Serık Elıkbai: Şaitan men şaiyr

(Saǧyl äŋgıme) Ol öte talantty edı... Ömırdı süiıp jyr jazdy! Jastai jetım qalǧan bozbala renjıp, bügılıp, ökınıp körgen emes! Jarqyrap janǧan közderı-jaratqanǧa jasauramai qaraityn. Än salyp jüretın. Jyr jazyp jüretın. Äldekımge kömektesıp bara jatady... Äldekımge kömektesıp kele jatady... Sol tünı, bır top aqyn jıgıtter duyldap bas qosty! Būny ortaǧa alǧan. Işseŋşı, - degen. Būl; ışe almaimyn, - dep edı. Tuysy köp, jazuşylar odaǧynda "myqty" aǧasy bar körkökırek jıgıt-qasyna bır qyzdy ertıp kelıptı... Esırık neme; qasynda näzık jan bar degen sezımnen ada-qysylusyz, qamsyz auyzben boqtyqty ezıp qūsady... Ürkek serıgı, bota köz bala-ūialyp alaulaidy... Tün aua qyz "qaitamyn" dedı. -Kete ber, - degen sengenı... -Dūrys emes ǧoi, -dedı būl... -Emeşegıŋ ezılıp tūrsa, bar şyǧaryp sal... Boiy şaǧyn boijetken būǧan basynda tosaŋ qaraǧanymen, şeşıle kele äŋgımelesıp kettı... -Sız, nege Almatyǧa ketıp qalmaisyz... -Maǧan osy qala ūnaidy. -Almatyda jyr süier qauym bar ǧoi... -Almaty da osy...men kımge kerekpın? -"Qara tünde myna ömırmen qoştastym"... delıner öleŋıŋız keremet! -Rahmet! -Sızdı, sızdı bärı jaman adam deidı... -İä, jaman deitının bılemın... Naizaǧai şatyrlap jarqyldady. Böten qyz jabysyp qysyldy - keudesıne. -Kırıŋız, qūrby qyzdarmen ǧana tūramyn. Şai ışıŋız... -Rahmet! Saǧat ekı bolypty, päterge qala ortasyndaǧy orys ziraty ışımen tartty... Üzeŋgısı suyq ürei-aiaǧyn şıderlei beredı. Naizaǧai aspandy jyrta jaryldy... Ön boiy jarq etıp küie ysydy. Esın jisa, qarsy aldynda qap-qara tünergen äldekım otyr... -Kımsıŋ... Būl tük aita almady. -Sender menı qūrtqan...dedı Ol. Jylady. -Söile! Ne aitpaq? -Öleŋ oqyp bereiın! -Oqy! ...Öleŋ oqyp ölem men.. Ölerımnıŋ aldynda! Aq qaǧazǧa jazyp ketem Aryzymdy taǧdyrǧa... Jalǧyz molam basynda, Qazaq tılı tūrady! Sonda bolar Äŋkür-müŋkır sūraǧy... -Toqta, köŋıldı bırdemeŋdı oqyşy! -Bärı ötedı! Şyŋǧyshannyŋ qaharyndai tausylyp.. Ar ötedı... Arsyz künın qausyryp... Qazaq ǧana qalady! Aqqan jasyn ırkıp-ap. Keudesınen jusan isı būrqyrap! Şyrqau kökte atqan oǧy şyrqyrap... -Aqynbysyŋ? -Bılmeimın... -Batyrmysyŋ? -Joq! -Al, sız kımsız... -Men adamzat adassa - alyp şyǧamyn dep kelıp em! Men adamzat qaraisa-aǧartamyn dep edım...Men adamnyŋ aq tuy bolsam dep em,aidynyndaǧy aqquy bolsam dep em... Joq, olar menen asty! Arsyzdyqtan da, aldaudan da... ...Būl jūbatpaqqa qol sozǧan-sausaqtary otqa tigendei tyz ettı... -Öleŋ oqyşy! -...Öleŋ oqy, qas üiınde dos üşın!... Ūzaq öleŋderın oqydy, saǧattar toqtap qalǧan sekıldı! Qaraly jandy bauyryna tartty... Küiıp barady! Janyp barady! Şydau kerek - ol üşın... Jūrt üşın... Taŋ atty. ...Qala ziraty ortasynda jas şaiyrdyŋ mäiıtı jatty. Qasyndaǧy perizat jüzdı perışte oǧan qarap, öksıp jylauda eken! Naizaǧai tüsken denesı-qara qoşqyldanyp ketıptı... Aqyndy kömgen künı jaŋbyr ūzaq jaudy... Dostary; sol künı mas bolyp ketkenın aitty tergeuşıge... Polisiia ǧimaraty üstınde appaq perışte otyrdy, oŋ betıne qara daq tüsıp qapty...