمە)

ول وتە تالانتتى ەدى...
ءومىردى ءسۇيىپ جىر جازدى!
جاستاي جەتىم قالعان بوزبالا رەنجىپ، بۇگىلىپ، وكىنىپ كورگەن ەمەس!
جارقىراپ جانعان كوزدەرى-جاراتقانعا جاساۋراماي قارايتىن.
ءان سالىپ جۇرەتىن.
جىر جازىپ جۇرەتىن.
الدەكىمگە كومەكتەسىپ بارا جاتادى...
الدەكىمگە كومەكتەسىپ كەلە جاتادى...
سول ءتۇنى، ءبىر توپ اقىن جىگىتتەر دۋىلداپ باس قوستى!
بۇنى ورتاعا العان.
ىشسەڭشى، - دەگەن.
بۇل; ىشە المايمىن، - دەپ ەدى.
تۋىسى كوپ، جازۋشىلار وداعىندا "مىقتى" اعاسى بار كوركوكىرەك جىگىت-قاسىنا ءبىر قىزدى ەرتىپ كەلىپتى...
ەسىرىك نەمە; قاسىندا نازىك جان بار دەگەن سەزىمنەن ادا-قىسىلۋسىز، قامسىز اۋىزبەن بوقتىقتى ەزىپ قۇسادى...
ۇركەك سەرىگى، بوتا كوز بالا-ۇيالىپ الاۋلايدى...
ءتۇن اۋا قىز "قايتامىن" دەدى.
-كەتە بەر، - دەگەن سەنگەنى...
-دۇرىس ەمەس عوي، -دەدى بۇل...
-ەمەشەگىڭ ەزىلىپ تۇرسا، بار شىعارىپ سال...
بويى شاعىن بويجەتكەن بۇعان باسىندا توساڭ قاراعانىمەن، شەشىلە كەلە اڭگىمەلەسىپ كەتتى...
-ءسىز، نەگە الماتىعا كەتىپ قالمايسىز...
-ماعان وسى قالا ۇنايدى.
-الماتىدا جىر سۇيەر قاۋىم بار عوي...
-الماتى دا وسى...مەن كىمگە كەرەكپىن؟
-"قارا تۇندە مىنا ومىرمەن قوشتاستىم"... دەلىنەر ولەڭىڭىز كەرەمەت!
-راحمەت!
-ءسىزدى، ءسىزدى ءبارى جامان ادام دەيدى...
-ءيا، جامان دەيتىنىن بىلەمىن...
نايزاعاي شاتىرلاپ جارقىلدادى. بوتەن قىز جابىسىپ قىسىلدى - كەۋدەسىنە.
-كىرىڭىز، قۇربى قىزدارمەن عانا تۇرامىن. شاي ءىشىڭىز...
-راحمەت!
ساعات ەكى بولىپتى، پاتەرگە قالا ورتاسىنداعى ورىس زيراتى ىشىمەن تارتتى...
ۇزەڭگىسى سۋىق ۇرەي-اياعىن شىدەرلەي بەرەدى.
نايزاعاي اسپاندى جىرتا جارىلدى...
ءون بويى جارق ەتىپ كۇيە ىسىدى.
ەسىن جيسا، قارسى الدىندا قاپ-قارا تۇنەرگەن الدەكىم وتىر...
-كىمسىڭ...
بۇل تۇك ايتا المادى.
-سەندەر مەنى قۇرتقان...دەدى ول.
جىلادى.
-سويلە!
نە ايتپاق؟
-ولەڭ وقىپ بەرەيىن!
-وقى!
...ولەڭ وقىپ ولەم مەن..
ولەرىمنىڭ الدىندا!
اق قاعازعا جازىپ كەتەم
ارىزىمدى تاعدىرعا...

جالعىز مولام باسىندا،
قازاق ءتىلى تۇرادى!
سوندا بولار
اڭكۇر-مۇڭكىر سۇراعى...
-توقتا، كوڭىلدى بىردەمەڭدى وقىشى!
-ءبارى وتەدى!
شىڭعىسحاننىڭ قاھارىنداي تاۋسىلىپ..
ار وتەدى...
ارسىز كۇنىن قاۋسىرىپ...
قازاق عانا قالادى!
اققان جاسىن ىركىپ-اپ.
كەۋدەسىنەن جۋسان ءيسى بۇرقىراپ!
شىرقاۋ كوكتە اتقان وعى شىرقىراپ...
-اقىنبىسىڭ؟
-بىلمەيمىن...
-باتىرمىسىڭ؟
-جوق!
-ال، ءسىز كىمسىز...
-مەن ادامزات اداسسا - الىپ شىعامىن دەپ كەلىپ ەم! مەن ادامزات قارايسا-اعارتامىن دەپ ەدىم...مەن ادامنىڭ اق تۋى بولسام دەپ ەم،ايدىنىنداعى اققۋى بولسام دەپ ەم...
جوق، ولار مەنەن استى! ارسىزدىقتان دا، الداۋدان دا...
...بۇل جۇباتپاققا قول سوزعان-ساۋساقتارى وتقا تيگەندەي تىز ەتتى...
-ولەڭ وقىشى!
-...ولەڭ وقى، قاس ۇيىندە دوس ءۇشىن!...
ۇزاق ولەڭدەرىن وقىدى، ساعاتتار توقتاپ قالعان سەكىلدى!
قارالى جاندى باۋىرىنا تارتتى...
كۇيىپ بارادى!
جانىپ بارادى!
شىداۋ كەرەك - ول ءۇشىن...
جۇرت ءۇشىن...
تاڭ اتتى.
...قالا زيراتى ورتاسىندا جاس شايىردىڭ ءمايىتى جاتتى. قاسىنداعى پەريزات ءجۇزدى پەرىشتە وعان قاراپ، وكسىپ جىلاۋدا ەكەن!
نايزاعاي تۇسكەن دەنەسى-قارا قوشقىلدانىپ كەتىپتى...
اقىندى كومگەن كۇنى جاڭبىر ۇزاق جاۋدى...
دوستارى; سول كۇنى ماس بولىپ كەتكەنىن ايتتى تەرگەۋشىگە...
پوليتسيا عيماراتى ۇستىندە اپپاق پەرىشتە وتىردى، وڭ بەتىنە قارا داق ءتۇسىپ قاپتى...

 

پىكىرلەر
رەداكتسيا تاڭداۋى